ສະພາແຫ່ງຊາດ ພິຈາລະນາຮ່າງກົດໝາຍວ່າດ້ວຍການຈັດຫາງານ

ໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ໃນວັນທີ 10 ກໍລະກົດ 2023 ໂດຍການເປັນປະທານຂອງທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ. ທ່ານ ນາງ ໃບຄຳ ຂັດທິຍະ ລັດຖະມົນຕີ ກະຊວງແຮງງານ ແລະສະຫວັດດີການສັງຄົມໄດ້ສະເໜີຮ່າງກົດໝາຍວ່າດ້ວຍການຈັດຫາງານເຊິ່ງປະກອບມີ 67 ມາດຕາ, 11 ພາກ. ຈາກນັ້ນບັນດາສະມາຊິກສະພາແຫ່ງຊາດປະຈຳເຂດເລືອກຕັ້ງຕ່າງໆ ກໍໄດ້ປະກອບຄຳເຫັນໃສ່ຮ່າງກົດໝາຍດັ່ງກ່າວໃຫ້ມີເນື້ອໃນຄົບຖ້ວນສົມບູນ ຖືກຕ້ອງຕາມລະບຽບຫລັການ ແລະມາດຕະການກ່ຽວກັບການຄຸ້ມຄອງ, ຕິດຕາມກວດກາການຈັດຫາງານໃຫ້ເປັນລະບົບ, ເຂັ້ມແຂງມີປະສິດທະພາບ ແລະປະສິດທິຜົນ.

ທ່ານ ນາງ ໃບຄຳ ຂັດທິຍະ ໄດ້ຍົກໃຫ້ເຫັນເຫດຜົນ ແລະຄວາມຈໍາເປັນໃນການສ້າງກົດໝາຍວ່າດ້ວຍການຈັດຫາງານເຊິ່ງສະພາບຂອງການພັດທະນາ ເສດຖະກິດ-ສັງຄົມ ຢູ່ພາຍໃນປະເທດ , ພາກພື້ນ ແລະ ສາກົນ ໄດ້ມີການປ່ຽນແປງຢ່າງໄວວາ, ໂດຍສະເພາະແມ່ນດ້ານຂໍ້ມູນຂ່າວສານ, ເຕັກໂນໂລຊີ ແລະນະວັດຕະກໍາເຊິ່ງສົ່ງຜົນຕໍ່ການມີວຽກເຮັດງານທໍາ ຂອງກຳລັງແຮງງານລາວ ນັບມື້ນັບເພີ້ມຂຶ້ນ ແຕ່ນະໂຍບາຍ ແລະ ນິຕິກໍາ ທີ່ກ່ຽວຂ້ອງ ກັບການຈັດຫາງານຂອງປະເທດເຮົາ ຍັງບໍ່ທັນເປັນລະບົບຄົບຊຸດ, ບໍ່ຮັດກຸມ ແລະ ພຽງພໍ ກັບຄວາມຕ້ອງການນຳໃຊ້ເຂົ້າໃນວຽກຕົວຈິງ; ການຈັດຫາງານ ໂດຍສະເພາະ ລະບົບຂໍ້ມູນຂ່າວສານຕະຫລາດແຮງງານ ທີມີໃນປັດຈຸບັນຍັງບໍ່ທັນເປັນລະບົບທີ່ກວ້າງຂວາງ,ພາກລັດ,ພາກທຸລະກິດ, ແຮງງານ ແລະສັງຄົມຍັງບໍ່ທັນໄດ້ເຂົ້າມາມີສ່ວນຮ່ວມ ແລະນໍາໃຊ້, ບໍ່ທັນສາມາດຄຸ້ມຄອງແບບ ລວມສູນ ເຮັດໃຫ້ການຕິດຕາມຕະຫລາດແຮງງານ ແລະການຄຸ້ມຄອງການຈັດຫາງານຍັງບໍ່ທັນມີປະສິດທິພາບ ແລະປະສິດທິຜົນເທົ່າທີ່ຄວນ; ການເຂົ້າເຖິງການມີວຽກເຮັດງານທຳທີ່ໝັ້ນຄົງ, ມີລາຍໄດ້ ຫລືຄ່າແຮງງານ ທີ່ເໝາະສົມ ແລະໄດ້ຮັບການປົກປ້ອງສິດຜົນປະໂຫຍດຕາມກົດໝາຍຂອງກໍາລັງແຮງງານລາວ ໃນຂອບເຂດທົ່ວປະເທດຍັງຈໍາກັດ; ນອກຈາກນີ້, ຄວາມເປັນເຈົ້າການໃນການສະໜອງຂໍ້ມູນຂ່າວສານທາງດ້ານຕໍາແໜ່ງງານ ຫຼືຄວາມຕ້ອງການແຮງງານຂອງແຜນພັດທະນາເສດຖະກິດ-ສັງຄົມ,ແຜນພັດທະນາຂອງ ຂະແໜງການ ທັງສູນກາງ ແລະ ທ້ອງຖິ່ນ, ຫົວໜ່ວຍແຮງງານ ແລະ ໂຄງການລົງທຶນຕ່າງໆ ລວມທັງຂໍ້ມູນດ້ານກຳລັງແຮງງານລາວ ຢູ່ພາຍໃນປະເທດ ຍັງບໍ່ທັນພຽງພໍ ແລະທັນກັບສະພາບຄວາມຕ້ອງການຕົວຈິງ; ການສ້າງນະໂຍບາຍ ແລະກົນໄກໃນການຊຸກຍູ້, ສົ່ງເສີມ ແລະ ສ້າງແຮງງຈູງໃຈ ໃຫ້ຜູ້ຢູ່ນອກກຳລັງແຮງງານໃຫ້ເຂົ້າສູ່ຕະຫລາດແຮງງານພາຍໃນ ຍັງມີຄວາມຈໍາເປັນອັນຮີບດ່ວນ ເພື່ອຊ່ວຍໃນການຂັບເຄື່ອນການພັດທະນາ ເສດຖະກິດ-ສັງຄົມຂອງປະເທດ;ເພື່ອແກ້ໄຂປະກົດການຫຍໍ້ທໍ້ຂອງສັງຄົມທີ່ເກີດຈາກການບໍ່ມີວຽກເຮັດງານທໍາຂອງຊາວໜຸ່ມລາວລວມທັງການຕົກເຂົ້າສູ່ຂະບວນການຄ້າມະນຸດ ແລະ ຂູດຮີດແຮງງານທີ່ເກີດຈາກການໃຫ້ບໍລິການຈັດຫາງານທີ່ບໍ່ຖືກຕ້ອງຕາມກົດໝາຍ ແລະ ການຖືກຫລອກລວງທັງຢູ່ພາຍໃນ ແລະ ໄປຕ່າງປະເທດ. 

