6 ເດືອນຕົ້ນປີ ທຫລ ນໍາໃຊ້ 6 ມາດຕະການ ເພື່ອໃຫ້ອັດຕາເງິນເຟີ້ຢູ່ໃນເກນທີ່ເໝາະສົມ ແລະຄວບຄຸມໄດ້

ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ (ທຫລ) ໄດ້ຂຶ້ນຊີ້ແຈງຕໍ່ບັນດາຄຳຊັກຖາມຂອງບັນດາຜູ້ແທນສະມາຊິກສະພາແຫ່ງຊາດ (ສສຊ) ຈາກເຂດເລືອກຕັ້ງທົ່ວປະເທດໃນກອງປະຊຸມສະພາແຫ່ງຊາດ ສະໄໝສາມັນ ເທື່ອທີ 5 ຊຸດທີ IX ຂອງວັນທີ 28 ມິຖຸນາ ທີ່ຜ່ານມາວ່າ: ບັນຫາອັດຕາເງິນເຟີ້ຂອງ ສປປ ລາວ ເຊິ່ງມີຈຸດພິເສດທີ່ທິດສະດີການແກ້ໄຂບັນຫາເງິນເຟີ້ອັນລວມບໍ່ສາມາດນຳໃຊ້ແກ້ໄຂໄດ້ໝົດເນື່ອງຈາກ ສປປ ລາວ ມີການນຳເຂົ້າສິນຄ້າເຖິງ 70-80% ເຮັດໃຫ້ອັດຕາແລກປ່ຽນຕິດພັນກັບອັດຕາເງິນເຟີ້ໂດຍກົງຢ່າງຫຼີກລ່ຽງບໍ່ໄດ້ (ໃນນີ້, ຖ້າກໍລະນີອັດຕາແລກປ່ຽນອ່ອນຄ່າ 1% ຈະເຮັດໃຫ້ເງິນເຟີ້ເພີ່ມຂຶ້ນ 0.6%) ສົ່ງຜົນສະທ້ອນເຖິງການຂຶ້ນລາຄາສິນຄ້າຕາມອັດຕາແລກປ່ຽນເຊິ່ງພາກສ່ວນທີ່ກ່ຽວຂ້ອງຕ້ອງມີການຄວບຄຸມລາຄາສິນຄ້າບໍ່ໃຫ້ສູງຫຼາຍເກີນໄປ (ເຊັ່ນ: ຜູ້ຈຳໜ່າຍວາງລາຄາສິນຄ້າໄວ້ເພື່ອອັດຕາແລກປ່ຽນມີການເໜັງຕີງສູງເກີນຄວາມເປັນຈິງ) ຊຶ່ງຕ້ອງໄດ້ມີການຮ່ວມມືກັນຈາກຫຼາຍພາກສ່ວນທີ່ກ່ຽວຂ້ອງ ແລະ ທຫລ ກໍ່ຈະໄດ້ສຸມໃສ່ໜ້າທີ່ຫຼັກຂອງຕົນເພື່ອຄຸ້ມຄອງລາຍຮັບທີ່ເປັນເງິນຕາຕ່າງປະເທດໃຫ້ເຂົ້າສູ່ລະບົບທະນາຄານ ແລະຫຼຸດຜ່ອນລາຍຈ່າຍເງິນຕາຕ່າງປະເທດໃຫ້ໜ້ອຍລົງເພື່ອຊຸກຍູ້ວຽກງານຂອງພາກສ່ວນທີ່ກ່ຽວຂ້ອງ.

ຕົວເລກອັດຕາເງິນເຟີ້ແມ່ນຍັງເປັນສິ່ງທີ່ມີຄວາມທ້າທາຍສູງທີ່ຈະບັນລຸຕາມຄາດໝາຍທີ່ລັດຖະບານໄດ້ກໍານົດໄວ້ເຖິງແມ່ນວ່າໃນໄລຍະ 6 ເດືອນຕົ້ນປີ ທຫລ ຈະເອົາໃຈໃສ່ໃນການຄົ້ນຄວ້ານະໂຍບາຍ ແລະນໍາໃຊ້ຫຼາຍມາດຕະການ ເປັນຕົ້ນ:
1. ໄດ້ດໍາເນີນນະໂຍບາຍເງິນຕາໃນທິດທາງທີ່ຮັດກຸມຫຼາຍຂຶ້ນ;
2. ໄດ້ຂຶ້ນອັດຕາດອກເບ້ຍພື້ນຖານຂອງ ທຫລ ສະກຸນເງິນກີບ;
3. ໄດ້ຂຶ້ນອັດຕາເງິນແຮຝາກບັງຄັບທັງສະກຸນເງິນກີບ ແລະ ເງິນຕາຕ່າງປະເທດ;
4. ໄດ້ອອກຈໍາໜ່າຍພັນທະບັດ ທຫລ ໃຫ້ມວນຊົນໂດຍກົງ ແລະໃຫ້ທະນາຄານທຸລະກິດ ເພື່ອດູດເງິນອອກຈາກລະບົບເສດຖະກິດ;
5. ໄດ້ປັບກອບການກໍານົດອັດຕາຊື້-ຂາຍ ຂອງທະນາຄານທຸລະກິດທຽບໃສ່ອັດຕາອ້າງອີງຂອງ ທຫລ ໃຫ້ກວ້າງອອກ;
6. ດັດສົມເງິນຕາຕ່າງປະເທດໃຫ້ແກ່ສິນຄ້ານໍາເຂົ້າບຸລິມະສິດ ຄືນໍ້າມັນເຊື້ອໄຟ ແລະ ໄດ້ມີການດັດສົມຕື່ມ 6 ລາຍການສິນຄ້ານໍາເຂົ້າທີ່ເຫັນວ່າເປັນການນໍາເຂົ້າທີ່ຈໍາເປັນຮັບໃຊ້ການຜະລິດ.
ທີ່ມາ: Bank of the Lao PDR

แชร์