ສສຍລ ກຽມສະຫຼອງວັນສ້າງຕັ້ງອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ

ທ່ານ ນາງ ສິລິກິດ ບຸບຜາ ຮອງປະທານຄະນະບໍລິຫານງານສູນກາງສະຫະພັນແມ່ຍິງລາວ (ສສຍລ) ໄດ້ຖະແຫຼງຂ່າວກ່ຽວກັບການກະກຽມສະເຫຼີມສະຫຼອງວັນສ້າງຕັ້ງ ອົງການຈັດຕັ້ງສະຫະພັນແມ່ຍິງລາວ ຄົບຮອບ 68 ປີ (20 ກໍລະກົດ 1955-20 ກໍລະກົດ 2023) ໃນວັນທີ 7 ກໍລະກົດ ຜ່ານມາວ່າ: ກິດຈະກໍາທີ່ຈະຈັດຕັ້ງປະຕິບັດໃນການສະເຫຼີມສະຫຼອງປີນີ້ ປະກອບມີ: ການສ້າງຂະບວນການຂອງສະຫະພັນແມ່ຍິງລາວໃນແຕ່ລະຂັ້ນຈັດກອງປະຊຸມສຳມະນາປາຖະກະຖາຈັດງານຕະຫຼາດນັດວາງສະແດງສິນຄ້າກະສິກຳຫັດຖະກຳທີ່ເປັນສີໄມ້ລາຍມີແຜງແມ່ຍິງ ແລະຂອງທ້ອງຖິ່ນກິດຈະກຳຕິດພັນກັບການອະນຸລັກຮັກສາ ແລະສົ່ງເສີມວັດທະນະທໍາອັນດີງາມຂອງຊາດຂອງແມ່ຍິງລາວສົມທົບກັບພາກສ່ວນກ່ຽວຂ້ອງຈັດຂະບວນການບໍລິຈາກເລືອດເພື່ອຊ່ວຍເຫຼືອສັງຄົມ ແລະຈັດຕັ້ງການຢ້ຽມຢາມພະນັກງານປະຕິວັດອາວຸໂສບຳນານອະດີດການນໍາເພດຍິງຕາມຄວາມເໝາະສົມ ແລະເງື່ອນໄຂຕົວຈິງ.

ສຳລັບສູນກາງສະຫະພັນແມ່ຍິງລາວ ໃນວັນທີ 14 ກໍລະກົດ 2023 ຮັບຟັງການໂອ້ລົມໃຫ້ທິດຊີ້ນຳຂອງການນຳຂັ້ນສູງເນື່ອງໃນໂອກາດສະເຫຼີມສະຫຼອງວັນສ້າງຕັ້ງສະຫະພັນແມ່ຍິງລາວ ຄົບຮອບ 68 ປີ ພາຍໃຕ້ຫົວຂໍ້ “ການສ້າງຄວາມເຂັ້ມແຂງໃຫ້ແມ່ຍິງທາງດ້ານເສດຖະກິດໃນໄລຍະໃໝ່” ແລະກິດຈະກຳອື່ນໆ ທີ່ສູນການຮ່ວມມື ແລະ ເຝິກອົບຮົມລາວ-ຍີ່ປຸ່ນ (ICTC) ແລະ ວັນທີ 21 ກໍລະກົດ 2023 ສ້າງຂະບວນການບໍລິຈາກເລືອດເພື່ອຊ່ວຍເຫຼືອສັງຄົມ ຮ່ວມກັບສູນເລືອດແຫ່ງຊາດອົງການກາແດງລາວ ພາຍໃຕ້ຄໍາຂວັນ “68 ປີ ມີໄຊ ໃຫ້ເລືອດ ໃຫ້ຊີວິດ”ທີ່ສູນການຄ້າລາວ-ໄອເຕັກ ຈະເລີ່ມແຕ່ 8:00 ໂມງ ຫາ 16:00 ໂມງ ຂໍເຊີນຊວນທຸກທ່ານເຂົ້າຮ່ວມເພື່ອບໍລິຈາກເລືອດຊ່ວຍຊີວິດ ໃນໄລຍະສະເຫຼີມສະຫຼອງວັນສຳຄັນດັ່ງກ່າວ ສູນກາງສະຫະພັນແມ່ຍິງລາວຂໍເຊີນຊວນທຸກພາກສ່ວນນຳພາສະມາຊິກສະຫະພັນແມ່ຍິງລາວ-ແມ່ຍິງລາວ ບັນດາເຜົ່າເອົາໃຈໃສ່ສຶກສາອົບຮົມລູກຫຼານໂດຍການເຂົ້າຢ້ຽມຊົມຫໍມູນເຊື້ອແມ່ຍິງລາວທີ່ສູນອົບຮົມແມ່ຍິງລາວ ແລະຫ້ອງສິນສາຍໄໝຢູ່ບ້ານຊຽງຍືນ ເຊິ່ງພວກເຮົາເປີດໃຫ້ເຂົ້າຢ້ຽມຊົມໃນໂມງລັດຖະການ.

แชร์