ບໍລິຄໍາໄຊ ກຽມປ່ອຍປາ 3 ແສນກວ່າໂຕ

ທ່ານ ບຸນເພັງ ຈັນທະວົງສຸກ ຮອງຫົວໜ້າພະແນກກະສິກໍາ ແລະປ່າໄມ້ແຂວງບໍລິຄໍາໄຊ ໃຫ້ຮູ້ເມື່ອບໍ່ດົນມານີ້ວ່າ: ແຂວງບໍລິຄໍາໄຊກຽມປ່ອຍປາ ຈໍານວນ 382.000 ໂຕ ໃນໂອກາດວັນປ່ອຍປາ ແລະອະນຸລັກສັດນໍ້າ-ສັດປ່າແຫ່ງຊາດ ວັນທີ 13 ກໍລະກົດ ຄົບຮອບ 26 ປີ, ໃນນີ້ ລວມມີ, ປານິນ, ປາ ໄນ, ປາປາກ, ປາເກັດແລັບ ແລະປາກິນຫຍ້າໂດຍຈະຈັດພິທີຢ່າງເປັນທາງການຢູ່ວັງສະຫງວນບ້ານດອນໄຊ, ເມືອງປາກກະດິງ ເພື່ອຄືນຄວາມອຸດົມສົມບູນລົງສູ່ແຫຼ່ງນໍ້າທຳມະຊາດ.

ເພື່ອເຮັດໃຫ້ປາທີ່ປ່ອຍໄປມີອັດຕາລອດເຫລືອສູງ ແລະສາມາດຂະຫຍາຍພັນໄດ້ຕໍ່ໄປ. ພະແນກກະສິກໍາ ແລະປ່າໄມ້ແຂວງບໍລິຄໍາໄຊ ໄດ້ອອກແຈ້ງການສະເພາະຫາແຕ່ລະເມືອງພາຍໃນແຂວງ ເພື່ອແນະນໍາບໍ່ໃຫ້ປະຊາຊົນຫາປາແບບດັບສູນ, ລວມເຖິງໃນໄລຍະປາຂຶ້ນໄຂ່ເພື່ອຂະຫຍາຍພັນເຊີ່ງມີທັງໝົດ 8 ມາດຕະການສໍາຄັນ. ພ້ອມນີ້ ຍັງໄດ້ແນະນໍາໃຫ້ຂະແໜງການກ່ຽວຂ້ອງ, ອົງການປົກຄອງເມືອງ-ບ້ານ ໃຫ້ມີມາດຕະການປົກປັກຮັກສາ ແລະຄຸ້ມຄອງວັງສະຫງວນ, ກໍຄືປົກປັກຮັກສາອະນຸລັກສັດນໍ້າ-ສັດປ່າໃຫ້ເຂັ້ມງວດຂຶ້ນກວ່າເກົ່າ, ເຊີ່ງປະຈຸບັນທົ່ວແຂວງມີວັງສະຫງວນທັງໝົດ 21 ແຫ່ງ, ມີເນື້ອທີ່ທັງໝົດປະມານ 46.000 ກິໂລຕາແມັດ. ນອກຈາກນີ້ຍັງມີແຫລ່ງນໍ້າທີ່ຈະສ້າງເປັນວັງສະຫງວນອີກ 106 ກວ່າແຫ່ງໃນ 106 ບ້ານ.

แชร์