ໂຮງຮຽນສີຫາວົງວິທະຍາ ສະຫຼຸບສົກຮຽນ ມອບໃບຢັ້ງຢືນ

ໂຮງຮຽນລ້ຽງເດັກ-ອະນຸ ບານ-ປະຖົມ-ມັດທະຍົມຕອນຕົ້ນສີຫາວົງວິທະຍາ ໄດ້ຈັດພິທີສະຫຼຸບຜົນການສອບເສັງເລື່ອນຂັ້ນ,ຈົບຊັ້ນ ສົກຮຽນປະຈຳປີ 2022-2023 ແລະ ມອບ-ຮັບໃບປະກາສະນີຍະບັດໃຫ້ແກ່ນັກຮຽນຈົບຊັ້ນປະຖົມສຶກສາປີທີ 5, ຈົບຊັ້ນ ມ.4, ໃບຢັ້ງຢືນການຈົບຊັ້ນອະນຸບານສຶກສາຂຶ້ນ ໃນວັນທີ 8 ກໍລະກົດຜ່ານມານີ້ທີ່ໂຮງຮຽນດັ່ງກ່າວຊຶ່ງຕັ້ງຢູ່ບ້ານໂນນສະຫວັນ ເມືອງໄຊເສດຖາ ນະຄອນຫຼວງວຽງຈັນ ໂດຍມີທ່ານ ພົມມີ ໄຊຍະສານ ຫົວໜ້າຫ້ອງການສຶກສາທິການ ແລະ ກິລາເມືອງໄຊເສດຖາ, ທ່ານນາງ ບົວລຸນ ລິນທະວົງ ຜູ້ອຳນວຍການໂຮງຮຽນລ້ຽງເດັກ-ອະນຸບານ-ປະຖົມ-ມັດທະຍົມຕອນຕົ້ນສີຫາວົງວິທະຍາ, ທ່ານ ໂຢວເວີຍ ຫົວໜ້າສູນການສຶກສາ ສາກົນລາວ-ຈີນ, ມີຄູ-ອາຈານ, ນັກຮຽນ, ແຂກຖືກເຊີນພ້ອມດ້ວຍຜູ້ປົກຄອງເຂົ້າຮ່ວມ.

ທ່ານ ສົມປະດິດ ສີຫາວົງ ຮອງຜູ້ອຳນວຍການໂຮງຮຽນລ້ຽງເດັກ-ອະນຸບານ-ປະຖົມ-ມັດທະຍົມຕອນຕົ້ນ ສີຫາວົງວິທະຍາໄດ້ຂຶ້ນຜ່ານບົດສະຫຼຸບປະຈຳປີຮຽນສົກຮຽນ 2022-2023 ແລະ ແຜນການພັດທະນາການສຶກສາຂອງໂຮງຮຽນດັ່ງກ່າວສົກຮຽນ 2023-2024 ວ່າ: ປັດຈຸບັນໂຮງຮຽນສີຫາວົງ ວິທະຍາສ້າງຕັ້ງຂຶ້ນມາໄດ້ 11 ປີແລ້ວ, ພະນັກງານ, ຄູ-ອາ ຈານພາຍໃນໂຮງຮຽນມີຄວາມຫ້າວຫັນ, ມີຄວາມຮັບຜິດຊອບສູງ, ມີສະຕິຕໍ່ການຈັດຕັ້ງ ແລະ ລະບຽບວິໄນ, ມີແນວຄິດອຸ່ນອ່ຽນທຸ່ນທ່ຽງ,ຕັ້ງໜ້າປະຕິບັດກົດລະບຽບຂອງໂຮງຮຽນວາງອອກຢ່າງເຂັ້ມງວດ, ມີການພັດທະນາຕົນເອງໃຫ້ມີຄວາມກ້າວໜ້າ. ໂຮງຮຽນສີຫາວົງວິທະຍາຍັງຖືເອົາການພັດທະນາສຶກສາຕ້ອງໄປຕາມ 3 ລັກສະນະ,5 ຫຼັກມູນຂອງການສຶກສາ ແລະປະຕິບັດຕາມ 3 ຂໍ້ແຂ່ງຂັນ ທີ່ກະຊວງສຶກສາທິການ ແລະກິລາວາງອອກຢ່າງເຂັ້ມງວດ ແລະໄປຕາມຄຳຂັວນຂອງໂຮງຮຽນທີ່ວ່າ: ສຶກສາດີມີວິໄນໃສ່ໃຈສຸຂະພາບອະນາຄົດຈະສົດໃສ.

