ຍຸດທະສາດ ແລະວິໄສທັດ ທີ່ຈະເຮັດໃຫ້ແຮ່ທາດມີຄວາມຍືນຍົງ

ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ໄດ້ຖະແຫລງຜົນການພິຈາລະນາຮ່າງຍຸດທະສາດການພັດທະນາແຮ່ທາດ 10 ປີ (2021- 2030) ແລະ ວິໄສທັດ ຮອດປີ 2035 ໃນກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 11 ກໍລະກົດ 2023 ນີ້ວ່າ: ເພື່ອເຮັດໃຫ້ການຈັດຕັ້ງປະຕິບັດ ວຽກງານແຮ່ທາດ ເຊິ່ງເປັນຊັບພະຍາກອນ ທີ່ມີຈໍາກັດ ໃຫ້ມີຄວາມຍືນຍົງນັ້ນ, ຍຸດທະສາດ ແລະວິໄສທັດ ກ່ຽວກັບວຽກງານແຮ່ທາດ ຈໍາເປັນຕ້ອງເນັ້ນໃສ່ ການຈັດສັນປະເພດແຮ່ທາດ ທີ່ມີຄຸນຄ່າສູງ ແລະຫາຍາກ, ກໍານົດແຈ້ງກ່ຽວກັບເຂດຫວງຫ້າມ, ເຂດຍຸດທະສາດທີ່ຈະຮັກສາໄວ້ຍາວນານເພື່ອລູກຫລານໃນອະນາຄົດ ຊຶ່ງໃນນັ້ນ:

1). ຕ້ອງມີການສໍາຫລວດປະເມີນປະລິມານການສະສົມຂອງແຮ່ທາດ ແລະຕ້ອງສຶກສາຄົ້ນຄວ້າລວບລວມຂໍ້ມູນຢ່າງລະອຽດເພື່ອກໍານົດທິດທາງແຜນການຂຸດຄົ້ນ ໃຫ້ມີປະສິດທິພາບ ແລະຍືນຍົງ.
2). ລັດຖະບານຕ້ອງໄດ້ຄົ້ນຄວ້າຈັດສັນແຫລ່ງທຶນ ເຂົ້າໃນວຽກງານສໍາຫລວດສ້າງແຜນທີ່ທໍລະນີສາດ-ແຮ່ທາດ ເພື່ອເປັນຂໍ້ມູນ ໃນການປະເມີນປະສິດທິຜົນທາງເສດຖະກິດ ແລະກໍານົດເຂດສະຫງວນ-ເຂດຫວງຫ້າມຕ່າງໆ.
3). ຕ້ອງໄດ້ຄົ້ນຄວ້າຊອກຫາວິທີການນໍາເອົາແຮ່ທາດມາປຸງແຕ່ງຄືນເພື່ອຫລຸດຜ່ອນຄວາມຕ້ອງການໃນການຂຸດຄົ້ນໃໝ່ ແລະຮັກສາແຫລ່ງຊັບພະຍາກອນໃຫ້ສາມາດນໍາໃຊ້ໄດ້ໃນໄລຍະຍາວ.

ສ່ວນການກໍານົດເນື້ອໃນຂອງຍຸດທະສາດ ແລະ ວິໄສທັດການຄຸ້ມຄອງແຮ່ທາດຕ້ອງມີຄວາມຊັດເຈນກ່ຽວກັບການແບ່ງຂັ້ນຄຸ້ມຄອງໂດຍໃຫ້ສູນກາງກໍຄືກະຊວງພະລັງງານ ແລະບໍ່ແຮ່ເປັນຜູ້ຄຸ້ມຄອງມະຫາພາກສ່ວນທ້ອງຖິ່ນເປັນຜູ້ຈັດຕັ້ງປະຕິບັດໂດຍສະເພາະໂຄງການພັດທະນາແຮ່ທາດທີ່ມີມູນຄ່າສູງ, ມີຂະໜາດໃຫຍ່ ແລະ ເປັນໂຄງ ການທີ່ຕິດພັນກັບຫລາຍຂະແໜງການ ຕ້ອງໄດ້ຜ່ານການພິຈາລະນາອະນຸມັດຈາກສະພາແຫ່ງຊາດ ແລະສະພາປະຊາຊົນຂັ້ນແຂວງເຊິ່ງເປັນອົງການຕົວແທນແຫ່ງ ສິດ ແລະຜົນປະໂຫຍດ ຂອງປະຊາຊົນບັນດາເຜົ່າເພື່ອສ່ອງແສງໃຫ້ເຫັນເຖິງຄວາມເປັນເຈົ້າຂອງປະເທດຊາດ ຂອງປະຊາຊົນບັນດາເຜົ່າ (ຄວນມີນິຕິກໍາລະອຽດຕື່ມ).

ສໍາລັບການໃຫ້ສິດຕົກລົງອະນຸມັດໂຄງການພັດທະນາແຮ່ທາດຕ້ອງສອດຄ່ອງກັບສະພາບຄວາມເປັນຈິງຕ້ອງມີການຄັດເລືອກເອົາບໍລິສັດໃຫຍ່ທີ່ມີຄວາມໜ້າເຊື່ອຖື, ມີປະສົບການ ແລະມີຄວາມຊໍານິຊຳນານເຂົ້າມາລົງທຶນ.

ທີ່ມາ: ຂປລ

แชร์