2 ປີເຄິ່ງ ຫົວໜ່ວຍທຸລະກິດເຂົ້າເປັນສະມາຊິກປະກັນສັງຄົມ 3.178 ຫົວໜ່ວຍ

ທ່ານ ນາງ ໃບຄຳ ຂັດທິຍະ ລັດຖະມົນຕີກະຊວງແຮງງານ ແລະສະຫວັດດີການສັງຄົມ (ຮສສ) ໄດ້ສະເໜີບົດລາຍງານກ່ຽວກັບການຈັດຕັ້ງປະຕິບັດຍຸດທະສາດການປົກປ້ອງສັງຄົມແຫ່ງຊາດຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດຊຸດທີ IX ໃນວັນທີ 30 ມິຖຸນານີ້ວ່າ: ອີງຕາມຜົນການສຳຫຼວດເສດຖະກິດທົ່ວປະເທດຄັ້ງທີ 3 ປີ 2020 ມີຫົວ ໜ່ວຍທຸລະກິດທັງໝົດ 133.997 ຫົວໜ່ວຍ,ມີຜູ້ອອກແຮງງານ 490.373 ຄົນ ຊຶ່ງໃນໄລຍະ 2 ປີເຄິ່ງຜ່ານມາມີຫົວໜ່ວຍທຸລະກິດເຂົ້າເປັນສະມາຊິກປະກັນສັງຄົມທັງໝົດ 3.178 ຫົວໜ່ວຍ ເທົ່າກັບ 2,37% ຂອງຫົວໜ່ວຍແຮງງານ (133.997 ຫົວໜ່ວຍ), ມີຜູ້ອອກແຮງງານໃນຫົວໜ່ວຍທຸລະກິດທີ່ເຂົ້າເປັນສະມາຊິກປະກັນສັງຄົມ ແລະ ຈ່າຍເງິນສົມທົບເຂົ້າກອງທຶນປະກັນສັງຄົມທັງໝົດ 148.842 ຄົນ ເທົ່າກັບ 30,35% ຂອງຜູ້ອອກແຮງງານ (490.373 ຄົນ).

ຄຽງຄູ່ກັບການຂະຫຍາຍອັດຕາການປົກຄຸມ ແລະການປະຕິບັດນະໂຍບາຍປະກັນສັງຄົມປະເພດຕ່າງໆແລ້ວຍັງໄດ້ປັບປຸງຂັ້ນຕອນການຂຶ້ນທະບຽນປະກັນສັງຄົມສຳລັບຫົວໜ່ວຍທຸລະກິດໃຫ້ໄວຂຶ້ນ. ປັດຈຸບັນມີຜູ້ປະກັນຕົນທັງໝົດ 348.124 ຄົນ ພາກລັດ 176.833 ຄົນ ຍິງ 83.678 ຄົນ, ພາກວິສາຫະກິດ 148.842 ຄົນ ຍິງ 71.695 ຄົນ ແລະຜູ້ສະໝັກໃຈ 22.449 ຄົນ ຍິງ 9.687 ຄົນ. ສັງລວມແລ້ວມີຜູ້ປະກັນຕົນ ແລະ ສະມາຊິກຄອບຄົວຂອງເຂົາເຈົ້າທີ່ເກີດສິດທັງໝົດ 827.686 ຄົນ ຍິງ 430.510 ຄົນ ເທົ່າກັບ 11,18% (ທຽບໃສ່ພົນລະເມືອງໃນປີ 2022 ຈຳນວນ 7,4 ລ້ານຄົນ).

