ນາຍົກ ຊີ້ແຈງບັນຫາລົດຂົນສົ່ງສິນຄ້າຕ່າງປະເທດເຂົ້າມາລາວໄດ້, ແຕ່ລົດລາວອອກໄປບໍ່ໄດ້

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ຊີ້ແຈງຕໍ່ຄໍາຊັກຖາມຂອງສະມາຊິກສະພາແຫ່ງຊາດກ່ຽວກັບບັນຫາລົດຂົນສົ່ງສິນຄ້າຈາກຕ່າງປະເທດສາມາດຂົນສົ່ງສິນຄ້າເຂົ້າມາເຖີງຈຸດໝາຍປາຍທາງຢູ່ລາວໄດ້ເຖີງທີ່, ແຕ່ກົງກັນຂ້າມລົດຂົນສົ່ງສິນຄ້າຈາກລາວບໍ່ສາມາດຂົນສົ່ງສິນຄ້າອອກໄປຕ່າງປະເທດໄດ້. ຕໍ່ບັນຫານີ້, ທ່ານນາຍົກລັດຖະມົນຕີ ໄດ້ຊີ້ແຈງວ່າ: ຕາມຫລັກການແລ້ວແມ່ນລາວເຮົາມີສັນຍາຂົນສົ່ງລະຫວ່າງສອງປະເທດໂດຍສະເພາະກັບຣາຊອານາຈັກໄທ ໄດ້ເຊັນສັນຍາກັນແລ້ວດ້ວຍການນໍາໃຊ້ລະບົບຫົວລາກ-ຫາງລາກ ເຊີ່ງເຮັດໄດ້ດີແມ່ນການຂົນສົ່ງແຕ່ຫ້ວຍຊາຍ, ແຂວງບໍ່ແກ້ວ ຫາ ບໍ່ເຕັນ, ແຂວງຫລວງນໍ້າທາ, ໃນນີ້ສິນຄ້າມາຈາກປະເທດໄທແມ່ນມາຈອດຢູ່ຂົວມິດຕະພາບລາວ-ໄທ ແຫ່ງທີ 4 ຈາກນັ້ນໄດ້ໃຊ້ລົດລາວເຮົາລາກແກ່ຈົນໄປຮອດບໍ່ຫານຊາຍແດນລາວ-ຈີນ, ແຕ່ຈຸດອື່ນໆ ຍັງບໍ່ສາມາດຈັດຕັ້ງປະຕິບັດໄດ້ ເຮັດໃຫ້ກະຊວງໂຍທາທິການ ແລະຂົນສົ່ງຕ້ອງສືບຕໍ່ປຶກສາຫາລືກັບປະເທດທີ່ກ່ຽວຂ້ອງເພື່ອແກ້ໄຂໃຫ້ໄດ້.

ສໍາລັບລົດຂົນສົ່ງສິນຄ້າທີ່ສາມາດເຂົ້າມາລາວໄດ້ນັ້ນແມ່ນໃນກໍລະນີລົດຂົນສົ່ງສິນຄ້າທີ່ບໍ່ສາມາດຄ່ຽນຖ່າຍໄດ້ ໂດຍສະເພາະແມ່ນສິນຄ້າໂຄງການ ເຊັ່ນ: ໂຄງການໄຟຟ້າ, ໂຄງການແຮ່ທາດ ແລະ ອື່ນໆ ເພາະຕ້ອງໄດ້ໃຊ້ພາຫະນະສະເພາະໃນການລາກແກ່, ແຕ່ໃນໄລຍະຜ່ານມາມີບາງກໍລະນີລົດດັ່ງກ່າວທີ່ເຂົ້າມາລາວມີການສວຍໂອກາດໃນທາງອື່ນຈິ່ງເຮັດໃຫ້ເກີດມີປະກົດການຜີບ້ານພ້ອມຜີປ່າ ກໍຄືມີຜູ້ປະກອບການຂອງລາວໄປຊົມໃຊ້ການບໍລິການຂອງເຂົາເຈົ້າເພາະມີລາຄາຖືກ.

ທ່ານນາຍົກລັດຖະມົນຕີ ຊີ້ແຈງຕື່ມວ່າ: ຄວາມຈິງແລ້ວເບື້ອງລັດເຮົາເອງຕ້ອງໄດ້ຄຸ້ມຄອງວ່າລົດຂົນສົ່ງສິນຄ້າທີ່ເຂົ້າມາມີກໍານົດຈັກວັນຈິ່ງຈະອອກໄປ, ເຊີ່ງທາງດ່ານ ແລະ ພາກສ່ວນທີ່ຮັບຜິດຊອບການຂົນສົ່ງຕ້ອງໄດ້ໃຊ້ລະບົບການຕິດຕາມຕື່ມອີກ, ພ້ອມນີ້ຕ້ອງໄດ້ສຶກສາອົບຮົມຜູ້ປະກອບການພາຍໃນຂອງລາວໃຫ້ນໍາໃຊ້ການຂົນສົ່ງທີ່ຖືກຕ້ອງ.

ຢ່າງໃດກໍຕາມ, ໃນເບື້ອງຊາຍແດນທາງທິດຕາເວັນອອກຂອງລາວເຮົາຍັງບໍ່ສາມາດຈໍາກັດໄດ້ເນື່ອງຈາກບາງພາຫະນະບໍ່ພຽງພໍຮັບໃຊ້ເຮັດໃຫ້ມີຄວາມຈໍາເປັນຕ້ອງໄດ້ຢືມພາຫະນະຈາກຫວຽດນາມເຂົ້າມາຂົນສົ່ງໂດຍສະເພາະໂຄງການແຮ່ທາດຕ່າງໆ, ເຊີ່ງໃນຕໍ່ໜ້າຕ້ອງໄດ້ຫລຸດຜ່ອນ ແລະບັງຄັບໃຫ້ເຂົາເຈົ້າເຂົ້າມາຈົດທະບຽນບໍລິການຂົນສົ່ງ ແລະເສຍອາກອນການຂົນສົ່ງຕາມກົດໝາຍຂອງລາວ. ນອກຈາກນີ້ຕ້ອງໄດ້ປັບປຸງບັນດາສະມາຄົມຂົນສົ່ງຂອງລາວໃຫ້ມີພາຫະນະໄດ້ມາດຕະຖານສາມາດ ແລະພຽງພໍກັບຄວາມຕ້ອງການ.

ທີ່ມາ: FM90

• 11/07/2023