ກົດໝາຍວ່າດ້ວຍສາທາລະນະສຸກ ຈະເຮັດໃຫ້ວຽກງານສາທາເປັນລະບົບ ແລະມີຄຸນນະພາບ

ທ່ານ ບຸນແຝງ ພູມະໄລສິດ ລັດຖະມົນຕີກະຊວງສາທາລະນະສຸກລາຍງານຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດຊຸດທີ IX ໃນວັນທີ 11 ກໍລະກົດ 2023 ນີ້ວ່າ: ພາຍຫລັງກົດໝາຍວ່າດ້ວຍສາທາລະນະສຸກ ຖືກຮັບຮອງ ຈະເຮັດໃຫ້ວຽກ ງານສາທາລະນະສຸກ ໃນແຕ່ລະດ້ານ ໄດ້ຮັບການຈັດຕັ້ງປະຕິບັດ ຢ່າງເປັນລະບົບ, ຄ່ອງຕົວ, ມີປະສິດທິພາບ, ປະສິດທິຜົນ ແລະມີຄຸນນະພາບນັບແຕ່ສູນກາງລົງຮອດທ້ອງຖິ່ນ, ທັງຈະເຮັດໃຫ້ວຽກງານສາທາລະນະສຸກໃນແຕ່ລະດ້ານມີການພັດທະນາ, ຫັນເປັນທັນສະໄໝເທື່ອລະກ້າວ.

ກົດໝາຍວ່າດ້ວຍສາທາລະນະສຸກ:
- ຈະເປັນບ່ອນອີງໃຫ້ກະຊວງສາທາລະນະສຸກໃນການຄຸ້ມຄອງບໍລິຫານ, ວຽກງານອະນາໄມ, ກັນພະຍາດ, ປິ່ນປົວ ແລະຟື້ນຟູໜ້າທີ່ການ ແລະວຽກງານປິ່ນອ້ອມ ໃນການບໍລິຫານການປິ່ນປົວຄົນເຈັບໃຫ້ມີຄຸນນະພາບ, ໄດ້ຮັບຜົນ ແລະເປັນການພັດທະນາວຽກງານສາທາລະນະສຸກ ໃນແຕ່ລະໄລຍະໃຫ້ສອດຄ່ອງກັບນະໂຍບາຍຂອງ ພັກ-ລັດ;
- ເປັນເຄື່ອງມື ແລະມາດຕະການໃຫ້ແກ່ບຸກຄະລາກອນສາທາລະນະສຸກເຄື່ອນໄຫວວຽກງານຕາມໜ້າທີ່ສະເພາະຢ່າງຫ້າວຫັນປະກອບສ່ວນສຳຄັນໃຫ້ການພັດທະນາປະເທດຊາດ ແລະມີນໍ້າໃຈຮັບໃຊ້ປະຊາຊົນ, ອຳນວຍຄວາມສະດວກ ໃຫ້ແກ່ບຸກຄົນ, ນິຕິບຸກຄົນ, ອົງການຈັດຕັ້ງຂອງລັດ ແລະເອກະຊົນຢູ່ຕົວເມືອງ, ຊົນນະບົດ ໃຫ້ເຂົ້າຮ່ວມເປັນເຈົ້າການ ແລະມີສ່ວນຮ່ວມໃນວຽກງານສາທາລະນະສຸກ;
- ເຮັດໃຫ້ພະນັກງານແພດໝໍ ມີຄວາມເຂັ້ມງວດ, ທາງດ້ານຈັນຍາບັນ, ຈັນຍາທໍາໃນການບໍລິການປິ່ນປົວຄົນເຈັບ ເພື່ອຫລຸດຜ່ອນການເກີດພະຍາດ, ການເຈັບປ່ວຍ, ເສຍຊີວິດຂອງປະຊາຊົນ, ຫລຸດຜ່ອນຫາງສຽງຈົ່ມວ່າຈາກປະຊາຊົນ ແລະ ຫລຸດຜ່ອນປະຊາຊົນ ທີ່ຫລັ່ງໄຫລຂ້າມໄປປິ່ນປົວຢູ່ປະເທດໃກ້ຄຽງ;
- ເປັນມາດຕະການໃນການສູ້ຊົນໃຫ້ບັນລຸຄາດໝາຍ 11 ຕົວຊີ້ບອກ ຂອງຂະແໜງສາທາລະນະສຸກ.
ປະຈຸບັນ ກະຊວງສາທາລະນະສຸກ ໄດ້ມີກົດໝາຍ ຈຳນວນ 10 ສະບັບ ທີ່ເປັນກົດໝາຍສະເພາະ ໃນການຄຸ້ມຄອງດ້ານວິຊາການ ແລະ 3 ກົດໝາຍ ກໍາລັງສ້າງໃໝ່, ແຕ່ຍັງບໍ່ທັນໄດ້ມີກົດໝາຍລວມຂອງວຽກງານສາທາລະນະສຸກໂດຍກົງ ໃນການຄຸ້ມຄອງການຈັດຕັ້ງ, ການກໍານົດໜ້າວຽກ, ການແບ່ງຂັ້ນຄຸ້ມຄອງ, ການປົກປ້ອງສິດ, ຜົນປະໂຫຍດຂອງພະນັກງານແພດໝໍ ແລະປະຊາຊົນ.
ທີ່ມາ: ຂປລ

แชร์