ມະຫາອຳນາດໃໝ່! ອິນເດຍກຽມກ້າວຂຶ້ນເປັນ ປະເທດທີ່ມີຂະໜາດເສດຖະກິດໃຫຍ່ທີ່ສຸດເປັນອັນດັບ 2 ຂອງໂລກ ແຊງໜ້າ ອາເມຣິກາ ເປັນຮອງພຽງຈີນ

ຊຶ່ງລາຍງານສະບັບຫຼ້າສຸດຂອງ Goldman Sachs ທະນາຄານທຸລະກິດແຫ່ງການລົງທຶນລາຍໃຫຍ່ຂອງໂລກຈາກສະຫະລັດອາເມຣິກາ ເຜີຍໃຫ້ເຫັນວ່າອິນເດຍຈະກາຍເປັນປະເທດທີ່ມີເສດຖະກິດໃຫຍ່ເປັນອັນດັບ 2 ຂອງໂລກ ຮອງຈາກຈີນພາຍໃນປີ 2075, ແຊງໜ້າສະຫະລັດອາເມຣິກາ, ຍີ່ປຸ່ນ ແລະເຢຍລະມັນ.

ໂດຍປັດຈຸບັນ, ອິນເດຍເປັນປະເທດທີ່ມີເສດຖະກິດໃຫຍ່ອັນດັບ 5 ໃນໂລກຮອງຈາກເຢຍລະມັນທີ່ເປັນອັນ 4, ຍີ່ປຸ່ນ ອັນດັບ 3, ຈີນອັນດັບ 2 ແລະ ສະຫະລັດອາເມຣິກາ ອັນດັບ 1.

ການປະເມີນຄັ້ງໃໝ່ຂອງ Goldman Sachs ໃນຄັ້ງນີ້ເກີດຂຶ້ນທ່າມກາງການເພີ່ມຂຶ້ນຂອງປະຊາກອນອິນເດຍທີ່ປັດຈຸບັນມີປະຊາກອນຫຼາຍທີ່ສຸດເປັນອັນດັບ 1 ຂອງໂລກ ແຊງໜ້າຈີນ ທີ່ຄອງຕຳແໜ່ງນີ້ມາເປັນເວລາຫຼາຍທົດສະວັດ ບວກກັບຄວາມກ້າວໜ້າທາງດ້ານນະວັດຕະກໍາ ແລະເທັກໂນໂລຢີການລົງທຶນທີ່ສູງຂຶ້ນ ແລະ ປະສິດທິພາບການຜະລິດຂອງກໍາລັງແຮງງານທີ່ເພີ່ມຂຶ້ນຂອງອິນເດຍເຮັດໃຫ້ Goldman Sachs ປະເມີນວ່າອິນເດຍຈະກ້າວຂຶ້ນມາມີບົດບາດສໍາຄັນໃນເສດຖະກິດໂລກພາຍໃນປີ 2075.

ຂໍ້ມູນຈາກ Nasscom ສະມາຄົມການຄ້ານອກພາກລັດຂອງອິນເດຍເຜີຍໃຫ້ເຫັນວ່າລາຍຮັບຈາກອຸດສາຫະກຳເທັກໂນໂລຢີຂອງອິນເດຍຄາດວ່າຈະເພີ່ມຂຶ້ນ 245 ຕື້ໂດລາໃນທ້າຍປີ 2023.

ຂະນະທີ່ Santanu Sengupta, ນັກເສດຖະສາດອິນເດຍຂອງ Goldman Sachs Research, ກ່າວວ່າ, “ໃນສອງທົດສະວັດຂ້າງໜ້າ, ອັດຕາສ່ວນການເພິ່ງພາອາໄສຂອງອິນເດຍ (Dependency Ratio) ຫຼືຈໍານວນຄົນທີ່ບໍ່ມີການເຄື່ອນໄຫວທາງດ້ານເສດຖະກິດຕໍ່ກັບຈໍານວນຄົນໃນອາຍຸການເຮັດວຽກທາງດ້ານເສດຖະກິດ ຈະຕ່ຳທີ່ສຸດໃນພາກພື້ນດັ່ງກ່າວ”.

ທ່ານ Sengupta ກ່າວຕື່ມວ່າ ປັດໄຈສໍາຄັນໃນການດຶງສັກກະຍະພາບ ຂອງປະຊາກອນທີ່ເພີ່ມຂຶ້ນຢ່າງໄວວາຂອງອິນເດຍ ແມ່ນການສົ່ງເສີມການມີສ່ວນຮ່ວມຂອງກໍາລັງແຮງງານ.

ຖະບານອິນເດຍຍັງໄດ້ສຸມໃສ່ການກໍ່ສ້າງພື້ນຖານໂຄງລ່າງ. ໂດຍສະເພາະການກໍ່ສ້າງທາງ ແລະລົດໄຟງົບປະມານຫຼ້າສຸດຂອງປະເທດມີເປົ້າໝາຍເພື່ອຈັດຕັ້ງປະຕິບັດໂຄງການກູ້ຢືມແບບບໍ່ມີດອກເບ້ຍ 50 ປີໃຫ້ແກ່ອຳນາດການປົກຄອງສ່ວນທ້ອງຖິ່ນ ເພື່ອກະຕຸ້ນການລົງທຶນໃນພື້ນຖານໂຄງລ່າງ.

ນອກຈາກນີ້ສະຖານະ ແລະຈຸດຢືນທາງດ້ານການເມືອງລະຫວ່າງປະເທດຂອງອິນເດຍທີ່ດຳເນີນນະໂຍບານເປັນກາງມາຕະຫຼອດທ່າມກາງຄວາມຂັດແຍ້ງລະຫວ່າງໂລກຕາເວັນຕົກ ແລະ ຕາເວັນອອກ ທີ່ເຄັ່ງຕຶງຂຶ້ນທຸກມື້ ກໍເປັນອີກໜຶ່ງສິ່ງທີ່ເປັນທ່າແຮງສຳຄັນໃນການຊຸກຍູ້ໃຫ້ເສດຖະກິດອິນເດຍມີການຈະເລີນເຕີບໂຕຢູ່ຕະຫຼອດ.
ດ້ວຍສະຖານະທາງການເມືອງລະຫວ່າງປະເທດ-ພາຍໃນ ແລະນະໂຍບາຍຕ່າງໆ ຂອງທາງລັດຖະບານອິນເດຍ ແລະຄວາມຮູ້ຄວາມສາມາດຂອງຄົນອິນເດຍ ເຮັດໃຫ້ບໍລິສັດຜູ້ນຳດ້ານເທັກໂນໂລຢີຫຼາຍໆບໍລິສັດຍັກໃຫຍ່ຂອງໂລກ ຕ່າງຫັນມາລົງທຶນໃນອິນເດຍ ເຊັ່ນ: Microsoft, Apple, IBM, Google, Amazon ແລະ ອື່ນໆອີກຫຼາຍບໍລິສັດຈຶ່ງບໍ່ແປກທີ່ອິນເດຍຈະກ້າວຂຶ້ນມາເປັນຜູ້ນຳດ້ານເທັກໂນໂລຢີ ແລະເສດຖະກິດໂລກໃນອະນາຄົດ.
ທີ່ມາ: Lao X

แชร์