ສື່ມວນຊົນລຸ່ມແມ່ນໍ້າຂອງຕ້ອງຮ່ວມກັນສົ່ງເສີມການທ່ອງທ່ຽວຍູ້ແຮງເສດຖະກິດພາກພື້ນ

ໂດຍ: ສ.ບຸດປະຊາຊາ
ໃນຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ 6 ປະເທດ ທີ່ກຳລັງເລັ່ງການຟື້ນຟູເສດຖະກິດ; ສື່ມວນຊົນຂອງບັນດາປະເທດລຸ່ມແມ່ນໍ້າຂອງນີ້ນອກຈາກຈະຕ້ອງຮ່ວມມືກັນຊຸກຍູ້ການການຄ້າໃນພາກພື້ນໃຫ້ຂະຫຍາຍຕົວ, ຮັບປະກັນໃຫ້ມີການເຄື່ອນຍ້າຍສິນຄ້າຢ່າງເສລີ, ຍັງຕ້ອງສົ່ງເສີມການເຊື່ອມຈອດດ້ານພື້ນຖານໂຄງລ່າງ ແລະມີການແລກປ່ຽນດ້ານທ່ອງທ່ຽວຢ່າງເປັນປົກກະຕິຊຶ່ງການສົ່ງເສີມການທ່ອງທ່ຽວ ແລະການໄປມາຫາສູ່ຂອງປະຊາຊົນ ແມ່ນໜຶ່ງໃນປັດໄຈຮັບປະກັນການຟື້ນຟູເສດຖະກິດຂອງພາກພື້ນ.

ກອງປະຊຸມສຸດຍອດການຮ່ວມມືດ້ານສື່ມວນຊົນ ແມ່ນໍ້າຂອງ-ແມ່ນໍ້າລ້ານຊ້າງ ປີ 2023 ໄດ້ຈັດຂຶ້ນໃນວັນທີ 27 ມິຖຸນາ ຜ່ານມານີ້ ທີ່ປັກກິ່ງ ສປ ຈີນ; ທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວ ແຫ່ງ ສປປ ລາວ ໄດ້ກ່າວໃນເວທີເສວະນາ ພາຍໃຕ້ຫົວຂໍ້ “ຍູ້ແຮງເສດຖະກິດພາກພື້ນ ເພື່ອຜົນປະໂຫຍດຮ່ວມກັນ” ໂດຍໃຫ້ທັດສະນະວ່າ: ຫົວຂໍ້ດັ່ງກ່າວນີ້, ແມ່ນມີຄວາມໝາຍຫຼາຍ ແລະ ແທດເໝາະກັບສະພາບຄວາມເປັນຈິງ ແລະເກີດຂຶ້ນທ່າມກາງທີ່ໂລກກໍາລັງປະເຊີນໜ້າກັບສິ່ງທ້າທ້າຍຕ່າງໆ ລວມເຖິງຄວາມຕ້ອງການອັນຮີບດ່ວນໃນການຟື້ນຟູເສດຖະກິດ ທີ່ກະທົບຈາກການລະບາດຂອງພະຍາດໂຄວິດ-19 ຊຶ່ງພວມດຳເນີນໄປທ່າມກາງຄວາມບໍ່ແນ່ນອນຂອງໂລກ, ຄວາມຕົກຕໍ່າທາງດ້ານເສດຖະກິດ, ວິກິດການພະລັງງານ, ແລະການຂັດແຍ່ງທາງການທະຫານ.

ດັ່ງທີ່ພວກເຮົາຮູ້ນໍາກັນແລ້ວວ່າ: ການລະບາດຂອງພະຍາດໂຄວິດ-19 ເຮັດໃຫ້ເສດຖະກິດສ່ວນໃຫຍ່ຂອງໂລກຕົກຢູ່ໃນວິກິດ ແລະກາຍເປັນອໍາມະພາດ. ສໍາລັບໃນປະເທດລາວ, ການລະບາດຂອງພະຍາດໄດ້ສົ່ງຜົນກະທົບຢ່າງໜັກໜ່ວງຕໍ່ເສດຖະກິດຂອງປະເທດທີ່ມີຄວາມບອບບາງຢູ່ແລ້ວໄດ້ເກີດມີບັນຫາ. ອີງຕາມການຄາດຄະເນຂອງທະນາຄານໂລກໃນເວລານັ້ນ ເສດຖະກິດຂອງລາວ ມີການເຕີບໂຕພຽງແຕ່ 0,5% ຊຶ່ງເປັນລະດັບຕໍ່າສຸດໃນທົດສະວັດທີ່ຜ່ານມາ. ນອກຈາກນັ້ນ, ການຈໍາກັດການເດີນທາງໃນທົ່ວໂລກໃນໄລຍະການລະບາດຂອງພະຍາດໄດ້ສ້າງຄວາມເສຍຫາຍຢ່າງໃຫຍ່ຫຼວງຕໍ່ອຸດສາຫະກໍາການທ່ອງທ່ຽວຂອງປະເທດທີ່ເປັນໜຶ່ງໃນໂຕຂັບເຄື່ອນເສດຖະກິດຂອງລາວ ແລະເປັນແຫຼ່ງລາຍຮັບເງິນຕາຕ່າງປະເທດທີ່ສໍາຄັນຂອງຊາດ.

