ທຫລ ຊີ້ແຈງບັນຫາເງິນເຟີ້ ແລະການແລກປ່ຽນເງິນຕາ

ທ່ານ ບຸນເຫລືອ ສິນໄຊວໍ ຣະວົງ, ຜູ້ວ່າການທະນາຄານ ແຫ່ງ ສປປ ລາວ (ທຫລ) ໄດ້ຊີ້ແຈງສາເຫດທີ່ເຮັດໃຫ້ລາວຂາດເຂີນເງິນຕາຕ່າງປະເທດ, ຈຸດພິເສດຂອງອັດຕາເງິນເຟີ້ຢູ່ລາວ, ການຄຸ້ມຄອງເງິນຕາຕ່າງປະເທດ, ການແລກປ່ຽນເງິນຕາ, ການສົ່ງເສີມການໃຊ້ເງິນກີບ ແລະບັນຫາອື່ນໆ ຕໍ່ໃນກອງປະຊຸມສະໄຫມສາມັນເທື່ອທີ 5 ຂອງສະພາແຫ່ງຊາດຊຸດທີ IX ໃນວັນທີ 28 ມິຖຸນາ ຜ່ານມາທ່ານຊີ້ແຈງວ່າ: ທິດທາງການຄຸ້ມຄອງເງິນເຟີ້ພວກເຮົາຈະຕ້ອງຫລຸດການຂາດດູນໃຫ້ໜ້ອຍລົງ, ກ່ອນອື່ນຈະຕ້ອງຄຸ້ມຄອງເງິນຕາໃຫ້ໄດ້ພ້ອມທັງສົ່ງເສີມການລົງທຶນຕ່າງປະເທດ, ຟື້ນຟູການທ່ອງທ່ຽວໃຫ້ໄວ, ຈໍາກັດການນໍາເຂົ້າສິນຄ້າຟຸມເຟືອຍທີ່ບໍ່ຈໍາເປັນ, ຫລຸດການຊົມໃຊ້ເງິນຕາຕ່າງປະເທດເນື່ອງຈາກປະເທດເຮົານໍາເຂົ້າຫລາຍກວ່າສົ່ງອອກ.

ພ້ອມນັ້ນ, ຕ້ອງເອົາໃຈໃສ່ບັນຫາການຄຸ້ມຄອງລາຄາສິນຄ້າຕົວຈິງໃນທ້ອງຕະຫລາດເພື່ອບໍ່ໃຫ້ຜູ້ຂາຍກໍານົດລາຄາເກີນຄວາມເປັນຈິງ, ຂະແໜງການທີ່ກ່ຽວຂ້ອງກໍ່ຕ້ອງເຂົ້າມາຊ່ວຍທະນາຄານເພື່ອແກ້ໄຂອັດຕາເງິນເຟີ້ກໍຄືອັດຕາແລກປ່ຽນ ຕ້ອງໄດ້ຊຸກຍູ້ມະຫາພາກໃຫ້ມີເງິນຕາຫລາຍຂຶ້ນ, ຕິດພັນກັບການຄຸ້ມຄອງເງິນຕາທີ່ຫາມາໄດ້ໃຫ້ດີ ເຂົ້າໃນລະບົບທະນາຄານ, ສົ່ງເສີມການລົງທຶນ, ສົ່ງເສີມການທ່ອງທ່ຽວ ແລະຂະແໜງການອື່ນໆ ທີ່ກໍາລັງເປັນທ່າແຮງໃນປະຈຸບັນ ແລະ ຫລຸດການນໍາໃຊ້ເງິນຕາ.

ສຳລັບຮ້ານແລກປ່ຽນ ແມ່ນໃຫ້ຫັນການແລກປ່ຽນເຂົ້າສູ່ລະບົບທະນາຄານ, ຊຸກຍູ້ທະນາຄານທຸລະກິດຢູ່ທ້ອງຖິ່ນໃຫ້ເປີດບໍລິການແລກປ່ຽນ, ທົດລອງໃຫ້ທະນາຄານການຄ້າແລກປ່ຽນຜ່ານລະບົບມືຖື, ຕິດປ້າຍໂຄສະນາການຂາຍສິນຄ້າຕ້ອງຕິດລາຄາເປັນເງິນກີບ, ລົງທະບຽນຜູ້ນໍາເຂົ້າ-ສົ່ງອອກ, ແຈ້ງບັນຊີໃຫ້ທະນາຄານຮັບຮູ້, ຄຸ້ມຄອງຜ່ານລະບົບ (ລະບົບຕິດຕາມການນໍາເຂົ້າ-ສົ່ງອອກ) ຫລຸດການນໍາໃຊ້ສະກຸນເງິນປະເທດອື່ນທີ່ບໍ່ກ່ຽວຂ້ອງກັບການຄ້າ.

ພ້ອມທັງກະກຽມຄວາມພ້ອມອໍານວຍຄວາມສະດວກດ້ານການທ່ອງທ່ຽວ ແລະຜູ້ໃຊ້ແຮງງານຢູ່ຕ່າງປະເທດໃຫ້ສາມາດຈ່າຍເງິນຜ່ານລະບົບຄິວອາໂຄດໃນ 4 ປະເທດຄື: ລາວ, ໄທ, ຫວຽດນາມ ແລະກໍາປູເຈຍ.

ທີ່ມາ: ປະເທດລາວ

แชร์