ເນື້ອທີ່ການຜະລິດ 103 ບ້ານ ໃນແຂວງຫົວພັນ ຖືກບົ້ງທໍາທາຍ

ແຫລ່ງຂ່າວຈາກ ແຂວງຫົວພັນ ໃຫ້ຮູ້ວ່າ: ປັດຈຸບັນ, ບົ້ງກິນເຂົ້ານາ ກຳລັງລະບາດຢູ່ 103 ບ້ານ ໃນ 7 ເມືອງ ຄື: ຊຳເໜືອ, ວຽງໄຊ, ຊຳໃຕ້, ກວັນ, ຊຽງຄໍ້, ແອດ ແລະ ເມືອງ ຊ່ອນ, ແຂວງຫົວພັນ ເຮັດໃຫ້ຜົນຜະລິດຂອງປະຊາຊົນໄດ້ຮັບຜົນກະທົບ ແລະ ເສຍຫາຍເປັນຈຳນວນ ຫລາຍ ເປັນຕົ້ນແມ່ນເຂົ້ານາ, ເຂົ້າໄຮ່ ແລະ ສາລີ, ເນື້ອທີ່ໄດ້ຮັບຜົນກະທົບ 2.369 ເຮັກຕາ ເສຍຫາຍໜັກ 78 ກວ່າເຮັກຕາ ໃນນີ້, ມີເນື້ອທີ່ນາ 1.879 ເຮັກ ຕາ ເສຍຫາຍ 46 ກວ່າເຮັກຕາ, ເນື້ອທີ່ປູກເຂົ້າໄຮ່ໄດ້ຮັບຜົນກະທົບ 441 ເຮັກຕາ, ເສຍຫາຍ 29 ກວ່າເຮັກຕາ ແລະເນື້ອທີ່ປູກສາລີ 60 ເຮັກຕາ, ເສຍຫາຍ 1,9 ເຮັກຕາ.

ອີງຕາມການລາຍງານຂອງຂະແໜງປູກຝັງພະແນກກະສິກຳ ແລະປ່າໄມ້ແຂວງຫົວພັນໄດ້ໃຫ້ຮູ້ວ່າ: ໃນເບື້ອງຕົ້ນພະແນກກະສິກຳ ແລະປ່າໄມ້ແຂວງໄດ້ປະສານສົມທົບກັບຫ້ອງການກະສິກຳ ແລະປ່າໄມ້ເມືອງ ນຳເອົາວິຊາການລົງກວດກາຕົວຈິງຢູ່ແຕ່ລະບ້ານທີ່ມີການລະບາດຂອງບົ້ງທຳລາຍຕົ້ນເຂົ້າ ແລະຜົນຜະລິດຂອງປະຊາຊົນ. ມາຮອດປັດຈຸບັນ, ການແກ້ໄຂໃນເບື້ອງຕົ້ນຂະແໜງປູກຝັງໄດ້ປະສານສົມທົບກັບເມືອງ ແລະບ້ານເພື່ອນຳເອົາວິຊາການລົງຊຸກຍູ້ການປ້ອງກັນ ແລະ ຄວບຄຸມພະຍາດບົ້ງທີ່ທຳລາຍຜົນຜະລິດຂອງປະຊາຊົນໂດຍການນຳໃຊ້ຢາຂ້າບົ້ງລົງສີດໃສ່ບ່ອນທີ່ມີການລະບາດພະຍາດບົ້ງຊຶ່ງສາມາດຄວບຄຸມເນື້ອທີ່ທີ່ມີການລະບາດໄດ້ 633 ກວ່າເຮັກຕາ.

ຕໍ່ກັບສະພາບດັ່ງກ່າວພາກສ່ວນທີ່ກ່ຽວຂ້ອງຈຶ່ງໄດ້ຮຽກຮ້ອງມາຍັງຊາວກະສິກອນໃຫ້ຊ່ວຍການຕິດຕາມຄວບຄຸມການລະບາດຂອງພະຍາດບົ້ງທຳລາຍຜົນຜະລິດໂດຍການເບິ່ງແຍງຕົ້ນເຂົ້າ ແລະຜົນຜະລິດຂອງຕົນໂດຍນຳໃຊ້ເຕັກນິກວິຊາການເຂົ້າໃນການບົວລະບັດຮັກສາຖ້າຫາກພົບເຫັນການລະບາດຂອງສັດຕູພືດຕ່າງໆ ແມ່ນໃຫ້ລາຍງານປະສານຫາພາກສ່ວນທີ່ກ່ຽວຂ້ອງເພື່ອລົງມາກວດກາ ແລະແກ້ໄຂຄວບຄຸມເພື່ອບໍ່ໃຫ້ເກີດຜົນເສຍຫາຍ ແລະເຮັດໃຫ້ສະມັດຕະພາບການຜະລິດປະຊາຊົນ ໄດ້ເສຍຫາຍຫລາຍກວ່າເກົ່າ.

ຂ່າວ-ພາບ: ພອນທິບ ພັນທະວົງ

แชร์