ບໍ່ມີຄວາມຄືບໜ້າແຕ່ຢ່າງໃດ ໂຄງການທາງດ່ວນນະຄອນຫລວງວຽງຈັນ-ຫົວພັນ

ກ່ຽວກັບຄວາມຄືບໜ້າໂຄງການກໍ່ສ້າງທາງດ່ວນນະຄອນຫຼວງວຽງຈັນ-ຫົວພັນ ທີ່ສະມາຊິກສະພາແຫ່ງຊາດ ເຂດເລືອກຕັ້ງທີ 8 ແຂວງຫົວພັນ ໄດ້ຊັກຖາມໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX, ຕໍ່ບັນຫານີ້ ທ່ານ ງາມປະສົງ ເມືອງມະນີ ລັດຖະມົນຕີກະຊວງໂຍທາທິການ ແລະຂົນສົ່ງ ໄດ້ຊີ້ແຈງວ່າ: ໂຄງການດັ່ງກ່າວນີ້ກະຊວງແຜນການ ແລະການລົງທຶນໄດ້ເຊັນສັນຍາກັບບໍລິສັດທີ່ຈະພັດທະນາຮຽບຮ້ອຍແລ້ວແຕ່ຜູ້ພັດທະນາຍັງບໍ່ໄປບໍ່ມາຫຍັງ, ເຊີ່ງອາດເປັນຍ້ອນກໍາລັງຊອກຫາຄູ່ຮ່ວມມືພັດທະນາເຮັດໃຫ້ມາຮອດປະຈຸບັນໂຄງການນີ້ຍັງມິດງຽບຢູ່ເນື່ອງຈາກການຊອກຫາຄູ່ຮ່ວມພັດທະນາມີຄວາມສໍາຄັນຫລາຍເພາະຕ້ອງເປັນຜູ້ພັດທະນາທີ່ມີຄວາມພ້ອມແທ້ໆ ໂດຍເຫັນໄດ້ຈາກໂຄງການກໍ່ສ້າງທາງດ່ວນນະຄອນຫລວງວຽງຈັນ-ບໍ່ເຕັນ, ແຂວງຫລວງນໍ້າທາ ທີ່ແບ່ງອອກເປັນ 4 ຊ່ວງ (4ໄລຍະທາງ)ແຕ່ປະຈຸບັນກໍ່ສ້າງສໍາເລັດພຽງໄລຍະທີ 1 (ຈາກນະຄອນຫລວງວຽງຈັນ-ວັງວຽງ) ເທົ່ານັ້ນເຊີ່ງສະແດງໃຫ້ເຫັນວ່າຜູ້ທີ່ຈະພັດທະນາທາງດ່ວນຕ້ອງມີຄວາມພ້ອມທຸກດ້ານແທ້. ດັ່ງນັ້ນຈຶ່ງເຮັດໃຫ້ໂຄງການທາງດ່ວນນະຄອນຫລວງວຽງຈັນ-ຫົວພັນ ຍັງບໍ່ມີຄວາມຄືບໜ້າແຕ່ຢ່າງໃດໃນຕອນນີ້.

ໂຄງການທາງດ່ວນນະຄອນຫລວງວຽງຈັນ-ຫົວພັນ ໄດ້ເຊັນບົດບັນທຶກຄວາມເຂົ້າໃຈ (MOU) ເພື່ອສຶກສາຄວາມເປັນໄປໃນວັນທີ 4 ເມສາ 2022 ຜ່ານມາທີ່ນະຄອນຫລວງວຽງຈັນ ລະຫວ່າງ ກະຊວງແຜນການ ແລະການລົງທຶນ ກັບ ບໍລິສັດ ນານາຊິນ ຈຳກັດຜູ້ດຽວ ແລະບໍລິສັດ BIG BROTHER 456 COMPANY LIMITED.

ໂຄງການດັ່ງກ່າວ ຈະແບ່ງອອກເປັນ3 ໄລຍະຄື: ໄລຍະທີ 1 ແຕ່ຫຼັກ 21 ເມືອງໄຊທານີ ນະຄອນຫຼວງວຽງຈັນ ຫາ ເມືອງອະນຸວົງ ແຂວງໄຊສົມບູນ, ໄລຍະ 2 ແຕ່ເມືອງອານຸວົງ ແຂວງໄຊສົມບູນ ຫາ ເມືອງແປກ ແຂວງຊຽງຂວາງ ແລະ ໄລຍະທີ 3 ແຕ່ເມືອງແປກ ແຂວງຊຽງຂວາງ ຫາ ຫົວເມືອງ ແຂວງຫົວພັນ ໃນຮູບແບບ BOT.
ທີ່ມາ: FM90

แชร์