ກະຊວງຍຸຕິທຳ ສະເໜີຮ່າງກົດໝາຍປົກປ້ອງສິດ ແລະຜົນປະໂຫຍດຂອງເດັກ

ໃນວັນທີ 14 ກໍລະກົດ 2023 ນີ້, ທ່ານ ໄພວີ ສີບົວລິພາ ລັດຖະມົນຕີກະຊວງຍຸຕິທຳ ໄດ້ຂຶ້ນສະເໜີຮ່າງກົດໝາຍວ່າດ້ວຍການປົກປ້ອງສິດ ແລະຜົນປະໂຫຍດຂອງເດັກສະບັບປັບປຸງຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX, ເພື່ອໃຫ້ບັນດາສະມາຊິກສະພາແຫ່ງຊາດໄດ້ຄົ້ນຄ້ວາປະກອບຄຳຄິດເຫັນ ເຮັດໃຫ້ມີເນື້ອໃນຄົບຖ້ວນ ແລະຮັດກຸມກວ່າເກົ່າທັງສາມາດນໍ້າໃຊ້ໄດ້ຢ່າງມີປະສິດທິຜົນ.

ຮ່າງກົດຫມາຍສະບັບນີ້ ປະກອບມີ 13 ພາກ, 11 ໝວດ, 82 ມາດຕາ ໃນນັ້ນ ໄດ້ປັບປຸງ 2 ພາກ, 1 ໝວດ, 38 ມາດ ຕາ, ເພີ່ມໃໝ່ 5 ພາກ, 2 ໝວດ, 37 ມາດຕາ, ໂຮມເຂົ້າ 2 ມາດຕາ, ຮັກສາໄວ້ 3 ມາດຕາ ແລະຕັດອອກ 44 ມາດຕາ.

ທ່ານ ໄພວີ ສີບົວລິພາ ກ່າວວ່າ: ພາຍຫລັງຖືກຮັບຮອງຈາກສະພາແຫ່ງຊາດແລ້ວຈະເປັນຜົນດີຫລາຍດ້ານຕໍ່ເດັກເປັນຕົ້ນ, ຈະເປັນບ່ອນອີງທີ່ສໍາຄັນຕໍ່ກັບວຽກງານການປົກ ປ້ອງສິດ ແລະ ຜົນປະໂຫຍດຂອງເດັກ ໃນສປປ ລາວ. ໃນຂະນະທີ່ກົດໝາຍວ່າດ້ວຍການປົກປ້ອງສິດ ແລະຜົນປະໂຫຍດຂອງເດັກ ສະບັບປີ 2006 ທີ່ນຳໃຊ້ໃນປະຈຸບັນ ມີ 8 ພາກ, 18 ໝວດ, 93 ມາດຕາ, ເປັນກົດໝາຍທີ່ມີຄວາມສຳຄັນຕໍ່ກັບວຽກງານສິດທິເດັກທີ່ ສປປ ລາວ ໄດ້ເປັນເຂົ້າເປັນພາຄີໃນສົນທິສັນຍາວ່າດ້ວຍສິດທິເດັກເນື່ອງຈາກໄດ້ກຳນົດຫລັກການ, ລະບຽບການ ແລະມາດຕະການກ່ຽວກັບການຄຸ້ມຄອງ, ຕິດຕາມ, ກວດກາການຈັດຕັ້ງປະຕິບັດວຽກງານປົກປ້ອງສິດ ແລະຜົນປະໂຫຍດຂອງເດັກເຊິ່ງມາຮອດປະຈຸບັນ ໄດ້ເຮັດໃຫ້ການປົກປ້ອງສິດ ແລະຜົນປະໂຫຍດເດັກມີຄວາມກ້າວໜ້າ ແລະ ມີການພັດທະນາຫລາຍພໍສົມຄວນ, ສາມາດຊ່ວຍເຫລືອເດັກທີ່ເປັນຜູ້ຖືກເຄາະຮ້າຍໄດ້ຈຳນວນໜຶ່ງທັງເປັນການປະຕິບັດພັນທະຂອງ ສປປ ລາວ ຕໍ່ສາກົນຕື່ມອີກ.

ສຳລັບການຈັດຕັ້ງປະຕິບັດກົດໝາຍດັ່ງກ່າວ, ໃນໄລຍະຜ່ານມາເຮັດໃຫ້ເດັກໄດ້ຮັບສິດ ແລະຜົນປະໂຫຍດຫລາຍຂຶ້ນເປັນຕົ້ນການດຳລົງຊີວິດ,ການມີສ່ວນຮ່ວມ, ການພັດທະນາ ແລະ ການປົກປ້ອງ; ພ້ອມນັ້ນ, ຂະແໜງການທີ່ກ່ຽວຂ້ອງຂັ້ນສູນກາງ ແລະທ້ອງຖິ່ນໄດ້ເອົາໃຈໃສ່ໃນການເກັບກຳສະຖິຕິ, ການສະໜອງ ແລະຢັ້ງຢືນຄວາມຖືກຕ້ອງຂອງຂໍ້ມູນ, ທັງມີກົນໄກການປະສານງານໃນການປົກປ້ອງສິດ ແລະຜົນປະໂຫຍດຂອງເດັກ ແຕ່ຂັ້ນສູນກາງລົງຮອດທ້ອງຖິ່ນ. ພ້ອມດຽວກັນນີ້, ຍັງຊ່ວຍຫລຸດປະລິມານຂອງຄະດີກ່ຽວກັບການກະທໍາຜິດຂອງເດັກເພື່ອບໍ່ໃຫ້ຄະດີດັ່ງກ່າວຖືກສັ່ງຟ້ອງຂຶ້ນສານຫລາຍເກີນໄປ.

ພາຍຫລັງກົດໝາຍວ່າດ້ວຍການປົກປ້ອງສິດ ແລະຜົນປະໂຫຍດຂອງເດັກຖືກຮັບຮອງ ແລະປະກາດໃຊ້ແລ້ວຄາດວ່າຈະເປັນບ່ອນອີງທີ່ສໍາຄັນຕໍ່ວຽກງານການປົກປ້ອງສິດ ແລະຜົນປະໂຫຍດຂອງເດັກ, ທັງເປັນບ່ອນອີງພື້ນຖານໃນການສ້າງ ແລະຄຸ້ມຄອງກອງທຶນເພື່ອສະໜອງງົບປະມານຮັບໃຊ້ເຂົ້າໃນວຽກງານປົກປ້ອງສິດ ແລະ ຜົນປະໂຫຍດຂອງເດັກ, ທັງຈະເປັນບ່ອນອີງທີ່ຈະແຈ້ງໃນການປະຕິບັດໜ້າທີ່ຄວາມຮັບຜິດຊອບຂອງແຕ່ລະພາກສ່ວນໃນການປົກປ້ອງສິດ ແລະຜົນປະໂຫຍດຂອງເດັກ ແລະ ຈະເປັນນິຕິກຳທີ່ເປັນບ່ອນອີງໃນການກໍານົດກົນໄກການປະສານງານກ່ຽວກັບການປົກປ້ອງສິດ ແລະ ຜົນປະໂຫຍດຂອງເດັກທີ່ເປັນລະບົບ, ສາມາດຊ່ວຍເຫລືອເດັກທີ່ຕ້ອງການປົກປ້ອງພິເສດ ແລະສົ່ງເສີມການນຳໃຊ້ສິດຂອງເດັກໄດ້ທັນກັບສະພາບການ.
ທີ່ມາ: ຂປລ

แชร์