ທ່ານໃຫ້ຮູ້ອີກວ່າ: ແຕ່ນີ້ຮອດປີ 2025 ລະບົບປົກປ້ອງສັງຄົມຈະໄດ້ຮັບການພັດທະນາໃຫ້ມີຄວາມເຂັ້ມແຂງ ແລະ ມີປະສິດທິພາບດີຂຶ້ນໂດຍມີເປົ້າໝາຍໃນການໃຫ້ບໍລິການປົກປ້ອງສັງຄົມໃຫ້ກວມເອົາກຸ່ມເປົ້າໝາຍຢ່າງກວ້າງຂວາງກວ່າເກົ່າ ແລະມີມາດຕະຖານດ້ານການບໍລິການທີ່ມີຄຸນນະພາບທີ່ດີຂຶ້ນຊຶ່ງໄດ້ກຳນົດ 3 ເປົ້າ ໝາຍຫຼັກເພື່ອຂະຫຍາຍການປົກຄຸມຕາມກຸ່ມເປົ້າໝາຍໃນການເຂົ້າເຖິງການບໍລິການປົກປ້ອງສັງຄົມໃຫ້ມີປະສິດທິຜົນ ດັ່ງນີ້: 1) ພັດທະນາ ແລະສ້າງຄວາມເຂັ້ມແຂງໃຫ້ລະບົບປະກັນສຸຂະພາບ; 2) ພັດທະນາ ແລະ ສ້າງຄວາມເຂັ້ມແຂງໃຫ້ລະບົບປະກັນສັງຄົມ ແລະ 3) ພັດທະນາ ແລະສ້າງຄວາມເຂັ້ມແຂງໃຫ້ລະບົບສະຫວັດດີການສັງຄົມຊຶ່ງປະກອບມີ 20 ກິດຈະກໍາ. ຮອດປີ 2030 ປະຊາຊົນລາວຕາມກຸ່ມເປົ້າໝາຍຕ່າງໆໄດ້ຮັບການເຂົ້າເຖິງການບໍລິການລະບົບປົກປ້ອງສັງຄົມດ້ານການປະກັນສຸຂະພາບ, ການປະກັນສັງຄົມ ແລະສະຫວັດດີການສັງຄົມຂັ້ນພື້ນຖານຢ່າງກວ້າງຂວາງ, ສະເໝີພາບ, ມີປະສິດທິພາບ ແລະຄວາມຍືນຍົງ. ພ້ອມທັງເອົາໃຈໃສ່ປັບປຸງລະບົບການເກັບທຶນສົມທົບຂອງປະກັນສັງຄົມດ້ວຍການຫັນເປັນທັນສະໄໝເທື່ອລະກ້າວ.

ຜ່ານການຈັດຕັ້ງປະຕິບັດໃນໄລຍະ 2 ປີເຄິ່ງຜ່ານມາເຫັນວ່າຜູ້ສະໝັກໃຈໄດ້ມີທ່າອ່ຽງເພີ່ມຂຶ້ນຈາກ 5.401 ຄົນ ຂຶ້ນເປັນ 22.449 ຄົນ. ໃນປັດຈຸບັນໂດຍໄດ້ຮັບການສະໜັບສະໜູນຈາກອົງການຈັດຕັ້ງສາກົນໄດ້ລິເລີ່ມເຮັດໂຄງການທົດລອງດ້ວຍການໂຄສະນາ ແລະສະໜອງຂໍ້ມູນກ່ຽວກັບສິດ ແລະຜົນປະໂຫຍດດ້ານປະກັນສັງຄົມໃຫ້ແກ່ຜູ້ປະກອບອາຊີບອິດສະຫຼະໃນຂົງເຂດກະສິກຳຢູ່ 34 ບ້ານ, 3 ເມືອງ ແລະ 3 ແຂວງຄື: ແຂວງສາລະວັນ, ເຊກອງ ແລະຈຳປາສັກ ຊຶ່ງກວມເອົາຊາວກະສິກອນຈຳນວນ 2.454 ຄົນ ຍິງ 1.293 ຄົນ ແນໃສ່ສ້າງຄວາມເຂົ້າໃຈ ແລະສ້າງເງື່ອນໄຂໃຫ້ເຂົາເຈົ້າໄດ້ຮັບການຄຸ້ມຄອງຈາກລະບົບປະກັນສັງຄົມໃນຕໍ່ໜ້າຢ່າງຍືນຍົງ.

ທີ່ມາ: ປະຊາຊົນ

แชร์