ກະຊວງແຜນການຊີ້ແຈງເງິນເກີນແຜນ 220 ຕື້ ແລະການຊໍາລະໜີ້ໂຄງການ

ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະການລົງທຶນ ໄດ້ຊີ້ແຈງບ້ວງເງິນເກີນແຜນ ແລະການຊໍາລະໜີ້ໂຄງການຕໍ່ ສສຊ ໃນກອງປະຊຸມວັນທີ 28 ມິຖຸນານີ້ວ່າ ເງິນເກີນແຜນ ຈໍານວນ 220 ຕື້ ໃນປີ 2022 ໄດ້ຈັດສັນບ້ວງເງິນເກີນແຜນຂົງເຂດວັດທະນະທຳສັງຄົມ ແລະແກ້ໄຂຄວາມທຸກຍາກເປັນບຸລິມະສິດບໍ່ໃຫ້ຫຼຸດ 200 ຕື້,ຈັດສັນຈຳນວນ 20 ຕື້ໃນການປະຕິບັດອອກໃບຕາດິນ,ບ້ວງ 200 ຕື້ ແມ່ນຈ່າຍໃຫ້ເງິນອຸດໜູນຄູ,ນັກປະຕິວັດອາວຸໂສ,ອຸປະກອນການສຶກສາ ແລະອື່ນໆ.

ສ່ວນການແກ້ໄຂໜີ້ບ້ວງ 8.000 ຕື້ (ອວ່າຍໜີ້ 3 ແຈ) ແມ່ນເປັນການແກ້ໄຂສະພາບຄ່ອງໃຫ້ແກ່ຜູ້ປະກອບການຕົວຈິງທີ່ລົງທຶນເຮັດໂຄງການຂອງລັດຖະບານກ່ອນຊຶ່ງລັດຖະບານຄ້າງຊໍາລະໃຫ້ບັນດາບໍລິສັດ ຫຼືຜູ້ລົງທຶນມາຫຼາຍປີເຮັດໃຫ້ຜູ້ປະກອບການພົບຄວາມຫຍຸ້ງຍາກດ້ານອັດຕາແລກປ່ຽນ, ດອກເບ້ຍ ແລະອື່ນໆ ດັ່ງນັ້ນລັດຖະບານຈຶ່ງແກ້ໄຂບັນດາໂຄງການນີ້ກ່ອນ.

ສ່ວນການປັບປຸງລາຄາຫົວໜ່ວຍການກໍ່ສ້າງທີ່ຕິດພັນກັບການເພີ່ມຂຶ້ນຂອງວັດສະດຸເຫັນວ່າຫຼາຍໂຄງການຈະມີການປັບປຸງລາຄາໃໝ່ດັ່ງນັ້ນ, ກະຊວງແຜນການ ແລະການລົງທຶນຈຶ່ງໄດ້ສົມທົບກັບຂະແໜງກ່ຽວຂ້ອງຊຶ່ງຂະແໜງງານຈຳນວນໜຶ່ງກໍໄດ້ສຳເລັດແລ້ວຖ້າຜ່ານກະຊວງໂຍທາທິການ ແລະຂົນສົ່ງສຳເລັດໝົດແລ້ວຈະສະເໜີໃຫ້ລັດຖະບານຮັບຮອງ. ທ່ານລັດຖະມົນຕີກະຊວງແຜນການ ແລະການລົງທຶນ ກ່າວອີກວ່າ: ກ່ອນປີ 2015 ການລົງທຶນຂອງລັດແມ່ນກະແຈກກະຈາຍ, ບໍ່ມີຈຸດສຸມເຮັດໃຫ້ຫຼາຍໂຄງການເກີດຂຶ້ນ, ດັ່ງນັ້ນເພື່ອແກ້ໄຂບັນຫາດັ່ງກ່າວ, ລັດຖະບານຈຶ່ງໄດ້ສ້າງນິຕິກຳ ແລະກຳນົດຂອບເວລາຂອງການຊໍາລະໃນແຕ່ລະໂຄງການຄາດຄະເນວ່າ ມູນຄ່າໂຄງການດັ່ງກ່າວຈະເຮັດໃຫ້ການລົງທຶນຂອງລັດມີການຫັນປ່ຽນທີ່ດີຂຶ້ນໃນລະດັບໜຶ່ງແຕ່ຍ້ອນຄວາມສາມາດດ້ານທຶນຮອນຂອງລັດຈຶ່ງບໍ່ສາມາດປະຕິບັດຕາມມາດຕະການຊຳລະເງິນໄດ້.

ທີ່ມາ: ປະຊາຊົນ

แชร์