ໂຮງຮຽນ ບູນເພັດວິໄລສັກ ສະຫຼຸບການຮຽນ-ການສອນ

ພິທີສະຫຼຸບການຈັດຕັ້ງປະຕິບັດໂຄງການຫຼັກສູດ ປະຈຳສົກຮຽນ 2022-2023 ໄດ້ຈັດຂຶ້ນໃນວັນທີ 30 ມີຖຸນາ 2022 ຢູ່ທີ່ເດີ່ນໂຮງຮຽນເພັດວິໄລສັກ, ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ເທບພະໄທ ແກ້ວເຂັມເພັດ ຄະນະປະຈຳພັກແຂວງ ປະທານແນວລາວສ້າງຊາດແຂວງວຽງຈັນ ມີທ່ານ ທອງເຄນ ລັດຖະຫວັນ ຮອງຫົວໜ້າພະແນກສຶກສາທິການ ແລະ ກິລາແຂວງວຽງຈັນ, ທ່ານ ຄຳຄ່ອງ ວິໄລວົງ ຮອງຫົວໜ້າຫ້ອງການສຶກສາທິການ ແລະ ກິລາເມືອງວຽງຄຳ, ພ້ອມດ້ວຍບັນດາແຂກຖືກເຊີນຈາກບ້ານ, ໂຮງຮຽນພາກລັດ-ເອກະຊົນ, ພໍ່ແມ່ຜູ້ປົກຄອງນັກຮຽນ, ຄູອາຈານ ແລະນ້ອງນັກຮຽນເຂົ້າຮ່ວມ.

ທ່ານ ອາຈານ ເພັດວິໄລສັກ ພຸດທະສີ ຜູ້ອຳນວຍການໂຮງຮຽນໄດ້ຂຶ້ນຜ່ານບົດສະຫຼຸບການຈັດຕັ້ງການຮຽນ-ການສອນ ແລະທິດທາງປີໃນສົກຮຽນປີ 2022-2023 ວ່າ: ໂຮງຮຽນເພັດວິໄລສັກມີຜູ້ອຳນວຍການພະນັກງານທັງໝົດ 27 ທ່ານ, ໃນນັ້ນລະດັບການສຶກສາສູງສຸດ ປະລິນຍາຕີ ແລະຕໍ່າສຸດຊັ້ນກາງ (ຈົບຝຶກອົບຮົມຄູອະນຸບານອີກ 2 ທ່ານ), ມີອົງປະກອບການຈັດຕັ້ງຄົບຊຸດ. ມີນັກຮຽນທັງໝົດ= 343 ນ້ອງ, ຍິງ 169 ນ້ອງ, ໃນນັ້ນ ຫ້ອງລ້ຽງເດັກມີເດັກ 45 ຄົນ, ຍິງ 19 ຄົນ; ຫ້ອງອະນຸບານມີ 121 ຄົນ, ຍິງ 65 ຄົນ; ຊັ້ນປະຖົມມີ 177 ຄົນ, ຍິງ 85 ຄົນ.

ໃນສົກຮຽນ 2022-2023ນີ້ ການເສັງເລື່ອນຊັ້ນແຕ່ ປ1-ປ4 ໄດ້ 100%, ການສອບເສັງຈົບຊັ້ນປະຖົມທົ່ວເມືອງວຽງຄຳ ເສັງ 100% ໃນນັ້ນສອບເສັງໄດ້ຄະແນນ 7 ຂຶ້ນໄປທຸກວິຊາ 14 ນ້ອງ ເທົ່າກັບ 50% ແຕ່ລະນ້ອງໄດ້ຮັບໃບຊົມເຊີຍຈາກທ່ານເຈົ້າເມືອງວຽງຄຳ. ສົ່ງນັກຮຽນເກັ່ງຊັ້ນປ5 ໄປຮ່ວມສອບເສັງນັກຮຽນເກັ່ງທົ່ວເມືອງວຽງຄຳ6ນ້ອງ ໄດ້5ນ້ອງໃນນັ້ນ ໄດ້ທີ1,2 ວິຊາພາສາລາວ, ທີ1,2 ວິຊາຄະນິດສາດ, ທີ1 ວິຊາໂລກອ້ອມຕົວ; ສົ່ງນັກຮຽນເກັ່ງເຂົ້າຮ່ວມສອບເສັງນັກຮຽນເກັ່ງຂັ້ນແຂວງວຽງຈັນ 5 ນ້ອງ ສາມາດຍາດໄດ້ 4 ນ້ອງ ທີ 1 ວິຊາພາສາລາວ, ທີ 2 ວິຊາພາສາລາວ, ທີ1 ວິຊາຄະນິດສາດ, ທີ1 ວິຊາໂລກອ້ອມຕົວພິເສດນັກຮຽນເກັ່ງ 3 ນ້ອງໄດ້ກາຍເປັນຕົວແທນໃຫ້ນັກຮຽນເກັ່ງທົ່ວແຂວງວຽງຈັນ ໄປຮ່ວມສະເຫຼີມສະຫຼອງວັນເດັກນ້ອຍສາກົນ ແລະທັດສະນະສຶກສາຢູ່ປະເທດຈີນເປັນເວລາ 17ມື້. ນອກນີ້ຍັງໄດ້ສົ່ງນ້ອງນັກຮຽນເຂົ້າຮ່ວມການແຂ່ງນັກກິລາ, ສິນລະປະວັນນະຄະດີໃນງານຕ່າງໆຢູ່ພາຍໃນເມືອງ. ປະຕິບັດນະໂຍບາຍຕໍ່ພະນັກງານຄູອາຈານ ແລະນ້ອງນັກຮຽນທີ່ສອນດີ-ຮຽນເກັ່ງ ແລະ ປະກອບສ່ວນຊ່ວຍເຫຼືອສັງຄົມ ລວມເປັນເງິນທັງໝົດ = 74 ລ້ານກວ່າກີບ.

ໃນພິທີທ່ານ ເທບພະໄທ ແກ້ວເຂມເພັດ ຄະນະປະຈຳພັກແຂວງ ປະທານແນວລາວສ້າງຊາດແຂວງ ຍັງໄດ້ໃຫ້ກຽດມອບໃບຢັ້ງຢືນຈົບຂັ້ນອະນຸບານ ແລະຊັ້ນປະຖົມ ໃຫ້ແກ່ນ້ອງໆໃນຄັ້ງນີ້ດ້ວຍ.

แชร์