ມອບ-ຮັບນໍ້າມັນເຊື້ອໄຟມາຈໍາໜ່າຍຕາມຮູບແບບຂາຍຍົກ ແລະຂາຍຍ່ອຍຢູ່ ສປປ ລາວ

ພາຍຫຼັງທີ່ທາງບໍລິສັດ ລັດວິສາຫະກິດນໍ້າມັນເຊື້ອໄຟວຽງຈັນ ກົມໃຫຍ່ພະລາທິການກອງທັບ, ໄດ້ຕົກລົງເຫັນດີເຊັນບົດບັນທຶກຄວາມເຂົ້າໃຈ (MOU) ກັບ ບໍລິສັດ ຊິໂນລາວ ລົງທຶນ ຈໍາກັດ, ກ່ຽວກັບການຮ່ວມມືທຸລະກິດນໍາເຂົ້ານໍ້າມັນເຊື້ອໄຟມາຈໍາໜ່າຍຕາມຮູບແບບຂາຍຍົກ ແລະຂາຍຍ່ອຍ ຢູ່ ສປປ ລາວ.

ໃນວັນທີ 26 ພຶດສະພາ ຜ່ານມາ, ບໍລິສັດ ຊິໂນລາວ ລົງທຶນ ຈໍາກັດ ຈຶ່ງໄດ້ປະຕິບັດຕາມຂໍ້ຕົກລົງດັ່ງກ່າວ ແລະໄດ້ປະສານງານກັບ ບໍລິສັດ ຊິນໂນເພັກຮົງກົງ ສປ ຈີນ, ຈັດສົ່ງນໍາເຂົ້ານໍ້າມັນເຊື້ອໄຟປະເພດຊະນິດຕ່າງໆ, ຕາມຈໍານວນ ແລະມູນຄ່າ ໂດຍພາຍໃຕ້ບັນດາຂໍ້ກໍານົດ ແລະເງື່ອນໄຂຕ່າງໆ ຂອງສັນຍາທີ່ລະບຸໄວ້ແຕ່ລະມາດຕາຢ່າງເຂັ້ມງວດ ແລະຖືກຕ້ອງ, ດັ່ງນັ້ນມາ ໃນວັນທີ 27 ມິຖຸນາ ຜ່ານມາ, ບໍລິສັດ ຊິນໂນເພັກຮົງກົງ ສປ ຈີນ ຈຶ່ງໄດ້ຈັດສົ່ງ, ມອບ-ຮັບນໍ້າມັນໃຫ້ແກ່ ບໍລິສັດລັດວິສາຫະກິດນໍ້າມັນເຊື້ອໄຟວຽງຈັນ ແລະບໍລິສັດ ຊິໂນລາວ ລົງທຶນຈໍາກັດ ຢູ່ດ່ານສາກົນບໍ່ເຕ່ນ ແຂວງຫຼວງນໍ້າທາ,ພິທີມອບ-ຮັບດັ່ງກ່າວ ລະຫວ່າງ ທ່ານ ພັນເອກ ບຸນທົງ ກອງເທດມະນີ ຫົວໜ້າອໍານວຍການບໍລິສັດລັດວິສາຫະກິດນໍ້າມັນເຊື້ອໄຟວຽງຈັນ ແລະ ທ່ານ ນາງ ເຕືອນໃຈ ໄຊຍະສອນ ປະທານບໍລິສັດ ຊິໂນລາວ ລົງທຶນຈໍາກັດ ແລະບໍລິສັດ ຊິໂນເພັກ ຮົງກົງ ສປ ຈີນ ມີຫົວໜ້າຄະນະປັບປຸງຫົວ ໜ່ວຍການຜະລິດ-ທຸລະກິດ ທີ່ຂຶ້ນກັບກົມໃຫຍ່ພະລາທິການກອງທັບ ແລະ ພະນັກງານບໍລິສັດທີ່ກ່ຽວຂ້ອງເຂົ້າຮ່ວມ.
ຂ່າວ-ພາບ: ຄໍາປະສົງ ລາດຊະວົງ.

• 05/07/2023