ລົງທຶນສ້າງໂຮງງານໄຟຟ້າພະລັງງານລົມ 2 ພັນກວ່າເຮັກຕາ ເພື່ອສົ່ງອອກໄປຫວຽດນາມ

ສປປ ລາວ ບັນລຸຂໍ້ຕົກລົງ Project Development Agreement (PDA) ຊຶ່ງແມ່ນໂຄງການກໍ່ສ້າງໂຮງງານໄຟຟ້າດ້ວຍພະລັງງານລົມໃນເນື້ອທີ່ 2.687 ເຮັກຕາ, ຢູ່ເມືອງເຊໂປນ, ແຂວງສະຫວັນນະເຂດ ກັບ ບໍລິສັດຫຸ້ນສ່ວນການລົງທຶນ ເອເອັມໄອ ກວາງບິ່ງ (AMI). ຊຶ່ງໄລຍະທີໜຶ່ງ, ຈະມີກຳລັງການຜະລິດໄຟຟ້າ 187,2 ເມກາວັດ ແລະຄາດວ່າ ຈະສຳເລັດໂຄງການທ້າຍປີ 2023 ແລ້ວຈະດຳເນີນການຜະລິດຢ່າງເປັນທາງການໃນໄຕມາດ 4 ປີ 2025 ເພື່ອສົ່ງອອກໄປ ສສ ຫວຽດນາມ.

ສັນຍາພັດທະນາໂຄງການ PDA ທີ່ໄດ້ຮ່ວມລົງນາມໃນຄັ້ງນີ້ສະແດງໃຫ້ເຫັນເຖິງຄວາມເຊື່ອໝັ້ນທີ່ລັດຖະບານລາວທີ່ມີໃຫ້ບໍລິສັດ ເອເອັມໄອ ກວາງບິ່ງໃນການຈັດຕັ້ງປະຕິບັດໂຄງການດັ່ງກ່າວຊຶ່ງນັບຕັ້ງແຕ່ມີການລົງນາມໃນບົດບັນທຶກຊ່ວຍຈໍາມາຮອດປັດຈຸບັນກໍເປັນໄລຍະເວລາ 7ເດືອນ ຖືວ່າແມ່ນສະຖິຕິໃໝ່ຊຶ່ງບໍ່ມີມາກ່ອນໃນການພັດທະນາໂຄງການພະລັງງານຢູ່ ສປປ ລາວ.
.
ໂຄງການກໍ່ສ້າງໂຮງໄຟຟ້າພະລັງງານລົມແຫ່ງນີ້, ໄລຍະທີ 1 ຊຶ່ງມີກໍາລັງການຜະລິດ 187,2 ເມກາວັດ (ສາມາດເພີ່ມຂຶ້ນເປັນ 252 ເມກາວັດ) ຈະເລີ່ມລົງມືກໍ່ສ້າງໃນໄຕມາດທີ 2 ປີ 2024 ແລະດໍາເນີນການຜະລິດຢ່າງເປັນທາງການໃນໄຕມາດທີ 4 ຂອງປີ 2025.

ພິທີເຊັນສັນຍາໂຄງການ, ເປັນການລົງນາມລະຫວ່າງທ່ານ ສະຖາບັນດິດ ອິນສີຊຽງໃໝ່, ຮອງລັດຖະມົນຕີກະຊວງແຜນການ ແລະການລົງທຶນ ແລະທ່ານ ຫງວຽນ ນາມ ຖັງ (Nguyen Nam Thang), ປະທານສະພາບໍລິຫານ ບໍລິສັດ (AMI), ໂດຍມີທ່ານ ບໍ່ວຽງຄໍາ ວົງດາລາ, ລັດຖະມົນຕີກະຊວງເຕັກໂນໂລຊີ ແລະ ການສື່ສານ ທັງເປັນປະທານສະມາຄົມມິດຕະພາບ ລາວ-ຫວຽດນາມ; ທ່ານ ຫວຽນ ບ໋າ ຮຸ່ງ (Nguyen Ba Hung) ເອກອັກຄະລັດຖະທູດຜູ້ມີອຳນາດເຕັມແຫ່ງ ສສ ຫວຽດນາມ ປະຈໍາລາວ; ທ່ານ ສີນາວາ ສຸພານຸວົງ, ຮອງລັດຖະມົນຕີກະຊວງພະລັງງານ ແລະບໍ່ແຮ່.

ທີ່ມາ: ປະຊາຊົນ

แชร์