ເຊັນບົດບັນທຶກສົ່ງເສີມການປູກພືດ - ເກັບຊື້ຄືນຜົນຜະລິດພືດຢູ່ສອງແຂວງ

ພິທີເຊັນບົດບັນທຶກຄວາມເຂົ້າໃຈການຮ່ວມມືເພື່ອສົ່ງເສີມຊາວກະສິກອນ ແລະເກັບຊື້ຄືນຜົນຜະລິດຈາກການປູກພືດກະສິກຳທີ່ແຂວງຜົ້ງສາລີ ແລະອຸດົມໄຊ ລະຫ່ວາງ ບໍລິສັດຫຸ້ນສ່ວນດ້ານໂພຊະນາການສາກົນ CNC ຂອງ ສສ ຫວຽດນາມ ກັບ ບໍລິສັດ ບຸນທະວິໄຊຟາມລ້ຽງສັດ ຈຳກັດຜູ້ດຽວ ສປປ ລາວ ໄດ້ຈັດຂຶ້ນຫວ່າງບໍ່ດົນມານີ້ ທີ່ເຂດເສດຖະກິດພິເສດບາຮ່າງ ແຂວງຮາຍເຢືອງ ສສ ຫວຽດນາມ ໂດຍການເຂົ້າຮ່ວມຂອງ ທ່ານ ຫງວຽນ ວັນ ຟອງ ອຳນວຍການໃຫຍ່ ບໍລິສັດຫຸ້ນສ່ວນດ້ານໂພຊະນາການສາກົນ CNC, ທ່ານ ເຫຼັກ ສຸກສັນ ອຳນວຍການບໍລິສັດ ບຸນທະວິໄຊຟາມລ້ຽງສັດ ຈຳກັດຜູ້ດຽວ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ສຳລັບການເຊັນບົດບັນທຶກຄວາມເຂົ້າໃຈໃນຄັ້ງນີ້ທາງບໍລິສັດ ບຸນທະວິໄຊຟາມລ້ຽງສັດ ຈຳກັດຜູ້ດຽວ ຈະລົງທຶນສົ່ງເສີມໃຫ້ຊາວກະສິກອນທີ່ແຂວງຜົ້ງສາລີ ແລະ ອຸດົມໄຊ ສປປ ລາວ ປູກສາລີ ແລະ ມັນຕົ້ນ ໂດຍການສະໜອງແນວພັນ, ປຸ໋ຍ, ຢາຂ້າຫຍ້າ ແລະ ອື່ນໆ ທີ່ຮັບໃຊ້ໃນການຜະລິດຕາມປະລິມານທີ່ຝ່າຍບໍລິສັດຫວຽດນາມ ໄດ້ສະເໜີຄວາມຕ້ອງການແລ້ວເປັນຜູ້ເກັບຊື້ຜົນຜະລິດຄືນພ້ອມແປຮູບໃຫ້ໄດ້ມາດຕະຖານຕາມທີ່ຝ່າຍບໍລິສັດຫວຽດນາມ ໄດ້ກຳນົດໄວ້ຕາມທີ່ໄດ້ເອກະພາບກັນ; ສາລີ ແລະມັນຕົ້ນຕ້ອງໄດ້ອົບແຫ້ງໃຫ້ໄດ້ມາດຕະຖານແລ້ວຂາຍໃຫ້ຝ່າຍບໍລິສັດຫວຽດນາມ ພຽງຜູ້ດຽວ. ໂດຍບໍລິສັດຝ່າຍຫວຽດນາມໄດ້ກຳນົດຄວາມຕ້ອງການປະລິມານສາລີອົບແຫ້ງຂັ້ນຕໍ່າ 10.000 - 15.000 ໂຕນຕໍ່ເດືອນ ບໍລິສັດຝ່າຍຫວຽດນາມ ໃຫ້ຄຳໝັ້ນສັນຍາວ່າລາຄາເກັບຊື້ເປັນໄປຕາມລາຄາທ້ອງຕະຫຼາດ ແລະບໍ່ຕໍ່າກວ່າບັນດາບໍລິສັດ ຫຼື ເອກະຊົນອື່ນໆທີ່ກຳລັງເກັບຊື້ໃນທ້ອງຖິ່ນດຽວກັນ ແລະໃນໄລຍະເວລາດຽວກັນ ພ້ອມທັງຊຳລະໃຫ້ຄົບຖ້ວນ ແລະຖືກຕ້ອງຕາມເວລາການນັດໝາຍຂອງສອງຝ່າຍ. ບົດບັນທຶກຄວາມເຂົ້າໃຈສະບັບນີ້ມີກຳນົດ 24 ເດືອນນັບແຕ່ວັນລົງລາຍເຊັນເປັນຕົ້ນໄປ ແລະຖ້າທັງສອງຝ່າຍໄດ້ສຶກສາຮ່ວມກັນແລ້ວມີຄວາມເປັນໄປໄດ້ຈະສ້າງສັນຍາດຳເນີນທຸລະກິດຮ່ວມກັນໃນອະນາຄົດ.

