ທ່ານ ສີເມືອງ ອິນທະວົງ ຫົວໜ້າຫ້ອງການ ອຸດສາຫະກໍາ ແລະການຄ້າ ເມືອງຊຽງຮ່ອນ ແຂວງໄຊຍະບູລີ ໄດ້ລາຍງານການສົ່ງອອກຢາງພາລາຢູ່ເມືອງດັ່ງກ່າວ ເມື່ອບໍ່ດົນມານີ້ວ່າ: ການສົ່ງອອກຢາງພາລາຢູ່ເມືອງຊຽງຮ່ອນ ຜ່ານການກວດກາຈາກໝ່ວຍງານຜ່ານປະຕູດຽວຂອງເມືອງໃນໄລຍະ 6 ເດືອນຕົ້ນ 2023 ຈໍານວນ 3.191 ໂຕນ ສ້າງມູນຄ່າໄດ້ທັງໝົດ 12,6 ຕື້ກີບ ໃນນັ້ນ, ມີຢາງພາລາກ້ອນສົ່ງອອກໄປຕ່າງເມືອງ, ຕ່າງແຂວງຈຳນວນ 461 ໂຕນ ມູນຄ່າ 1,4 ຕື້ກວ່າກີບ, ຢາງພາລາແຜ່ນ 1.100 ໂຕນມູນຄ່າ 4,4 ຕື້ກີບ ແລະສົ່ງອອກໄປຕ່າງປະເທດຢາງພາລາກ້ອນຈຳນວນ 100 ໂຕນ ມູນຄ່າເກືອບ200 ລ້ານກີບ, ຢາງພາລາແຜ່ນ 1.530 ໂຕນ ມູນຄ່າ 6,6 ຕື້ກວ່າກີບ.
ສໍາລັບແຜນ 6 ເດືອນທ້າຍປີ 2023 ຄາດວ່າຈະບັນລຸໃຫ້ໄດ້ອີກ 4.700 ໂຕນ ສ້າງມູນຄ່າ ໄດ້ປະມານ 34 ຕື້ກີບ ໃນນີ້, ຢາງພາລາກ້ອນທີ່ສົ່ງອອກຕ່າງເມືອງ, ຕ່າງແຂວງໃຫ້ບັນ ລຸໄດ້ 500 ໂຕນມູນຄ່າ 2 ຕື້ກີບ, ຢາງພາລາແຜ່ນຈຳນວນ 2.000 ໂຕນ ມູນຄ່າ 16 ຕື້ກີບ ແລະຢາງພາລາກ້ອນສົ່ງອອກໄປຕ່າງປະເທດໃຫ້ບັນລຸໄດ້ 200 ໂຕນ ມູນຄ່າ 800 ລ້ານກີບ, ຢາງພາລາແຜ່ນໃຫ້ບັນລຸໄດ້ 2.000 ໂຕນມູນຄ່າ 16 ຕື້ກີບ, ເຊິ່ງແຜນຄາດຄະເນ 6 ເດືອນທ້າຍປີ ມູນຄ່າດັ່ງກ່າວຂອງຢາງພາລາກ້ອນ ແລະຢາງພາລາແຜ່ນແມ່ນອີງໃສ່ລາຄາກາງທີ່ໄດ້ກຳນົດໄວ້ໃນການປະກອບເອກະສານຢູ່ໝ່ວຍງານປະຕູດຽວຂອງເມືອງ.
ປະຈຸບັນ, ທົ່ວເມືອງມີເນື້ອທີ່ປູກຢາງພາລາທັງໝົດ 5.036 ເຮັກຕາ ໃນນັ້ນເນື້ອທີ່ໄດ້ປາດແລ້ວ 3.830 ເຮັກຕາ ໂດຍມີການລົງທຶນປູກຂອງບໍລິສັດ ລີລ້ຽງຢູນານ ຈໍາກັດ ໃນເນື້ອທີ່ 642 ເຮັກຕາ, ບໍລິສັດ ຊຽງຕາລີ ຈຳຈັດ 2.885 ເຮັກຕາ, ບໍລິສັດ ບໍ່ແກ້ວ ຈຳກັດ ໃນເນື້ອທີ່ 187 ເຮັກຕາ ແລະ ປະຊາຊົນປູກເອງ ຈໍານວນ ເນື້ອທີ່ 1.320 ເຮັກຕາ. ໃນປີນີ້ຫ້ອງການກະສິກໍາ ແລະ ປ່າໄມ້ ຍັງໄດ້ຊຸກຍູ້ສົ່ງເສີມໃຫ້ຊາວກະສິກອນຂຶ້ນແຜນປູກຕື່ມຈຳນວນ 500 ກວ່າເຮັກຕາ ແລະ ທາງອົງການປົກຄອງເມືອງໄດ້ຊຸກຍູ້ສົ່ງເສີມໃຫ້ ບໍລິສັດ ລາວຈຸນທົງຢາງພາລາ ຈຳກັດ ມາຕັ້ງໂຮງງານແປຮູບ ແລະເກັບຊື້ຢາງພາລາ ພ້ອມທັງສົ່ງເສີມໃຫ້ອົງການປົກຄອງບ້ານປູກຢາງພາລາລວມຂອງບ້ານ ໂດຍບໍລິສັດເປັນຜູ້ສະໜອງແນວພັນອີກດ້ວຍ. ທັງໝົດນີ້ກໍເພື່ອປະຕິບັດຕາມຕາມແຜນພັດທະນາເສດຖະກິດ-ສັງຄົມຂອງເມືອງ ຕິດພັນກັບການຊຸກຍູ້ສົ່ງເສີມຊາວກະສິກອນຢູ່ພາຍໃນເມືອງປູກພືດເປັນສິນຄ້າສ້າງລາຍຮັບເຂົ້າຄອບຄົວເຮັດໃຫ້ຊີວິດການເປັນຢູ່ຂອງປະຊາຊົນນັບມື້ນັບດີຂຶ້ນ ແລະ ເຮັດໃຫ້ເມືອງຫລຸດພົ້ນອອກຈາກເມືອງທຸກຍາກໃນຕໍ່ໜ້ານີ້.
ຂ່າວ: ດອນ ຂຽວພະນາ
| ສະກຸນເງີນ | ອັດຕາຊື້ | ອັດຕາຂາຍ | |
|
EUR | 21.356 | 21.571 |
|
USD | 21.996 | 22.140 |
|
THB | 683 | 690 |
|
CNY | 2.713 | 2.740 |