ສະເຫຼີມສະຫຼອງວັນລັດຖະສະພາໂລກ

ພິທີສະເຫຼີມສະຫຼອງວັນລັດຖະສະພາໂລກໄດ້ຈັດຂຶ້ນໃນວັນທີ 30 ມິຖຸນານີ້, ທີ່ຫ້ອງປະຊຸມສະພາແຫ່ງຊາດໂດຍການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດປະທານຄະນະສະຫະພັນລັດຖະສະພາສາກົນຂອງສະພາແຫ່ງຊາດລາວ,ເຂົ້າຮ່ວມມີບັນດາທ່ານຄະນະປະທານກອງປະຊຸມສະພາແຫ່ງຊາດ, ບັນດາທ່ານສະມາຊິກສະພາ.

ໃນພິທີດັ່ງກ່າວ, ທ່ານ ໄຊສົມພອນ ພົມວິຫານ ກ່າວວ່າ: ມື້ນີ້, ເນື່ອງໃນໂອກາດວັນລັດຖະສະພາໂລກ (International Day of Parliamentarism) ແລະ ວັນສ້າງຕັ້ງສະຫະພັນລັດຖະສະພາສາກົນ (IPU) ຄົບຮອບ 134 ປີ (30 ມິຖຸນາ 1889 - 30 ມິຖຸນາ 2023), ໃນນາມປະທານສະພາແຫ່ງຊາດ ແລະ ປະທານຄະນະສະຫະພັນລັດຖະສະພາສາກົນຂອງ ສປປ ລາວ, ຂ້າພະເຈົ້າຂໍສົ່ງຄວາມຊົມເຊີຍ ແລະພອນໄຊອັນປະເສີດ ໄປຍັງບັນດາການນຳ,ສະມາຊິກລັດຖະສະພາປະເທດສະມາຊິກ IPU ທຸກທົ່ວໜ້າ ແລະບັນດາສະມາຊິກສະພາແຫ່ງຊາດຊຸດທີ IX ຂອງ ສປປ ລາວ ຢ່າງສຸດອົກສຸດໃຈ. ສະຫະພັນລັດຖະສະພາສາກົນແມ່ນອົງການລັດຖະສະພາລະດັບໂລກ ມີສະມາຊິກທັງໝົດ 178 ປະເທດ ແລະ ມີອົງການຈັດຕັ້ງສາກົນ ເປັນພາຄີ 14 ອົງການ ໂດຍມີຈຸດປະສົງເພື່ອສ້າງເປັນເວທີສົ່ງເສີມການຕິດຕໍ່ພົວພັນ,ການປະສານງານ ແລະການແລກປ່ຽນປະສົບການລະຫວ່າງລັດຖະສະພາ ແລະສະມາຊິກລັດຖະສະພາບັນດາປະເທດໃນໂລກ, ພິຈາລະນາບັນຫາສໍາຄັນຂອງໂລກ, ສົ່ງເສີມການປົກຄອງດ້ວຍລະບຽບກົດໝາຍ, ສົ່ງເສີມບົດບາດຍິງ-ຊາຍ ແລະຊາວໜຸ່ມ, ສົ່ງເສີມສັນຕິພາບ, ມິດຕະພາບ ແລະການຮ່ວມມື ເພື່ອການພັດທະນາແບບຍືນຍົງຢູ່ໃນບັນດາປະເທດສະມາຊິກ IPU.

ນັບແຕ່ໄດ້ເຂົ້າເປັນສະມາຊິກສະຫະພັນລັດຖະສະພາສາກົນ, ໃນວັນທີ 4 ເມສາ 1990 ເປັນຕົ້ນມາ, ສະພາແຫ່ງຊາດລາວໄດ້ຕັ້ງໜ້າເຂົ້າຮ່ວມເຄື່ອນໄຫວຢ່າງຫ້າວຫັນໃນກອງປະຊຸມໃຫຍ່ ແລະກອງປະຊຸມລະດັບຕ່າງໆ ຂອງສະຫະພັນລັດຖະສະພາສາກົນ, ເປັນການເຜີຍແຜ່ແນວທາງນະໂຍບາຍຂອງພັກ-ລັດຖະບານ ສປປ ລາວ ທັງເປັນການປະກອບສ່ວນອັນສຳຄັນເຂົ້າໃນການສົ່ງເສີມສັນຕິພາບ, ສະຖຽນລະພາບ ແລະຄວາມໝັ້ນຄົງໃນພາກພື້ນ ແລະໃນໂລກ.