ຖ້າກົດໝາຍວ່າດ້ວຍການຈັດຫາງານສະບັບນີ້, ຖືກຮັບຮອງ ແລະປະກາດໃຊ້ແລ້ວຄາດຄະເນວ່າຈະເຮັດໃຫ້ການຄຸ້ມຄອງລັດໂດຍກົດໝາຍໃນດ້ານການຈັດຫາງານ ມີເຄື່ອງມືທີ່ໜັກແໜ້ນຂື້ນຕື່ມ, ເປັນບ່ອນອີງທີ່ໄດ້ມາດຕະຖານທັງພາຍໃນ ແລະ ສາກົນ ໃຫ້ແກ່ການຈັດຕັ້ງປະຕິບັດ, ການຕິດຕາມ, ກວດກາ ແລະຄຸ້ມຄອງວຽກງານການຈັດຫາງານຢ່າງເປັນລະບົບເອກະພາບ, ມີປະສິດທິພາບ, ປະສິດທິຜົນ, ມີຄວາມໂປ່ງໃສ ແລະຍຸຕິທໍາ;ເຮັດໃຫ້ອົງການຈັດຕັ້ງລັດທຸກຂັ້ນລວມທັງອົງການປົກຄອງທ້ອງຖິ່ນ, ບັນດາຫົວໜ່ວຍທຸລະກິດ, ການຜະລິດ ແລະ ການບໍລິການຂອງທຸກພາກສ່ວນເສດຖະກິດ-ສັງຄົມ, ກໍຄືແຮງງານລາວ ເຂົ້າໃຈ, ເຂົ້າເຖິງ ແລະເຂົ້າຮ່ວມ ໃນວຽກງານການຈັດຫາງານໄດ້ຢ່າງເປັນລະບົບ ແລະຫລາຍຂື້ນ; ການມີລະບົບການຈັດຫາງານ ເຊິ່ງກວມເອົາລະບົບຂໍ້ມູນຂ່າວສານຕະຫລາດແຮງງານທີ່ດີສາມາດນໍາໃຊ້ເຂົ້າໃນການແກ້ໄຂບັນດາປະກົດການຫຍໍ້ທໍ້ກ່ຽວກັບວຽກງານການຈັດຫາງານທີ່ເກີດຂຶ້ນໃນສັງຄົມໃນໄລຍະຜ່ານມາ ແລະປະຈຸບັນ ເຊັ່ນ: ການວ່າງງານ, ການຂາດແຄນແຮງງານ ແລະການວາງແຜນສ້າງ ແລະພັດທະນາກໍາລັງແຮງງານໃນອະນາຄົດ; ສ້າງຄວາມເຊື່ອໝັ້ນໃຫ້ອົງການຈັດຕັ້ງສາກົນຕໍ່ກັບລະບົບການຈັດຫາງານ, ການປົກປ້ອງ ແລະສົ່ງເສີມສິດ ແລະຜົນປະໂຫຍດອັນຊອບທໍາຂອງແຮງງານລາວ.
(ຂ່າວສານຮສສ)

แชร์