ຝຶກອົບຮົມຫຼັກສູດຜູ້ບໍລິຫານຄຸນນະພາບ ເພື່ອການບໍຫານແບບມືອາຊີບ ຄັ້ງທີ 2

ເພື່ອເປັນການເປີດໂອກາດໃຫ້ແກ່ສະມາຊິກສະພາບໍລິຫານ ແລະຜູ້ບໍລິຫານຂັ້ນສູງຂອງບໍລິສັດ ໃນ ສປປ ລາວ ໄດ້ມີໂອກາດຮຽນຮູ້ ແລະເຂົ້າໃຈກ່ຽວກັບພາລະບົດບາດ ແລະໜ້າທີ່ຕົ້ນຕໍ ຂອງປະທານ ແລະສະມາຊິກສະພາບໍລິຫານໃຫ້ເລິກເຊິ່ງ,ພ້ອມທັງຮັບປະກັນຜົນການດຳເນີນງານ ແລະການຂະຫຍາຍຕົວຂອງບໍລິສັດໃຫ້ມີປະສິດທິຜົນໄດ້ຕາມລະດັບຄາດໝາຍຂອງແຜນທຸລະກິດທີ່ວາງໄວ້ໂດຍສະເພາະແມ່ນບໍລິສັດທີ່ຈົດທະບຽນໃນຕະຫຼາດຫຼັກຊັບລາວ.

ສະນັ້ນ, ໃນລະຫວ່າງວັນທີ 27-28 ມິຖຸນາ 2023 ທີ່ຫ້ອງປະຊຸມໃຫຍ່ຕະຫຼາດຫຼັກຊັບລາວໂດຍການສະໜັບສະໜູນຈາກລັດຖະບານລຸກຊໍາບວກ (ໂຄງການ Lao/032),ສຳນັກງານຄະນະກຳມະການຄຸ້ມຄອງຫຼັກຊັບຮ່ວມກັບສະຖາບັນການທະນາຄານໄດ້ຈັດຕັ້ງໂຄງການຝຶກອົບຮົມສຳລັບຜູ້ບໍລິຫານທີ່ມີຄຸນະພາບ ( 2nd Board Leadership Program) ຄັ້ງທີ 2 ຂຶ້ນ ຊຶ່ງເປັນເຈົ້າການໃນການຈັດຕັ້ງປະຕິບັດທັງໝົດ ແລະ ສອນໂດຍຄູຝຶກຜູ້ຊົງຄຸນນະວຸດພາຍໃນປະເທດທັງໝົດ, ພາຍໃຕ້ການເປັນປະທານຮ່ວມຂອງ ທ່ານ ນ. ຟອງຈິນດາ ແສງສຸລິວົງ ຫົວໜ້າສໍານັກງານ ຄະນະກໍາມະການຄຸ້ມຄອງຫຼັກຊັບ ແລະທ່ານ ປອ ອາຄົມ ປຣະເສີດ ຜູ້ອຳນວຍການ ສະຖາບັນ ການທະນາຄານ ກອງປະຊຸມດັ່ງກ່າວປະກອບດ້ວຍ ຜູ້ເຂົ້າຮ່ວມຂັ້ນບໍລິຫານຂອງຫຼາກຫຼາຍພາກສ່ວນ ທັງພາກທຸລະກິດ ແລະ ພາກລັດ ທັງໝົດ 40 ທ່ານ.

ກອງປະຊຸມໃນຄັ້ງນີ້ໄດ້ດຳເນີນໄປເວລາ 2 ວັນ ແລະແລກປ່ຽນບົດຮຽນຮ່ວມກັນ 4 ພາກຄື: ການຄຸ້ມຄອງບໍລິຫານແບບມືອາຊີບ ນຳສະເໜີໂດຍ: ທ່ານ ວັນແສງ ວັນນະວົງ ຮັກສາການຜູ້ອຳນວຍການ ບໍລິສັດ ຜະລິດ-ໄຟຟ້າລາວ ມະຫາຊົນ; ສະພາບໍລິຫານທີ່ມີປະສິດທິພາບນຳສະເໜີໂດຍ: ທ່ານ ແກ້ວວິສຸກ ດາລສານ, ຍຸດທະສາດ ແລະການບໍລິຫານຄວາມສ່ຽງຂອງບໍລິສັດສຳລັບສະມາຊິກສະພາບໍລິຫານນຳສະເໜີໂດຍ: ທ່ານສອນໄຊ ສີລາເພັດ, ການລາຍງານ ແລະເປີດເຜີຍຂໍ້ມູນ ນຳສະເໜີໂດຍ: ທ່ານ ຮ.ສ ເດດພູວົງ ມູລຣັຕນ໌

แชร์