ຄິວລົດສາຍໃຕ້ ກຽມລົດເກືອບຮ້ອຍຄັນຂົນສົ່ງຜູ້ໂດຍສານກັບບ້ານປີໃໝ່

  ສະຖານນີຄິວລົດສາຍໃຕ້ນະຄອນຫຼວງວຽງຈັນ ກຽມພ້ອມທຸກດ້ານເພື່ອຮອງຮັບຜູ້ໂດຍສານກັບພູມລຳເນົາໃນຊ້ວງປີໃໝ່ລາວໂດຍສະເພາະກະກຽມກວດກາເຕັກນິກລົດ, ໂຊເຟີລົດ ແລະນຳໃຊ້ລົດຈາກປົກກະຕິ 60 ຄັນເພີ່ມເປັນ 90 ຄັນ ພ້ອມຢືນຢັນລາຄາປົກກະຕິແຕ່ຢາກຮຽກຮ້ອງຜູ້ໂດຍສານມາຊື້ປີ້ ແລະຂຶ້ນລົດຢູ່ຄິວລົດ ເພື່ອບໍ່ໃຫ້ເກີດບັນຫາທີ່ນັ່ງ ແລະລາຄາ.

 ວັນທີ 8 ເມສາ 2019 ທ່ານ ວັນເພັນ ສີສຸກ ຜູ້ອຳນວຍການສະຖານີຂົນສົ່ງໂດຍ ສານທາງໄກສາຍໃຕ້-ສາຍຕ່າງປະເທດ ໃຫ້ສຳພາດສື່ມ່ວນຊົນວ່າ: ເນື່ອງໃນໂອກາດບຸນປີໃໝ່ລາວທີ່ຈະມາເຖິງນີ້ເປັນວັນເວລາທີ່ມີຄວາມໝາຍຄວາມສຳຄັນຂອງຊາວລາວຊຶ່ງແຕ່ລະປີພໍ່ແມ່ປະຊາຊົນກໍ່ໄດ້ພາກັນມີການສະເຫຼີມສະ ຫຼອງພົບປະສ້າງສັນມ່ວນຊື່ນ ແລະສ່ວນກຸ່ມຄົນທີ່ມາຢູ່ນະຄອນຫຼວງວຽງຈັນ ກໍຕ້ອງເດີນທາງກັບຖິ່ນຖານຍາມພໍ່ແມ່ພີ່ນ້ອງສະນັ້ນໂອກາດດັ່ງກ່າວນີ້ທາງສະຖານນີຄິວລົດສາຍໃຕ້ພວກເຮົາເຫັນຄວາມສຳຄັນຮັບໃຊ້ພໍ່ແມ່ປະຊາຊົນທຸກໆປີຜ່ານມາຊຶ່ງປີນີ້ກໍກະກຽມຄວາມພ້ອມບໍລິການເຕັມທີ່ ແລະ ປີນີ້ເປັນປີທ່ອງ ທ່ຽວລາວ-ຈີນກໍໄດ້ກຽມພ້ອມເປັນພິເສດ.

  ສຳລັບການບໍລິການຮັບໃຊ້ປະຊາຊົນປີນີ້ທາງຄິວລົດພວກເຮົາແມ່ນກຽມພ້ອມກົດລະບຽບ, ສະພາບເຕັກນິກລົດ ແລະໂຊເຟີລົດຢ່າງເຂັ້ມງວດຊຶ່ງປີນີ້ທາງ ສະຖານນີ້ພວກເຮົາຈັດລົດເຂົ້າມາເສີມຈຳນວນ 30 ຄັນ ຈາກປົກກະຕິ 60 ຄັນ ລວມທັງໝົດ 90 ຄັນ ແລະລົດແມ່ນຈະແລ່ນຈາກປົກກະຕິຖ້າຄົນຂັບລົດ ແລ່ນອອກ 5 ຫຼື 10 ນາທີເວລາເປີດບໍລິການ 9 ໂມງເຊົ້າຫາ 22:00 ໂມງ ແລະສ່ວນລາຄາຢືນຢັນປົກກະຕິ. ຄຽງຄູ່ກັນນີ້ທາງສະຖານນີ້ຄິວລົດແມ່ນຮ່ວມ ມືກັບກະຊວງໂຍທາ ແລະຂົນສົ່ງແຈ້ງການພາກສ່ວນບໍລິສັດທີ່ເຂົ້າຮ່ວມແລ່ນລົດສາຍໃຕ້ເອົາໃຈໃສ່ກວດກາເຕັກນິກສະພາບລົດໂຊເຟີລົດ ແລະສຶກສາອົບຮົມໃຫ້ມີຄວາມພ້ອມທຸກດ້ານເພື່ອໃຫ້ຜູ້ໂດຍສານມີຄວາມປອດໄພ.

 ສຸດທ້າຍຜູ້ອຳນວຍການຮຽກຮ້ອງຜູ້ໂດຍສານທີ່ມີຈຸດປະສົ່ງຈະເດີນທາງພາກກາງ ແລະໃຕ້ໃຫ້ມາຊື້ປີ້ ແລະຂຶ້ນລົດຢູ່ສະຖານນີເພື່ອຄວາມປອດໄພ ແລະບໍ່ເປັນການເອົາລັດເອົາປຽບທີ່ເຄີຍມີກະແສຂ່າວຜ່ານມາ ແລະທີ່ສຳຄັນທຸກຄົນກຽມເຄື່ອງພ້ອມທຸກເວລາເພາະລົດແມ່ນຈະປ່ອຍອອກທັນທີຖ້າຜູ້ໂດຍສານເຕັມຄັນ.

ຂ່າວ: ບຸນນິກ    

แชร์