ເງິນກີບຈະກັບມາແຂງຄ່າໄດ້ ຫາກຮ່ວມກັນຕິດລາຄາສິນຄ້າເປັນເງິນກີບ ແລະ ແລກປ່ຽນເງິນຜ່ານທະນາຄານ.

ທ່ານ ບຸນເຫຼືອ ສິນໄຊວໍຣະວົງ, ຜູ້ວ່າການທະນາຄານແຫ່ງ ສປປ ລາວ (ທຫລ) ຂຶ້ນຊີ້ແຈງຕໍ່ບັນດາຄຳຊັກຖາມຂອງ ສສຊ ວ່າ: ໃນ 6 ເດືອນທ້າຍປີ 2023 ຄາດວ່າສະພາບເສດຖະກິດ-ການເງິນໃນສາກົນ ຈະຍັງສືບຕໍ່ຜັນແປຢ່າງສັບສົນ, ອັດຕາເງິນເຟີ້ຍັງຈະຢູ່ໃນລະດັບສູງ ແລະ ຜົນກະທົບຈາກບັນຫາຄວາມຂັດແຍ່ງລະຫວ່າງປະເທດມະຫາອໍານາດໃນໂລກ; ຈຶ່ງເຮັດໃຫ້ການບັນລຸໄດ້ບາງຄາດໝາຍແຜນເງິນຕາ ທີ່ໄດ້ກຳນົດໄວ້ໃນມະຕິສະພາແຫ່ງຊາດນັ້ນ ມີຄວາມທ້າທາຍສູງ.

ແຕ່ເຖິງຢ່າງໃດກໍ່ຕາມ, ເຫັນວ່າສະພາບການພາຍໃນ ຍັງມີປັດໄຈທີ່ເປັນທ່າແຮງທີ່ຊ່ວຍຍູ້ແຮງໃຫ້ເສດຖະກິດ ຄາດວ່າຈະເຕີບໂຕເກີນ 4,5% ເປັນຕົ້ນ: ການເປີດປະເທດຈະຊ່ວຍດຶງດູດນັກທ່ອງທ່ຽວເຂົ້າມາເພີ່ມຂຶ້ນ; ການຜະລິດກະສິກຳສົ່ງອອກມີລັກສະນະຟົດຟື້ນ; ການສົ່ງອອກແຮ່ທາດບາງຊະນິດເພີ່ມຂຶ້ນ ເປັນຕົ້ນ: ແຮ່ເກືອໂປຕັສ, ການປັບປຸງລະບົບຂົນສົ່ງຜ່ານທາງລົດໄຟ ລາວ-ຈີນ, ລະບົບຂົນສົ່ງຜ່ານແດນ ແລະ ລະບົບໂລຈີສະຕິກ ຊຶ່ງປັດໄຈເຫຼົ່ານີ້ຈະຊ່ວຍດູດເງິນຕາໄຫຼເຂົ້າສູ່ລະບົບເສດຖະກິດໃຫ້ຫຼາຍຂຶ້ນກວ່າປີຜ່ານມາ.

ທະນາຄານແຫ່ງ ສປປ ລາວ ຈະສືບຕໍ່ການຮັກສາສະຖຽນລະພາບທາງດ້ານເງິນຕາ ດ້ວຍການດຳເນີນນະໂຍບາຍເງິນຕາໃນທິດທາງທີ່ຮັດກຸມຫຼາຍຂຶ້ນ ຄື:

1 ສຸມໃສ່ປັບປຸງ ແລະ ຈັດຕັ້ງປະຕິບັດກົນໄກການຄຸ້ມຄອງເງິນຕາຕ່າງປະເທດ ຂອງ ສປປ ລາວ ໃຫ້ມີປະສິດທິຜົນ ດ້ວຍການສ້າງເງື່ອນໄຂ ແລະ ສະພາບແວດລ້ອມ ໃຫ້ມີການສະໜອງເງິນຕາຕ່າງປະເທດເຂົ້າມາໃນລະບົບເສດຖະກິດຫຼາຍຂື້ນ ແລະ ຈໍາກັດການແລກປ່ຽນເງິນຕາແບບຊະຊາຍ;

2 ສືບຕໍ່ຄວບຄຸມປະລິມານ ເງິນໃຫ້ຂະຫຍາຍຕົວໃນຈັງຫວະທີ່ເໝາະສົມ ເພື່ອຄວບຄຸມເງິນເຟີ້;

3 ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດໃຫ້ຮັດກຸມຍິ່ງຂຶ້ນ;

4 ພັດທະນາເຄື່ອງມືຊຳລະພາຍໃນ ແລະ ລະຫວ່າງປະເທດໃຫ້ທັນສະໄໝ ແລະ ຮັບປະກັນຄວາມປອດໄພ;

5 ເພີ່ມທະວີການສົມທົບກັບຂະແໜງການກ່ຽວຂ້ອງໃຫ້ຫຼາຍຂຶ້ນ ເປັນຕົ້ນ: ພັດທະນາລະບົບແລກປ່ຽນຂໍ້ມູນຂ່າວສານກັບສື່ມວນຊົນ ແລະ ບູລະນະກົນໄກການປະສານງານ ກໍ່ຄືການເຊື່ອມໂຍງຖານຂໍ້ມູນກັບຂະແໜງການທີ່ກ່ຽວຂ້ອງໃຫ້ເປັນລະບົບປົກກະຕິ, ສອດຄ່ອງ ແລະ ມີປະສິດທິຜົນຫຼາຍຂຶ້ນ.

ທະນາຄານແຫ່ງ ສປປ ລາວ ຂໍຮຽກຮ້ອງໃຫ້ບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາແຂວງເປັນເຈົ້າການຊ່ວຍຊຸກຍູ້ພາກທຸລະກິດ, ຕະຫຼອດຮອດປະຊາຊົນໃນການສຶກສາອົບຮົມ, ຕິດຕາມ, ກວດກາ ແລະ ສົ່ງເສີມການນຳໃຊ້ເງິນກີບ, ຖືຄອງຮັກສາເງິນຕາຕ່າງປະເທດດ້ວຍການຝາກກັບລະບົບທະນາຄານ ແລະ ຄຸ້ມຄອງເງິນຕາຕ່າງປະເທດ ເປັນຕົ້ນ: ການຕິດປ້າຍລາຄາ ແລະ ການຊຳລະຄ່າສິນຄ້າ ແລະ ການບໍລິການເປັນເງິນກີບ ໂດຍສະເພາະບັນດາແຂວງ ແລະ ເມືອງທີ່ເລາະລຽບຕາມຊາຍແດນ, ຊຶ່ງເຫັນວ່າຕ້ອງໄດ້ຈັດຕັ້ງປະຕິບັດການໂຄສະນາຂົນຂວາຍໃຫ້ປະຊາຊົນຮັບຮູ້ ແລະ ຮູ້ໃນຄຸນຄ່າຂອງເງິນກີບ. ພ້ອມທັງຊຸກຍູ້ສັງຄົມໃຫ້ແລກປ່ຽນເງິນຕາກັບທະນາຄານທຸລະກິດເທົ່ານັ້ນ ແລະ ສົ່ງເສີມການຊົມໃຊ້ສິນຄ້າຜະລິດພາຍໃນ ເພື່ອຫຼຸດຜ່ອນຄວາມຕ້ອງການເງິນຕາຕ່າງປະເທດ ໂດຍບໍ່ຈຳເປັນ.

ທີ່ມາ: Targetmagazine

แชร์