ຖ້າຮ່າງກົດໝາຍວ່າດ້ວຍທະນາຄານທຸລະກິດ(ສະບັບປັບປຸງ) ຖືກຮັບຮອງຈະເຮັດໃຫ້ຂໍ້ກໍານົດການແລກປ່ຽນເງິນຕາສອດຄ່ອງກັບກົດໝາຍ

ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ຂຶ້ນສະເໜີຮ່າງກົດໝາຍວ່າດ້ວຍທະນາຄານທຸລະກິດ (ສະບັບປັບປຸງ) ຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ໃນວັນທີ 12 ກໍລະກົດນີ້ວ່າ: ກົດໝາຍສະບັບນີ້ ປະກອບມີທັງໝົດ 12 ພາກ, 14 ໝວດ ແລະ 114 ມາດຕາ ໃນນັ້ນ, ໄດ້ເພີ່ມເຂົ້າໃໝ່ 1 ພາກ ແລະ 8 ມາດຕາ, ໄດ້ປັບປຸງຮຽບຮຽງເນື້ອໃນເກົ່າຄືນໃໝ່ 51 ມາດຕາ ແລະຮັກສາເນື້ອໃນເກົ່າໄວ້ 55 ມາດຕາ (ທຽບກັບກົດໝາຍສະບັບເກົ່າ ມີ 11 ພາກ, 14 ໝວດ ແລະ 106 ມາດຕາ). ໃນໄລຍະຜ່ານມາ, ກົດໝາຍດັ່ງກ່າວ ໄດ້ຮັບການປັບປຸງແລ້ວ 1 ຄັ້ງ ໃນປີ 2006 ເຊິ່ງສະບັບປະຈຸບັນ ແມ່ນສະບັບເລກທີ 56/ສພຊ, ລົງວັນທີ 7 ທັນວາ 2018. ການປັບປຸງດັ່ງກ່າວ, ແນໃສ່ຮອງຮັບການຄຸ້ມຄອງທະນາຄານທຸລະກິດ ຕາມຫລັກການຕົ້ນຕໍ ຄື: ການຄຸ້ມຄອງທະນາຄານທີ່ມີປະສິດທິພາບ ແລະຕາມມາດຕະຖານບາເຊວ 2 (Basel 2).

ຖ້າຮ່າງກົດໝາຍສະບັບນີ້ ໄດ້ຖືກຮັບຮອງ ແລະເຂົ້າສູ່ການຈັດຕັ້ງປະຕິບັດຕົວຈິງສາມາດຄາດຄະເນຜົນໄດ້ຮັບດັ່ງນີ້:
- ຈະເຮັດໃຫ້ຂອດການສ້າງຕັ້ງ ຫລືຂໍອະນຸຍາດດຳເນີນທຸລະກິດການທະນາຄານສອດຄ່ອງກັບກົດໝາຍວ່າດ້ວຍວິສາຫະກິດ (ສະບັບປັບປຸງ);
- ຈະເຮັດໃຫ້ທະນາຄານທຸລະກິດ ທົ່ວລະບົບມີທຶນຈົດທະບຽນ ຫລືເງິນລົງທຶນຕໍ່າສຸດເພີ່ມຂຶ້ນເຊິ່ງຈະເຮັດໃຫ້ທະນາຄານມີຖານະການເງິນທີ່ເຂັ້ມແຂງຍິ່ງຂຶ້ນ;
- ຈະຊ່ວຍໃຫ້ການປ່ຽນແປງສະຖານະຂອງທະນາຄານທຸລະກິດມີບ່ອນອີງໃນການຈັດຕັ້ງປະຕິບັດ, ທັງຊ່ວຍໃຫ້ມີຄວາມສະດວກ ແລະວ່ອງໄວຂຶ້ນກວ່າເກົ່າ;
- ຈະເຮັດໃຫ້ຂໍ້ກໍານົດກ່ຽວກັບການແລກປ່ຽນເງິນຕາ ສອດຄ່ອງກັບກົດໝາຍວ່າດ້ວຍການຄຸ້ມຄອງເງິນຕາຕ່າງປະເທດ (ສະບັບປັບປຸງ)
- ຈະເຮັດໃຫ້ຂະບວນການແກ້ໄຂທະນາຄານທຸລະກິດທີ່ຢູ່ໃນພາວະວິກິດ ການຍຸບເລີກ ແລະການລົ້ມລະລາຍຂອງທະນາຄານທຸລະກິດ ມີບ່ອນອີງທີ່ຄົບຖ້ວນ ແລະຊັດເຈນຍິ່ງຂຶ້ນ, ທັງມີຄວາມຄ່ອງຕົວ ແລະມີບ່ອນອີງສະເພາະສໍາລັບການເຄື່ອນໄຫວ ຂອງທະນາຄານທຸລະກິດ ແລະສະມາຄົມທະນາຄານລາວ.

แชร์