ຕາດກວາງຊີແຫຼ່ງທ່ອງທ່ຽວທີ່ນັກທ່ອງທ່ຽວນິຍົມໄປທ່ຽວ

ເມື່ອເວົ້າເຖິງແຂວງຫຼວງພະ ບາງ ແລ້ວຫຼາຍຄົນຄົງຈະເຄີຍໄດ້ ໄປທ່ຽວຊົມພາຍໃນແຂວງດັ່ງກ່າວຊຶ່ງແຂວງຫຼວງພະບາງ ແມ່ນເປັນ ແຂວງທີ່ມີທ່າແຮງໃນດ້ານການ ທ່ອງທ່ຽວບໍ່ວ່າຈະເປັນສະຖານທີ່ ທ່ອງທ່ຽວທາງວັດທະນະທຳ, ປະ ຫວັດສາດ ແລະດ້ານທຳມະຊາດທີ່ ຄວາມອຸດົມສົມບູນ.

ແຂວງຫຼວງພະບາງ ໄດ້ກາຍເປັນທີ່ນິຍົມກັນຢ່າງຫຼວງຫຼາຍຂອງບັນດານັກທ່ອງທ່ຽວທັງພາຍໃນ ແລະ ຕ່າງປະເທດເນື່ອງຈາກເປັນແຂວງ ທີ່ມີແຫຼ່ງທ່ອງທ່ຽວທີ່ຫຼາກຫຼາຍ, ແລະມີຫຼາຍກິດຈະກຳທີ່ສ້າງຄວາມ ປະທັບໃຈໃຫ້ແກ່ນັກທ່ອງທ່ຽວເມື່ອ ໄດ້ໄປທ່ຽວຊົມແລ້ວກໍຢາກໄປອີກ, ໂດຍສະເພາະພະທາດພູສີ, ວັດ ຊຽງທອງ, ຕາດແສ້, ນ້ຳຕົກຕາດກວາງຊີ ແລະອື່ນໆທີ່ນັກທ່ອງທ່ຽວ ໃຫ້ຄວາມສົນໃຈ.

ສຳລັບນ້ຳຕົກຕາດກວາງຊີແມ່ນນ້ຳຕົກທີ່ສວຍງາມທີ່ສຸດຂອງຫຼວງພະບາງເປັນນ້ຳຕົກຫີນປູນສູງກວ່າ 70  ແມັດ, ເປັນນ້ຳຕົກ 2 ຊັ້ນ, ຕັ້ງ ຢູ່ຫ່າງຈາກຕົວເມືອງຫຼວງພະະບາງ ໄປທາງທິດຕາເວັນຕົກສຽງໃຕ້ປະ ມານ 30 ກິໂລແມັດ, ພາຍໃນນ້ຳຕົກມີຕົ້ນໄມ້ໃຫຍ່ປົກຫຸ້ມ, ມີຂົວໄມ້ ແລະເສັ້ນທາງຍ່າງຊົມທຳມະຊາດ ນ້ຳຕົກ ແລະສາມາດຍ່າງເລາະຂຶ້ນໄປຊົມນ້ຳຕົກແຕ່ລະຊັ້ນໄດ້, ມີສະ ຖານທີ່ໃຫ້ຜູ້ທີ່ມາທ່ຽວໄດ້ລົງຫຼິ້ນນ້ຳ, ມີຮ້ານອາຫານ  ແລະຮ້ານຂາຍຂອງ ທີ່ລະນຶກໄວ້ຄອຍບໍລິການໃຫ້ແຂກທີ່ມາທ່ຽວຊົມນຳອີກ.

ນ້ຳຕົກຕາດກວາງຊີ ນັບວ່າເປັນສະຖານທີ່ທ່ອງທ່ຽວທາງທຳມະ ຊາດທີ່ໄດ້ຮັບຄວາມນິຍົມຈາກນັກທ່ອງທ່ຽວຫຼາຍທີ່ສຸດສ່ວນທ່ານໃດທີ່ສົນໃຈ ຫຼື ກຳລັງຊອກຫາສະຖານທີ່ທ່ອງທ່ຽວກໍສາມາດໄປທ່ຽວຊົມສະຖານທີ່ດັ່ງກ່າວໄດ້.

ນສພ ເສດຖະກິດ-ສັງຄົມ

• 09/04/2019