ປັດຈຸບັນໂຮງຮຽນສີຫາວົງ ວິທະຍາມີຫ້ອງຮຽນແຕ່ຊັ້ນລ້ຽງເດັກຈົນເຖິງມັດທະຍົມຕອນຕົ້ນທັງໝົດ 28 ຫ້ອງ, ນຳໃຊ້ເປັນຫ້ອງຮຽນ 22 ຫ້ອງ, ຫ້ອງອ່ານ 1 ຫ້ອງ, ຫ້ອງຄອມພິວເຕີ 1 ຫ້ອງ, ໃນສົກຮຽນ 2022-2023 ມີພະນັກງານຄູ-ອາຈານທັງ ໝົດ 36 ຄົນ ຍິງ 31 ຄົນ, ມີນັກຮຽນທັງໝົດ 561 ຄົນ ຍິງ 267 ຄົນ. ໃນນັ້ນມີ: ຊັ້ນລ້ຽງເດັກ-ອະນຸບານມີ 248 ຄົນ ຍິງ 118 ຄົນ, ຊັ້ນປະຖົມມີ 264 ຄົນ ຍິງ 125 ຄົນ ແລະ ຊັ້ນມັດທະຍົມຕອນຕົ້ນມີ 49 ຄົນ ຍິງ 24 ຄົນ. ສໍາລັບຜົນການສອບ ເສັງຈົບຊັ້ນອະນຸບານ 3 ມີ 82 ຄົນ ຍິງ 25 ຄົນ, ຈົບຊັ້ນປະຖົມ ປ.5 ມີ 43 ຄົນ ຍິງ 23 ຄົນ, ຈົບຊັ້ນມັດທະຍົມ ມ.4 ມີ 11 ຄົນ ຍິງ 8 ຄົນ, ໄດ້ຮັບຜົນ 100%. ພ້ອມນັ້ນ, ຍັງໄດ້ເລື່ອນຂັ້ນແຕ່ຊັ້ນ ປ.1-ປ.4 ແລະ ມ.1-ມ.3 ມີ 313 ຄົນ ຍິງ 147 ຄົນ, ໃນນັ້ນ, ສອບເສັງຈົບຊັ້ນ ປ.5 ມີນັກຮຽນສອບເສັງໄດ້ 39 ຄະແນນມີ 7 ຄົນ ຍິງ 4 ຄົນ. ສອບເສັງໄດ້ 38 ຄະ ແນນມີ 4 ຄົນ ຍິງ 1 ຄົນ ແລະ ສອບເສັງເດັ່ນຮອບ ດ້ານໄດ້ຄະແນນ 7 ຂຶ້ນໄປທຸກວິຊາມີ 29 ຄົນ, ຍິງ 16 ຄົນ ແລະ ມີນັກຮຽນຈົບຊັ້ນມັດທະຍົມ ມ.4 ສອບເສັງໄດ້ເດັ່ນຮອບດ້ານຄະແນນ 7 ຂຶ້ນໄປທຸກວິຊາມີ 10 ຄົນ ຍິງ 8 ຄົນ. ພ້ອມນັ້ນ, ໂຮງຮຽນສີຫາວົງ ວິທະຍາ ຍັງສາມາດສ້າງນັກຮຽນເກັ່ງ ຊັ້ນປະຖົມ ປ.5 , ຊັ້ນມັດທະ ຍົມ ມ.4 ເຂົ້າສອບເສັງໃນ ຂັ້ນເມືອງ, ຂັ້ນນະຄອນຫຼວງ ແລະ ຍັງໄດ້ສົ່ງນັກຮຽນເກັ່ງຊັ້ນປະຖົມ ປ.5 ເຂົ້າສອບ ເສັງລະດັບກຸ່ມຕື່ມອີກ.

ໃນພິທີໄດ້ມອບໃບຍ້ອງຍໍໃຫ້ນັກຮຽນດີ-ຮຽນເກັ່ງອັນດັບທີ I, ທີ II, ທີ III, ທີ IV ໃຫ້ແກ່ນັກຮຽນຊັ້ນອະນຸບານ, ຊັ້ນປະຖົມ ແລະຊັ້ນມັດທະຍົມຕົ້ນ, ມອບໃບຍ້ອງຍໍໃຫ້ນັກຮຽນດີ-ຮຽນເກັ່ງສອບເສັງຈົບຊັ້ນປະຖົມ ປ.5 ມັດທະຍົມຕົ້ນ ມ.4 ທີ່ສອບເສັງໄດ້ເດັ່ນຮອບດ້ານຄະແນນ 7 ຂຶ້ນໄປທຸກວິຊາ, ພ້ອມນີ້ຍັງໄດ້ມອບໃບຍ້ອງ ຍໍໃຫ້ນັກຮຽນດີ-ຮຽນເກັ່ງທີ່ເປັນຕົວແທນຂອງໂຮງຮຽນໄປສອບເສັງນັກຮຽນເກັ່ງຂັ້ນເມືອງ, ຂັ້ນນະຄອນຫຼວງ, ມອບໃບຍ້ອງຍໍໃຫ້ຄູ-ອາຈານ, ພະນັກງານດີເດັ່ນ, ມອບຂອງລາງວັນໃຫ້ນັກ ຮຽນເກັ່ງ-ຄູສອນບໍາລຸງນັກຮຽນເກັ່ງໃນຂັ້ນດັ່ງກ່າວ ແລະນັກຮຽນທີ່ຍາດໄດ້ຄະແນນ 9-10 ໃນແຕ່ລະເດືອນຕາມມາດຖານຂອງໂຮງຮຽນວາງອອກ.

แชร์