ທ່ານກ່າວຕື່ມວ່າ: ເປັນທີ່ຮູ້ກັນດີວ່າ ໃນກອງປະຊຸມສະຫະພັນລັດຖະສະພາສາກົນ ຄັ້ງທີ 129 ແລະກອງປະຊຸມສະມັດຊາໃຫຍ່ ສະຫະປະຊາຊາດ ໃນປີ 2018 ໄດ້ມີການຮັບຮອງເອົາມະຕິທີ່ໄດ້ກຳນົດເອົາ ວັນທີ 30 ມິຖຸນາ ຂອງທຸກໆປີ ເປັນວັນລັດຖະສະພາໂລກຂອງທຸກປະເທດສະມາຊິກສະຫະພັນລັດຖະສະພາສາກົນເພື່ອລະນຶກ ແລະ ທົບທວນຄືນການປະຕິບັດໜ້າທີ່ໃນຖານະເປັນອົງການນິຕິບັນຍັດ, ອົງການຕົວແທນແຫ່ງສິດ ແລະຜົນປະໂຫຍດ, ຄວາມມຸ່ງມາດປາຖະໜາຂອງປະຊາຊົນ, ການປະກອບສ່ວນເຂົ້າໃນການສົ່ງເສີມສັນຕິພາບ, ສະຖຽນລະພາບ, ຄວາມໝັ້ນຄົງ ແລະການຮ່ວມມືເພື່ອການພັດທະນາແບບຍືນຍົງໃນທົ່ວໂລກ.

ການສະເຫຼີມສະຫຼອງວັນລັດຖະສະພາໂລກປີນີ້, ຈັດຂຶ້ນພາຍໃຕ້ຄໍາຂວັນ; “ລັດຖະສະພາເພື່ອໂລກ” ຊຶ່ງເປັນຫົວຂໍ້ທີ່ມີຄວາມໝາຍສໍາຄັນ ແລະ ສອດຄ່ອງກັບສະພາບການ ທີ່ໂລກຂອງພວກເຮົາ ກໍາລັງປະເຊີນຢູ່ເຊັ່ນ: ບັນຫາໂຣກລະບາດ, ໄພພິບັດທາງທໍາມະຊາດ, ໄພອຶດຫີວ, ໄພເງິນເຟີ້, ບັນຫາພະລັງງານ, ການຂວໍ້າບາດທາງດ້ານເສດຖະກິດ ແລະຄວາມຂັດແຍ່ງດ້ານການທະຫານໃນຫຼາຍພາກພື້ນຂອງໂລກ, ອັນໄດ້ສົ່ງຜົນກະທົບທີ່ໜັກໜ່ວງ ຕໍ່ການພັດທະນາເສດຖະກິດ-ສັງຄົມ ແລະຊີວິດການເປັນຢູ່ຂອງປະຊາຊົນທັງຢູ່ໃນບັນດາປະເທດທີ່ພັດທະນາ ແລະກຳລັງພັດທະນາ ລວມທັງ ສປປ ລາວ ຢ່າງຫຼີກລ່ຽງບໍ່ໄດ້. ສະມາຊິກລັດຖະສະພາ ແລະ ໃນນາມຕົວແທນຂອງປະຊາຊົນລາວບັນດາເຜົ່າ ໃນຖານະທີ່ເປັນສະມາຊິກ ພ້ອມແລ້ວທີ່ຈະສືບຕໍ່ຮ່ວມມື ແລະສະໜັບສະໜູນແຜນດໍາເນີນງານຕ່າງໆຂອງສະຫະພັນລັດຖະສະພາສາກົນ.

ທີ່ມາ: ຫນັງສືພິມປະຊາຊົນ

แชร์