ສາລະວັນ-ອຸບົນຣາຊະທານີ ສຳຫຼວດທ່າເຮືອຂ້າມນໍ້າຂອງ

ແຂວງສາລະວັນ ສປປ ລາວ ກັບ ຈັງຫວັດອຸບົນຣາຊະທານີ ປະເທດໄທ ໄດ້ຮ່ວມກັນລົງສຳຫຼວດຈຸດທ່າເຮືອຂ້າມນໍ້າຂອງທ່າດ່ານປາກຕາພານ ເມືອງລະຄອນ ແຂວງສາລະວັນ - ທ່າດ່ານປາກແຊງ ຕຳບົນພະລານ ອຳເພີນາຕານ ຈັງຫວັດອຸບົນຣາຊະທານີ ປະເທດໄທ ໃນ ວັນທີ 5 ກໍລະກົດ ຜ່ານມາ.

ຈຸດປະສົງແມ່ນເພື່ອຈະພັດທະນາ ແລະ ຍົກລະດັບຈາກດ່ານທ້ອງຖິ່ນດັ່ງກ່າວໃຫ້ເປັນດ່ານສາກົນໃນອະນາຄົດ, ການສຳຫຼວດຄັ້ງນີ້ທັງ 2 ຝ່າຍໄດ້ຕົກລົງເຫັນດີຮ່ວມກັນກຳນົດຈຸດສຳຫຼວດເຂດແມ່ນໍ້າຂອງໄທ-ລາວທີ່ມີຊາຍແດນຮ່ວມກັນມີຄວາມກວ້າງນໍ້າຂອງຈຸດດັ່ງກ່າວຈຳນວນ 750 ແມັດ, ຍາວ 1.500 ແມັດ, ກຳນົດເອົາຈຸດໃຈກາງແມ່ນໍ້າຂອງເປັນຈຸດຫຼັກໝາຍຊາຍແດນ, ການສຳຫຼວດແມ່ນໃຊ້ເຄື່ອງວັດແທກລະດັບນໍ້າ, ພື້ນດິນນໍ້າຂອງ, ຈຸດເດີນເຮືອ, ຈຸດຈອດເຮືອ, ການສຳຫຼວດໃຊ້ເວລາ 2 ວັນ ຈຶ່ງສຳເລັດ.

ການປຶກສາຫາລືຄັ້ງນີ້ຝ່າຍແຂວງສາລະວັນ ມີທ່ານ ບົວແພງເພັດ ໂພໄຊ ຫົວໜ້າພະແນກໂຍທາທິການ ແລະ ຂົນສົ່ງແຂວງ ແລະ ຝ່າຍຈັງຫວັດອຸບົນຣາຊະທານີມີທ່ານ ສົມຊາຍ ວອນວຸດທິ ປ້ອງກັນຈັງຫວັດອຸບົນລາຊະທານີພ້ອມດ້ວຍຄະນະວິຊາການເຂົ້າຮ່ວມ, ການພົບປະໄດ້ຈັດຂຶ້ນທີ່ຕຳບົນພະລານອຳເພີນາຕານຈັງຫວັດອຸບົນຣາຊະທານີ (ໄທ).

ການສຳຫຼວດທ່າເຮືອ ຂ້າມນໍ້າຂອງ ທ່າປາກຕະພານ - ທ່າປາກແຊງ ຄັ້ງນີ້ແມ່ນປະຕິບັດຕາມລົງນາມເຊັນບົດບັນທຶກການຮ່ວມມືລະຫວ່າງຄະນະນຳຂັ້ນສູງຂອງແຂວງສາລະວັນ ກັບ ຈັງຫວັດອຸບົນລາຊະທານີ (ໄທ) ຄັ້ງວັນທີ 21 ເມສາ 2023, ຂໍ້ທີ 8. 2. 7 ຊຶ່ງເນື້ອໃນລະບຸວ່າ: ແຂວງສາລະວັນ ກຽມຍົກລະດັບດ່ານທ້ອງຖິ່ນປາກຕາພານ ເມືອງລະຄອນ ໃຫ້ເປັນດ່ານສາກົນ ເພື່ອໃຫ້ສົມຄູ່ກັບດ່ານຖາວອນປາກແຊງ ຕຳບົນພະລານ ອຳເພີນາຕານ ຈັງຫວັດອຸບົນຣາຊະທານີ (ໄທ).
ຂ່າວ-ພາບ: ໂສພາ ສໍພະໄຊ

แชร์