ສປປ ລາວ ອັດຕາເງິນເຟີ້ ໃນເດືອນມິຖຸນາຢູ່ລະດັບ 28,8%

ດັດຊະນີລາຄາສິນຄ້າໂດຍລວມຂອງເດືອນມິຖຸນາ 2023 ຢູ່ໃນລະດັບ 185,91 ຊຶ່ງເພີ່ມຂຶ້ນຈາກ 144,52 ໃນເດືອນມິຖຸນາ ປີຜ່ານມາເຮັດໃຫ້ອັດຕາເງິນເຟີ້ລວມຂອງ ສປປ ລາວ ໃນເດືອນມິຖຸນາ 2023 ຢູ່ໃນລະດັບ 28,8% (ເດືອນພຶດສະພາ 2023 ຢູ່ໃນລະດັບ 38,9%).

ອີງຕາມບົດລາຍງານຂອງສູນສະຖິຕິແຫ່ງຊາດ ກະຊວງແຜນການ ແລະການລົງທຶນ ໃຫ້ຮູ້ວ່າ: ອັດຕາເງິນເຟີ້ຂອງ ສປປ ລາວ ໃນເດືອນມິຖຸນາຢູ່ທີ່ລະດັບ 28,8% ໂດຍໝວດສິນຄ້າທີ່ມີອັດຕາເງິນເຟີ້ສູງກວ່າໝູ່ແມ່ນໝວດສະບຽງອາຫານ ແລະເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນ 42,7%, ໝວດຮ້ານອາຫານ ແລະ ໂຮງແຮມ ເພີ່ມຂຶ້ນ 28,8%, ໝວດຮັກສາ ສຸຂະພາບ ແລະຢາເພີ່ມຂຶ້ນ 25,8%, ໝວດເຄື່ອງນຸ່ງຫົ່ມ ແລະເກີບ ເພີ່ມຂຶ້ນ 24,6%, ໝວດເຄື່ອງໃຊ້ໃນເຮືອນເພີ່ມຂຶ້ນ 23,9%, ໝວດເຫຼົ້າ ແລະຢາສູບ ເພີ່ມຂຶ້ນ 21,8%, ໝວດທີ່ພັກອາໄສ, ນໍ້າປະປາ, ໄຟຟ້າ ແລະເຊື້ອເພີງຫຸງຕົ້ມ ເພີ່ມຂຶ້ນ 16,8%, ໝວດສິນຄ້າ ແລະ ບໍລິການອື່ນໆ ເພີ່ມຂຶ້ນ 12,1%, ຄົມມະນາຄົມ ແລະ ຂົນສົ່ງ ເພີ່ມຂຶ້ນ 11,0%.

ອັດຕາເງິນເຟີ້ ສະເລ່ຍ 6 ເດືອນຕົ້ນປີ 2023 ຢູ່ໃນລະດັບ 38,1% (6 ເດືອນຕົ້ນປີ 2022 ແມ່ນ 11,4%). ເມື່ອສັງເກດເປັນໝວດກໍເຫັນວ່າໝວດສະບຽງອາຫານ ແລະ ເຄື່ອງດື່ມບໍ່ມີທາດເຫຼົ້າ ເພີ່ມຂຶ້ນສູງກວ່າໝູ່ ໂດຍເພີ່ມຂຶ້ນ 49,1%, ໝວດຮັກສາສຸຂະພາບ ແລະ ຢາ ເພີ່ມຂຶ້ນ 38,8%, ຮອງລົງມາແມ່ນໝວດຮ້ານອາຫານ ແລະໂຮງແຮມ ເພີ່ມຂຶ້ນ 35,2%, ຄົມມະນາຄົມ ແລະຂົນສົ່ງ ເພີ່ມຂຶ້ນ 33,0%, ໝວດເຄື່ອງໃຊ້ໃນເຮືອນເພີ່ມຂຶ້ນ 32,9%, ໝວດເຫຼົ້າ ແລະ ຢາສູບ ເພີ່ມຂຶ້ນ 25,5%, ໝວດເຄື່ອງນຸ່ງຫົ່ມ ແລະເກີບ ເພີ່ມຂຶ້ນ 25,1%, ໝວດທີ່ພັກອາໄສ, ນ້ໍາປະປາ, ໄຟຟ້າ ແລະເຊື້ອເພີງທຸງຕົ້ມ ເພີ່ມຂຶ້ນ 24,8%.

