ເຈົ້າແຂວງໄຊຍະບູລີ ລົງກວດກາສະຖານທີ່ກໍ່ສ້າງສະໜາມບິນຢູ່ເມືອງທົ່ງມີໄຊ

ໃນວັນທີ 11 ກໍລະກົດ,ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ ພ້ອມຄະນະໄດ້ລົງກວດກາສະຖານທີ່ຈະກໍ່ສ້າງສະໜາມບິນຢູ່ເມືອງທົ່ງມີໄຊ.
ສະຖານທີ່ຈະກໍ່ສ້າງສະໜາມບິນຕັ້ງຢູ່ຂອບເຂດບ້ານໃຫຍ່ ເມືອງທົ່ງມີໄຊ, ມີເນື້ອທີ່ 19.739 ຕາແມັດ, ດິນດັ່ງກ່າວເປັນດິນທີ່ລັດຄຸ້ມຄອງ, ໂດຍມີຈຸດປະສົງເພື່ອຈະສ້າງໃຫ້ເປັນສະໜາມບິນຮອງຮັບການຂຶ້ນ-ລົງຂອງຍົນໃນການຂົນສົ່ງອຸປະກອນທາງການທະຫານໄດ້ສະດວກ ແລະວ່ອງໄວ.

ຈາກນັ້ນ, ທີມງານຂອງທ່ານເຈົ້າແຂວງກໍໄດ້ລົງກວດກາເບິ່ງນໍ້າລິນຢູ່ຄ້າຍທະຫານກອງຮ້ອຍ 2 ຂຶ້ນກັບກອງພັນ 411 ກອງບັນຊາການທະຫານແຂວງໄຊຍະບູລີ, ການກໍ່ສ້າງໄດ້ເລີ່ມລົງມືແຕ່ທ້າຍເດືອນ ພຶດສະພາ 2023 ຮອດປະຈຸບັນການກໍ່ສ້າງແມ່ນສໍາເລັດ 100%, ມີຄວາມຍາວແຕ່ຫົວງານຫາອ່າງເກັບນໍ້າ 1.000 ກວ່າແມັດ, ມີ 2 ອ່າງເກັບນໍ້າ, ແຕ່ລະອ່າງ ມີຂະໜາດ 2x2,5 ແມັດ, ສູງ 1,5 ແມັດ, ນໍ້າດັ່ງກ່າວແມ່ນພຽງພໍກັບຄວາມຕ້ອງການຂອງຄ້າຍທະຫານ, ນອກຈາກນໍາໃຊ້ເຂົ້າໃນການບໍລິໂພກແລ້ວຍັງສາມາດນໍາໃຊ້ເຂົ້າໃນການຜະລິດໄດ້ຕື່ມອີກ, ມູນຄ່າການກໍ່ສ້າງທັງໝົດເກືອບ 60 ລ້ານກີບ, ໂດຍແມ່ນແຮງງານພາຍໃນກົມກອງເປັນຜູ້ກໍ່ສ້າງ, ໂອກາດດຽວກັນຍັງໄດ້ລົງເບິ່ງສະຖານທີ່ຈະກໍ່ສ້າງສວນອະນຸລັກຊ້າງເຂດປ່າສະຫງວນແຫ່ງຊາດນໍ້າປຸ້ຍຕື່ມອີກ.
(ຂ່າວ-ພາບ: ອຸ່ນເຮືອນ ໂພທິລັກ)

แชร์