ຫຼວງນໍ້າທາ ແລະສິບສອງພັນນາ ຮ່ວມມືດ້ານກະສິກຳ 5​ ປີ

ແຫລ່ງຂ່າວຈາກ ແຂວງຫລວງນໍ້າທາ ໃຫ້ຮູ້ວ່າ: ພະແນກກະສິກຳ ແລະ ປ່າໄມ້ ແຂວງຫລວງນໍ້າໄດ້ເຊັນສັນຍາການຮ່ວມມືດ້ານກະສິກຳ ກັບຫ້ອງການກະສິກຳ ແລະ ຊົນນະບົດ ສິບສອງພັນນາ ແຂວງຢູນນານ ແຫ່ງ ສປ ຈີນໃນທ້າຍອາທິດຜ່ານມາ. ຕາງໜ້າລົງນາມຄັ້ງນີ້ໂດຍທ່ານ ພິມແກ້ວ ທຳລະສີນ ຫົວໜ້າພະແນກ ກະສິກຳ ແລະປ່າໄມ້ ແຂວງຫລວງນໍ້າທາ ແລະທ່ານ ຮວງຊີງສຽງ ຮອງຫົວໜ້າຫ້ອງການກະສິກຳ ແລະຊົນນະບົດ ສິບສອງພັນນາ ແຂວງຢູນນານ.

ທ່ານ ສາຍຄຳ ສົມຫວັງ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຫລວງນໍ້າທາ ໄດ້ໃຫ້ຮູ້ວ່າ: ຈຸດປະສົງເພື່ອເປັນການສົ່ງເສີມການແລກປ່ຽນດ້ານເຕັກນິກກະສິກຳ, ສົ່ງເສີມການລ້ຽງໃຫ້ແກ່ນັກວິຊາການ ແລະ ຊາວກະສິກອນຂັ້ນແຂວງ, ເມືອງ ແລະບ້ານໂດຍການຈັດຝຶກອົບຮົມດ້ານເຕັກນິກກະສິກຳການປູກ-ລ້ຽງສັດ ການປັບປຸງແນວພັນສັດ ການເພາະພັນປາທີ່ດີເດັ່ນ ແລະ ການດຳເນີນການປ້ອງກັນພະຍາດພືດ ແລະສັດຢູ່ຕາມຊາຍແດນເຊິ່ງສັນຍາດັ່ງກ່າວມີກຳນົດຈັດຕັ້ງປະຕິບັດເປັນເວລາ 5 ປີ.

ນອກຈາກນີ້, ຍັງໄດ້ດໍາເນີນການທົດລອງສາທິດ ແລະສົ່ງເສີມເຕັກນິກວິທະຍາສາດທີ່ທັນສະໄໝເຂົ້າໃນການຜະລິດກະສິກຳດຳເນີນການປູກພືດ-ການລ້ຽງ ເພື່ອດຶງດູດວິສາຫະກິດເຂົ້າມາສົ່ງເສີມພັດທະນາແບບກະສິກຳໃນທ້ອງຖິ່ນ, ສົ່ງເສີມຄວາມກ້າວໜ້າດ້ານເຕັກນິກກະສິກຳ, ພັດທະນາເສດຖະກິດການກະເສດຕາມໜຶ່ງແລວທາງໜຶ່ງເສັ້ນທາງຂອງສອງຝ່າຍ,ເພື່ອເຮັດໃຫ້ການຄ້າຂາຍຜົນຜະລິດກະສິກຳ ແລະສົ່ງເສີມການພັດທະນາດ້ານກະສິກຳພາຍໃນມື້ນັບດີຂຶ້ນ.

• 05/07/2023