ການພັດທະນາພື້ນຟູເສດຖະກິດຂອງລາວກໍຄືການພື້ນຟູເສດຖະກິດຂອງພາກພື້ນ ແລະເພື່ອເລັ່ງລັດການຟື້ນຟູເສດຖະກິດຂອງພາກພື້ນ, ທ່ານ ສະຫວັນຄອນ ຣາຊມຸນຕຣີ ໄດ້ເນັ້ນໜັກເຖິງຄວາມຈໍາເປັນທີ່ຈະຕ້ອງຮ່ວມມືກັນຊຸກຍູ້ການຄ້າໃນພາກພື້ນໃຫ້ຂະຫຍາຍຕົວ, ຮັບປະກັນໃຫ້ມີການເຄື່ອນຍ້າຍສິນຄ້າຢ່າງເສລີ, ຕ້ອງສົ່ງເສີມການເຊື່ອມຈອດດ້ານພື້ນຖານໂຄງລ່າງ ແລະ ມີການແລກປ່ຽນດ້ານທ່ອງທ່ຽວຢ່າງເປັນປົກກະຕິ. ການຟື້ນຟູເສດຖະກິດທົ່ວໂລກ ແລະ ພາກພື້ນຈະເກີດຂຶ້ນບໍ່ໄດ້ ຖ້າຫາກຄວາມຂັດແຍ່ງດ້ານການຄ້າຍັງສືບຕໍ່. ສໍາລັບປະເທດລາວພວມຕັ້ງໜາຊຸກຍູ້ການຮ່ວມມືດ້ານເສດຖະກິດກັບສາກົນ ແລະປະເທດອ້ອມຂ້າງຊຶ່ງນັບແຕ່ການແຜ່ລະບາດຂອງພະຍາດໂຄວິດ-19 ເບົາບາງລົງ ແລະ ການເປີດປະເທດ 100%, ສປປ ລາວ ສາມາດດຶງດູດນັກທ່ອງທ່ຽວຕ່າງປະເທດເຂົ້າມາເປັນຈໍານວນຫຼວງຫຼາຍ ໄດ້ຊ່ວຍເພີ່ມປະລິມານຄັງສໍາຮອງເງິນຕາຕ່າງປະເທດ, ສ້າງວຽກເຮັດງານທໍາ ແລະ ລາຍຮັບໃຫ້ແກ່ປະຊາຊົນລາວ. ອີງຕາມການລາຍງານ ຂອງກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ ໃຫ້ຮູ້ວ່າ: ໃນ 3 ເດືອນຕົ້ນປີນີ້, ມີນັກທ່ອງທ່ຽວເຂົ້າມາລາວທັງໝົດ 800.000 ຄົນ; ໃນນັ້ນ, ສ່ວນຫຼາຍແມ່ນມາຈາກໄທ, ຫວຽດນາມ ແລະຈີນ. ປີນີ້ ສປປ ລາວ ຄາດວ່າຈະໄດ້ຮັບນັກທ່ອງທ່ຽວທັງໝົດ 1,4 ລ້ານຄົນ, ຄາດຄະເນລາຍຮັບປະມານ 340 ລ້ານໂດລາ.
ເປັນທີ່ໜ້າສົນໃຈຄືຈໍານວນນັກທ່ອງທ່ຽວຈີນທີ່ມາທ່ຽວລາວໄດ້ເພີ່ມຂຶ້ນຫຼາຍ ແລະບັນລຸລະດັບທີ່ບໍ່ເຄີຍມີມາກ່ອນ ຊຶ່ງສະຖິຕິໃນ 3 ເດືອນຕົ້ນປີສູງເຖິງ 7.000 ກວ່າຄົນ. ສິ່ງດັ່ງກ່າວເກີດຂຶ້ນເນື່ອງຈາກຈີນຜ່ອນຄາຍຂໍ້ຈໍາກັດ ໃນການເດີນທາງອອກນອກປະເທດຂອງພົນລະເມືອງຈີນ ເຮັດໃຫ້ນັກທ່ອງທ່ຽວຈີນສາມາດເດີນທາງໄປໃນພາກພື້ນໄດ້ຢ່າງເສລີຫຼາຍຂຶ້ນ ແລະ ການເປີດທາງລົດໄຟລາວ-ຈີນ ເປັນສິ່ງໜຶ່ງທີ່ສ້າງຄວາມສະດວກສະບາຍ ຕໍ່ການເດີນທາງຂອງນັກທ່ອງທ່ຽວຈີນ ແລະ ດຶງດູດໃຫ້ຄົນຈີນມາທ່ຽວລາວຫຼາຍຂຶ້ນ. ປີນີ້, ທາງການລາວຄາດວ່າຈະຕ້ອນຮັບຊາວຈີນປະມານ 368.000 ຄົນ, ເພີ່ມຂຶ້ນ 21% ເມື່ອທຽບໃສ່ປີກາຍ; ໃນປີ 2019, ມີນັກທ່ອງທ່ຽວຈີນປະມານ 1 ລ້ານຄົນເຂົ້າມາລາວ, ກວມເອົາ 21% ຂອງນັກທ່ອງທ່ຽວຕ່າງປະເທດທັງໝົດ.