ຕາງໜ້າບໍລິສັດ ຂອງ ສສ ຫວຽດນາມ ເຊັນບົດບັນທຶກ ໂດຍທ່ານ ຫງວຽນ ວັນ ຟອງ ອຳນວຍການໃຫຍ່ ບໍລິສັດ ບໍລິສັດຫຸ້ນສ່ວນດ້ານໂພຊະນາການສາກົນ CNC ແລະຕາງໜ້າບໍລິສັດ ຝ່າຍລາວ ເຊັນໂດຍທ່ານ ເຫຼັກ ສຸກສັນ ອຳນວຍການ ບໍລິສັດ ບຸນທະວິໄຊຟາມລ້ຽງສັດ ຈຳກັດຜູ້ດຽວ ໂດຍຊ້ອງໜ້າຈາກພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານ.

ນອກຈາກນັ້ນ, ທາງຫວຽດນາມຍັງໃຫ້ຄຳໝັ້ນສັນຍາວ່າຈະຊ່ວຍເຫຼືອວິຊາການດ້ານການວິໄຈດິນ, ແນວພັນສາລີ ແລະມັນຕົ້ນເພື່ອໃຫ້ແທດເໝາະກັບພື້ນທີ່ການຜະລິດເພື່ອໃຫ້ໄດ້ຜົນຜະລິດມີຄຸນນະພາບ ແລະປະລິມານທີ່ສູງ; ຈຸດປະສົງໃນຄັ້ງນີ້ເພື່ອສົ່ງເສີມໃຫ້ຄວາມຮ່ວມມືຂອງສອງຊາດ ລາວ-ຫວຽດນາມ ໃຫ້ມີຄວາມສາມັກຄີແໜ້ນແຟ້ນສູງຂຶ້ນເວົ້າລວມເວົ້າສະເພາະການຮ່ວມມືຂອງສອງ ບໍລິສັດ ລາວ-ຫວຽດນາມ ໄດ້ແລກປ່ຽນບົດຮຽນຮ່ວມກັນ ແລະດຳເນີນທຸລະກິດຮ່ວມກັນໃຫ້ນັບມື້ກວ້າງຂວາງດີຂຶ້ນໂດຍສະເພາະການສົ່ງເສີມການຜະລິດກະສິກຳຢູ່ໃນ ສປປ ລາວ ຂອງແຂວງຜົ້ງສາລີ ແລະອຸດົມໄຊ ໃຫ້ມີວຽກເຮັດງານທຳໂດຍການສົ່ງເສີມໃຫ້ປະຊາຊົນມີການປູກສາລີ ແລະມັນຕົ້ນ ແລ້ວແປຮູບໃຫ້ເປັນສິນຄ້າສາມາດສົ່ງອອກຕ່າງປະເທດໄດ້ ແລ້ວຈະສ້າງໃຫ້ເກີດມີລາຍຮັບທີ່ສູງຂຶ້ນ ສ້າງຄວາມເປັນຢູ່ທີ່ດີຂຶ້ນ ຄຽງຄູ່ກັບການພັດທະນາປະເທດຊາດເທື່ອລະກ້າວ.

ຫຼັງຈາກນັ້ນ, ບໍລິສັດ ຫວຽດນາມ ຍັງໄດ້ພາທີມງານຈາກບໍລິສັດຂອງລາວເຂົ້າຢ້ຽມຍາມໂຮງງານຜະລິດອາຫານສັດທີ່ມີຊື່ສຽງອີກແຫ່ງໜຶ່ງຂອງປະເທດຫວຽດນາມ ໃນການຜະລິດອາຫານສັດທີ່ມີຄຸນນະ ພາບ ແລະ ໄດ້ມາດຕະຖານສູງ ໂດຍມີອາຫານສັດຊະນິດຕ່າງໆ ເຊັ່ນ: ອາຫານປາ, ອາຫານໝູ, ອາຫານເປັດ, ອາຫານໄກ່ ແລະອາຫານງົວ ພ້ອມທັງຍັງມີແຜນຈະນຳເຂົ້າມາຈຳໜ່າຍໃນ ສປປ ລາວ ໃນເວລາອັນໃກ້ນີ້ເພື່ອຊ່ວຍໃຫ້ຊາວກະກະສິກອນໃນລາວມີຕົ້ນທຶນການຜະລິດທີ່ຕ່ຳລົງ ແລະໄດ້ກຳໄລຈາກການລ້ຽງສັດເພີ່ມຂຶ້ນອີກດ້ວຍ.
(ຂ່າວ: ແສງຄຳ ສາລີວັນ, ພາບ: ບຸນນະໄຊ ວຽນນະໃສ)

แชร์