ໄຊຍະບູລີ ທຳລາຍຊີ້ນສ່ວນສັດປ່າທີ່ຍຶດຈາກແມ່ຄ້າ

ກອງກວດກາປ່າໄມ້ແຂວງໄຊຍະບູລີ ໄດ້ຈັດພິທີຈູດທໍາລາຍຊີ້ນສ່ວນສັດປ່າຕ້ອງຫ້າມ ແລະຍືດໄດ້ຈາກແມ່ຄ້າມາວາງຂາຍໃນທ້ອງຕະຫຼາດຂອງແຂວງໄຊຍະບູລີ.

ພິທີດັ່ງກ່າວໄດ້ຈັດຂຶ້ນໃນວັນທີ 12 ກໍລະກົດ 2023, ຊຶ່ງທ່ານ ກອງທ່ຽນ ໄຊຍະພອນ ຫົວໜ້າກອງກວດກາປ່າໄມ້ແຂວງໄຊຍະບູລີໄດ້ລາຍງານວ່າ: ຜ່ານມາກອງກວດກາປ່າໄມ້ ໄດ້ເອົາໃຈໃສ່ຢ່າງຕັ້ງໜ້າຕໍ່ວຽກງານກວດກາສັດນໍ້າ ສັດປ່າ ໄດ້ແຕ່ງຕັ້ງພະນັກງານເຈົ້າໜ້າທີ່ລົງເຜີຍແຜ່ລະບຽບກົດໝາຍຄໍາສັ່ງ ແລະນິຕິກໍາອື່ນໆ ທີ່ກ່ຽວຂ້ອງກັບວຽກງານກວດກາການຄຸ້ມຄອງສັດນໍ້າ ແລະສັດປ່າໃຫ້ພໍ່ແມ່ປະຊາຊົນພໍ່ຄ້າຊາວຂາຍໄດ້ຕິດຕັ້ງໂພດສະເຕີ ແລະປ້າຍໂຄສະນາຕ່າງໆຢູ່ຕາມຕະຫຼາດ ແລະບ້ານປະຊາຊົນເພື່ອໃຫ້ສັງຄົມຮັບຮູ້ ແລະເຂົ້າໃຈຕໍ່ລະບຽບກົດໝາຍວ່າດ້ວຍສັດນໍ້າສັດປ່າຜ່ານການຕິດຕາມກວດກາຕົວຈິງໄລຍະຜ່ານມາ ກອງກວດກາປ່າໄມ້ ໄດ້ສົມທົບກັບເຈົ້າທີ່ປ່າໄມ້ເມືອງໄຊຍະບູລີ ເມືອງພຽງ ແລະເມືອງປາກລາຍ ລົງກວດກາຢູ່ຕະຫຼາດ 6 ຄັ້ງ ສາມາດພົບເຫັນປະຊາຊົນຈໍານວນ 12 ຄົນ ນັ່ງຂາຍຊີ້ນສັດປ່າ ຈາກນັ້ນເຈົ້າໜ້າທີ່ ຈຶ່ງໄດ້ກວດກາ ແລະ ຍຶດຊີ້ນສ່ວນສັດປ່າທີ່ວາງຂາຍໄດ້ທັງໝົດ 49,3 ກິໂລ ຄິດເປັນມູນຄ່າ 5,6 ລ້ານກີບ ໃນນີ້ມີທັງສັດທີ່ຕາຍ ແລະຍັງມີຊີວິດຢູ່ເຊັ່ນ: ຊີ້ນຟານດິບ 4,2 ກິໂລ ຊີ້ນໝູປ່າດິບ 10,7 ກິໂລ ຊີ້ນໝູປ່າແຫ້ງ 4,8 ກິໂລ ງູສິງ 2 ກິໂລ ແລນດິບ 3,5 ກິໂລ ກະຮອກດິບ 15 ໂຕ ເຕົ່າຍັງມີຊີວິດ 3 ໂຕ ນໍ້າໜັກ 6,3 ກິໂລ ແລນຍັງມີຊີວິດ 3 ໂຕ ນໍ້າໜັກ 5,9 ກິໂລ ແລະນົກເປົ້າ 9 ໂຕ.

ສຳລັບຊີ້ນສ່ວນສັດທີ່ຍຶດໄດ້ນັ້ນແມ່ນໄດ້ຈັດພິທີຈູດທໍາລາຍສ່ວນສັດທີ່ຍັງມີຊີວິດແມ່ນໄດ້ນໍາໄປປ່ອຍຄືນສູ່ທໍາມະຊາດປ່າສະຫງວນນໍ້າປຸຍ ແລະປະຊາຊົນ 12 ຄົນ ທີ່ຂາຍສັດປ່າຫວງຫ້າມແມ່ນໄດ້ເຮັດບົດບັນທຶກສຶກສາອົບຮົມພວກຜູ້ກ່ຽວບໍ່ໃຫ້ກັບມາຂາຍສັດທີ່ຫວງຫ້າມຕື່ມອີກ.

แชร์