ຫາລືສົ່ງເສີມຜະລິດຕະພັນກະສິກໍາ ລາວໄປຈີນ

ວັນທີ 29 ມິຖຸນາ 2023 ກະຊວງກະສິກໍາ ແລະ ປ່າໄມ້ (ກປ) ແລະສະພາການຄ້າກວາງຊີ ສປ ຈີນ ປະຈໍາ ສປປ ລາວ ໄດ້ຮ່ວມກັນຈັດສໍາມະນາວຽກງານການຜະລິດການປຸງແຕ່ງ ແລະ ການສົ່ງເສີມຜະລິດຕະພັນກະສິກໍາລາວໄປສປ ຈີນ ຄັ້ງທີ 2 ພາຍໃຕ້ການເປັນປະທານຂອງທ່ານ ກິແກ້ວ ສິງນາວົງ ຮອງລັດຖະມົນຕີ ກປ ແລະມີທ່ານ ຈ້າວເຫວິນຢູ ທີ່ປຶກສາເສດຖະກິດ-ການຄ້າ ສະຖານທູດສປ ຈີນ ປະຈໍາ ສປປ ລາວ, ທ່ານ ເສິນຊິ່ງຫລູ ປະທານສະພາການຄ້າ ກວາງຊີ ສປ ຈີນ ປະຈໍາລາວ ພ້ອມດ້ວຍພາກສ່ວນກ່ຽວຂ້ອງສອງຝ່າຍລາວ-ຈີນ ເຂົ້າຮ່ວມ.

ທ່ານ ບຸນຈັນ ກົມບຸນຍະສິດ ຫົວໜ້າກົມປູກຝັງ ກປ ກ່າວວ່າ: ຈຸດປະສົງຂອງກອງປະຊຸມນີ້ເພື່ອສ້າງຄວາມເຂົ້າໃຈ ແລະຄວາມເປັນເອກະພາບກັນໃນການຈັດຕັ້ງປະຕິບັດວຽກງານການຜະລິດ, ການປຸງແຕ່ງ ແລະ ການສົ່ງອອກພືດໄປ ສປ ຈີນ ຕາມຂໍ້ກໍານົດເງື່ອນໄຂດ້ານສຸຂານາໄມພືດ ສໍາລັບການສົ່ງອອກພືດ ແລະ ຜະລິດຕະພັນພືດ ຈໍານວນ 16 ພືດທີ່ທັງສອງຝ່າຍ( ລາວ-ຈີນ ) ໄດ້ລົງນາມຮ່ວມກັນ. ນອກນີ້, ກອງປະຊຸມຍັງປຶກສາຫາລືແລກປ່ຽນບົດຮຽນລະຫວ່າງພາກລັດ ແລະ ພາກທຸລະກິດ ໃນຂອດການບໍລິການ, ການຈັດຕັ້ງປະຕິບັດການຜະລິດ, ການປຸງແຕ່ງ ແລະການສົ່ງອອກພືດ ແລະຜະລິດຕະພັນພືດໂດຍຕິດພັນກັບການສົ່ງເສີມການລົງທຶນ ແລະ ການຄຸ້ມຄອງຂອງພາກລັດ ປະຕິບັດໃຫ້ຖືກຕ້ອງ ຕາມພາລະບົດບາດ ເພື່ອເຮັດໃຫ້ກະສິກໍາລາວ ໃຫ້ສາມາດສົ່ງອອກໃຫ້ຫຼາຍຂຶ້ນ. ທ່ານ ກິແກ້ວ ສິງນາວົງ ໄດ້ກ່າວວ່າ: ກອງປະຊຸມຄັ້ງນີ້ຈະເປັນບາດກ້າວໜຶ່ງທີ່ສຳຄັນຕໍ່ກັບວຽກງານການສົ່ງອອກສິນຄ້າກະສິກຳລາວ ໄປ ສປ ຈີນ ໃຫ້ນັບມື້ນັບຫຼາຍຂຶ້ນ ແລະ ຈະໄດ້ຮັບການຮ່ວມມືຈາກທຸກພາກສ່ວນທັງພາກລັດ, ຜູ້ປະກອບການ, ຄຸ່ຮ່ວມພັດທະນາກຸ່ມການຜະລິດ ແລະ ສະຫະກອນຢ່າງມີປະສິດທີຜົນ, ມີຄວາມຍືນຍົງ ແລະໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ທ່ານ ເຈົ້າເຫວິນຢູ ທີ່ປຶກສາເສດຖະກິດ-ການຄ້າຈີນ ສະຖານທູດສປ ຈີນ ປະຈໍາສປປ ລາວກ່າວເນັ້ນວ່າ: ເພື່ອຊຸກຍູ້ການຮ່ວມມື ໜຶ່ງ​ແລວ​​ ໜຶ່ງ​ເສັ້ນທາງ ​ ໃຫ້ໄດ້ຮັບຜົນສູງ,ຈີນຍິນດີສືບ​ຕໍ່​ລົງເລິກ​ເຊື່ອມໂຍງ​ຜົນ​ປະ​ໂຫຍ​ດ,ລົງ​ເລິກ​ການ​ແລກປ່ຽນ​ດ້ານ​ເສດຖະກິດ-ການ​ຄ້າ ​ແລະການ​ລົງທຶນແລະຊຸກຍູ້​ໃຫ້ຜູ້ປະກອບການ​ຈີນ​ມາ​ລົງທຶນ​ຢູ່​ລາວໃຫ້​ຫຼາຍຂຶ້ນ​, ຍິນ​ດີ​ຮັບເອົາ​ບັນດາ​ຜະລິດ​ຕະພັນ​ທີ່​ມີ​ຄຸນ​ນະພາ​ບ​ຈາກ​ລາວ​ເຂົ້າ​ສູ່​ຕະຫຼາດ​ຈີນໃຫ້ນັບມື້ນັບຫຼາຍຂຶ້ນ​. ກອງປະຊຸມນີ້ຈະໄດ້ດໍາເນີນໄປຈົນຮອດວັນທີ 30 ມິຖຸນາ 2023.

ທີ່ມາ: cri-fm93

แชร์