ຂະແໜງກະສິກໍາ ຈະປ່ອຍສັດນໍ້າ 62 ລ້ານໂຕ ເພື່ອຄືນຄວາມອຸດົມສົມບູນຂອງທຳມະຊາດ

ຂະແໜງກະສິກໍາ ແລະປ່າໄມ້ ໄດ້ສົມທົບກັບຄະນະພັກ, ອົງການປົກຄອງທ້ອງຖິ່ນທົ່ວປະເທດກະກຽມແຜນການ ແລະຂະບວນການປ່ອຍປາ, ສັດນໍ້າ ແລະສັດປ່າ ເພື່ອຄືນຄວາມອຸດົມສົມບູນສູ່ທໍາມະຊາດ ແລະລົງສູ່ແຫຼ່ງນໍ້າຕ່າງໆ ໂດຍມີແຜນປ່ອຍປາ ແລະສັດນໍ້າໃຫ້ໄດ້ທັງໝົດ 62 ລ້ານໂຕ.

ທ່ານ ເພັດ ພົມພິພັກ, ລັດຖະມົນຕີກະຊວງກະສິກຳ ແລະປ່າໄມ້ ໄດ້ຖະແຫຼງຂ່າວຕໍ່ສື່ມວນຊົນ ເມື່ອວັນທີ 7 ກໍລະກົດ ວ່າ: ວັນທີ 13 ກໍລະກົດ ເປັນວັນປ່ອຍປາ ແລະ ອະນຸລັກສັດນໍ້າ-ສັດປ່າ. ສປປ ລາວ, ມີຊະນິດພັນສັດປ່າ ຫຼາຍກວ່າ 1.000 ຊະນິດ ແລະປາພື້ນເມືອງຫຼາຍກວ່າ 500 ຊະນິດໂດຍສະເພາະສັດນ້ໍາ ແລະ ສັດປ່າທີ່ຫາຍາກ ແລະໃກ້ຈະສູນພັນຂອງໂລກ ເຊັ່ນ: ເສົາລາ, ຂະຍຸ, ຊ້າງ, ເສືອໂຄ່ງ, ໂອ່ງ-ມັ່ງ, ປາບຶກ, ປາຂ່າ ແລະສັດປ່າຊະນິດອື່ນໆ.

ໃນປີຜ່ານມາ, ກະຊວງກະສິກໍາ ແລະປ່າໄມ້ໄດ້ສົມທົບກັບບັນດາອົງການປົກຄອງທ້ອງຖິ່ນໃນຂອບເຂດທົ່ວປະເທດຈັດກິດຈະກໍາໃນວັນປ່ອຍປາ ແລະ ອະນຸລັກສັດນໍ້າ-ສັດປ່າແຫ່ງຊາດ, ຊຶ່ງຈໍານວນປາ ແລະສັດນໍ້າທີ່ໄດ້ປ່ອຍທັງໝົດແມ່ນ 61,3 ລ້ານໂຕ. ນອກນັ້ນຍັງໄດ້ປ່ອຍສັດປ່າປະເພດນົກ, ສັດເລືອຄານ ແລະສັດປະເພດອື່ນໆຄືນສູ່ທໍາມະຊາດຈໍານວນ 200 ກວ່າໂຕ.

ໃນປີ 2023 ນີ້, ມີແຜນປ່ອຍປາ ແລະສັດນໍ້າໃຫ້ໄດ້ທັງໝົດ 62 ລ້ານໂຕ, ແນໃສ່ເພີ່ມຄວາມອຸດົມສົມບູນທາງດ້ານຊະນິດພັນ ແລະຈໍານວນປະຊາກອນຂອງສັດນ້ໍາ ແລະສັດປ່າ ທີ່ເປັນມໍລະດົກທາງທໍາມະຊາດຂອງຊາດໃຫ້ຊົມໃຊ້ແບບຍືນຍົງ ແລະໃຫ້ເປັນມໍລະດົກຕົກທອດຮອດເຊັ່ນລູກເຊັ່ນຫຼານຕະຫຼອດໄປ.

ທີ່ມາ: ກະຊວງກະສິກຳ ແລະປ່າໄມ້

• 10/07/2023