ເມື່ອທຽບລາຄາສິນຄ້າ ແລະບໍລິການກັບເດືອນຜ່ານມາເຫັນວ່າຍັງສືບຕໍ່ເພີ່ມຂຶ້ນ ຊຶ່ງເພີ່ມຂຶ້ນ 2,0% ໃນນັ້ນໝວດຄົມມະນາຄົມ ແລະການຂົນສົ່ງເພີ່ມຂຶ້ນ 3,8% ພົ້ນເດັ່ນແມ່ນການເພີ່ມຂຶ້ນລາຄາລົດໃຫຍ່ ເຊັ່ນ: ລົດກະບະ ຣີໂວ ເພີ່ມຈາກ 716.687.048 ກີບ/ຄັນ ໃນເດືອນພຶດສະພາ ມາເປັນ 753.732.493 ກີບ/ຄັນ ໃນເດືອນມິຖຸນາ, ລົດໂຕໂຢຕ້າວີອ໋ອດ ເພີ່ມຈາກ 400.795.498 ກີບ/ຄັນ ມາເປັນ 421.512.556 ກີບ/ຄັນ, ລົດເກງຮຸນໄດເອັກ ເຊັນບຣູ ເພີ່ມຈາກ 338.778.040 ກີບ/ຄັນ ມາເປັນ 356.287.323 ກີບ/ຄັນ. ໝວດສິນຄ້າ ແລະບໍລິການອື່ນໆ ເພີ່ມຂຶ້ນ 3,4%. ໝວດອາຫານ ແລະເຄື່ອງດື່ມທີ່ບໍ່ແມ່ນເຫຼົ້າເພີ່ມຂຶ້ນ 1,5% ພົ້ນເດັ່ນແມ່ນລາຄາເຂົ້າສານໜຽວເພີ່ມຈາກ 15.064 ກີບ/ກິໂລ ມາເປັນ 15.381 ກີບ/ກິໂລ, ເຂົ້າສານຈ້າວ ເພີ່ມຈາກ 16.071 ກີບ/ກິໂລ ມາເປັນ 16.196 ກີບ/ກິໂລ, ຊີ້ນໝູ ເພີ່ມຈາກ 79.627 ກີບ/ກິໂລ ມາເປັນ 80.241 ກີບ/ກິໂລ, ລາຄາຊີ້ນງົວປະເພດ 1 ເພີ່ມຈາກ 109.847 ກີບ/ກິໂລ ມາເປັນ 110.398 ກີບ/ກິໂລ, ໄກ່ພັນປອກເພີ່ມຈາກ 85.315 ກີບ/ໂຕ ມາເປັນ 65.884 ກີບ/ໂຕ, ປານິນລ້ຽງ ເພີ່ມຈາກ 45.627 ກີບ/ກິໂລ ມາເປັນ 46.303 ກີບ/ກິໂລ ແລະຫຼາຍລາຍການສິນຄ້າໃນໝວດອື່ນກໍມີລາຄາເພີ່ມຂຶ້ນເຊັ່ນກັນ.

ສ່ວນສາເຫດຫຼັກຂອງການເພີ່ມຂຶ້ນຂອງອັດຕາເງິນເຟີ້ໃນເດືອນມິຖຸນາຍັງແມ່ນມາຈາກປັດໄຈອັດຕາແລກປ່ຽນ, ການຄຸ້ມຄອງລາຄາ ແລະ ການປ່ຽນແປງດິນຟ້າອາກາດເຊັ່ນ: (1) ທະນາຄານກາງຂອງປະເທດເສດຖະກິດຂະໜາດໃຫຍ່ ໄດ້ປັບຂຶ້ນອັດຕາດອກເບ້ຍນະໂຍບາຍ ເພື່ອຫຼຸດຜ່ອນອັດຕາເງິນເຟີ້ ອັນໄດ້ເຮັດໃຫ້ເງິນຕາແຂງຄ່າຂຶ້ນ ເຊັ່ນດຽວກັນກັບເງິນປະເທດຄູ່ຄ້າກໍອ່ອນຄ່າລົງ ລວມທັງເງິນກີບ ຊຶ່ງກະທົບເຖິງລາຄາສິນຄ້ານໍາເຂົ້າຂອງ ສປປ ລາວ ມີລາຄາສູງຂຶ້ນ; (2) ຖານຜະລິດພາຍໃນ ປະເທດບໍ່ເຂັ້ມແຂງ, ສ່ວນຫຼາຍແມ່ນເອື່ອຍອີງ ແລະນໍາເຂົ້າຈາກຕ່າງປະເທດ ເຊັ່ນ: ສິນຄ້າອຸປະໂພກ, ບໍລິໂພກ, ສິນຄ້າປະເພດປັດໄຈການຜະລິດ, ເຄື່ອງມືວິທະຍາສາດ ແລະພືດຜັກແມ່ນນໍາເຂົ້າຈາກຕ່າງປະເທດ. ດັ່ງນັ້ນເມື່ອລາຄາສິນຄ້າຢູ່ຕ່າງປະເທດສູງຂຶ້ນບວກກັບການອ່ອນຄ່າຂອງເງິນກີບຈຶ່ງສົ່ງຜົນໃຫ້ຕົ້ນທຶນການຜະລິດ ແລະລາຄາສິນຄ້າຢູ່ພາຍຍິ່ງສູງຂຶ້ນ; (3) ຄວາມອາດສາມາດໃນການແຊກແຊງ ແລະຄຸ້ມຄອງຕະຫຼາດອັດຕາແລກປ່ຽນຍັງມີຄວາມຈໍາກັດ, ດັ່ງນັ້ນ ຄ່າຂອງເງິນກີບ ຈຶ່ງອ່ອນຄ່າລົງຕາມຕະຫຼາດ ແລະເມື່ອເງິນກີບອ່ອນຄ່າ ກໍສົ່ງຜົນກະທົບໂດຍກົງໃສ່ສິນຄ້ານໍາເຂົ້າມີລາຄາສູງຂຶ້ນ; (4) ການຄຸ້ມຄອງລາຄາສິນຄ້າຍັງບໍ່ທັນໄດ້ດີ, ພໍ່ຄ້າ ແມ່ຄ້າ ຍັງມີການສວຍໂອກາດປັບຂຶ້ນລາຄາສິນຄ້າໃນທ້ອງຕະຫຼາດ ແລະຫ້າງຮ້ານຕ່າງໆ; (5) ປັດໄຈຈາກການປ່ຽນແປງດິນຟ້າອາກາດເຊັ່ນ: ຝົນຕົກໜ້ອຍເຮັດໃຫ້ຜົນຜະລິດກະສິກໍາບໍ່ສາມາດສະໜອງໄດ້ຕາມຄວາມຕ້ອງການຂອງຕະຫຼາດ.
ຂ່າວ: ຄ. ຄຳປະສິດ

แชร์