ທ່ານປະທານສະມາຄົມນັກຂ່າວ ໃຫ້ທັດສະນະວ່າ: ຈາກປະສົບການທີ່ຜ່ານມາ, ເຫັນວ່າຄວາມຂັດແຍ່ງດ້ານການຄ້າບໍ່ພຽງສ້າງຄວາມບໍ່ມີສະຖຽນລະພາບຕໍ່ລະບົບເສດຖະກິດໂລກ, ມັນກໍ່ໃຫ້ເກີດບັນຫາສັງຄົມ ແລະ ຄວາມທຸກຍາກຂອງປະຊາຊົນ. ດັ່ງນັ້ນ, ປະຊາຄົມໂລກຂອງພວກເຮົາຕ້ອງສົມທົບກັນສ້າງສະພາບແວດລ້ອມທີ່ອໍານວຍໃຫ້ແກ່ການຮ່ວມມືດ້ານເສດຖະກິດ,ການຄ້າ, ການລົງທຶນ ແລະການທ່ອງທ່ຽວ. ເພື່ອບັນລຸໄດ້ສິ່ງດັ່ງກ່າວ, ຕ້ອງຮ່ວມກັນສ້າງລະບຽບການດ້ານການຄ້າຂອງພາກພື້ນ ເພື່ອຮັບປະກັນຜົນປະໂຫຍດຮ່ວມກັນ.

ສະນັ້ນ, ສື່ມວນຊົນໃນບັນດາປະເທດລຸ່ມແມ່ນໍ້າຂອງນອກຈາກຈະຕ້ອງຮ່ວມກັນໂຄສະນາສົ່ງເສີມການສ້າງພື້ນຖານໂຄງລ່າງດ້ານຄົມມະນາຄົມຂົນສົ່ງໃຫ້ພຽງພໍເພື່ອຊຸກຍູ້ການຄ້າໃນພາກພື້ນໃຫ້ຂະຫຍາຍຕົວ, ຮັບປະກັນໃຫ້ມີການເຄື່ອນຍ້າຍສິນຄ້າຢ່າງເສລີ; ຍັງຕ້ອງຮ່ວມກັນສົ່ງເສີມແລກປ່ຽນນັກທ່ອງທ່ຽວ ແລະການໄປມາຫາສູ່ຂອງປະຊາຊົນເພາະມັນແມ່ນໜຶ່ງໃນປັດໄຈຮັບປະກັນການຟື້ນຟູເສດຖະກິດຂອງພາກພື້ນຊຶ່ງຈະປະກອບສ່ວນສຳຄັນໃນການຍູ້ແຮງການຟື້ນຟູເສດຖະກິດພາກພື້ນ ເພື່ອໃຫ້ເກີດຜົນປະໂຫຍດຮ່ວມກັນ.

ທີ່ມາ: ຫນັງສືພິມປະຊາຊົນ

แชร์