ທົ່ວປະເທດມີທະນາຄານທຸລະກິດ 42 ແຫ່ງ ແລະ 538 ໜ່ວຍບໍລິການ

ໃນວັນທີ 12 ກໍລະກົດນີ້, ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ກ່າວບາງຕອນໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ວ່າ: ທະນາຄານທຸລະກິດ ໃນ ສປປ ລາວ ມີທັງໝົດ ຈໍານວນ 42 ແຫ່ງ ໃນນັ້ນ ປະກອບມີທະນາຄານທຸລະກິດລັດ 01 ແຫ່ງ, ທະນາຄານ ສະເພາະກິດ 01 ແຫ່ງ, ທະນາຄານລັດຮ່ວມທຶນ 05 ແຫ່ງ, ທະນາຄານເອກະຊົນ 08 ແຫ່ງ, ທະນາຄານທຸລະກິດທີ່ເປັນບໍລິສັດລູກຂອງທະນາຄານທຸລະກິດຕ່າງປະເທດ 08 ແຫ່ງ ແລະ ສາຂາທະນາຄານທຸລະກິດຕ່າງປະເທດ 19 ແຫ່ງ. ພ້ອມນັ້ນ, ຍັງມີສາຂາທະນາຄານທຸລະກິດ ຈຳນວນ 114 ສາຂາ, 538 ໜ່ວຍບໍລິການ ແລະຕູ້ ATM ຈຳນວນ 1.496 ຕູ້.

ທະນາຄານທຸລະກິດທົ່ວລະບົບມີການເຕີບໂຕຢ່າງຕໍ່ເນື່ອງໄລຍະ 5 ເດືອນຕົ້ນປີ 2023, ມີຊັບສິນທັງໝົດເພີ່ມຂຶ້ນ 33,25% ທຽບໃສ່ໄລຍະດຽວກັນຂອງປີຜ່ານມາ ແລະ ເພີ່ມຂຶ້ນ 11,93% ທຽບໃສ່ທ້າຍປີ 2022, ສາມາດລະດົມເງິນຝາກໄດ້ເພີ່ມຂຶ້ນ 28,78% ທຽບໃສ່ໄລຍະດຽວກັນຂອງປີຜ່ານມາ ແລະເພີ່ມຂຶ້ນ 9,22% ທຽບໃສ່ທ້າຍປີ 2022 ແລະສິນເຊື່ອ ເພີ່ມຂຶ້ນ 32,77% ທຽບໃສ່ໄລຍະດຽວກັນຂອງປີຜ່ານມາ ແລະເພີ່ມຂຶ້ນ 7,39% ທຽບໃສ່ທ້າຍປີ 2022.

แชร์