ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມເທດສະບານເມືອງໄຊ ຊ່ວງສັນຍາທີ່ 2 ຄືບໜ້າແລ້ວ 30,85%

ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມ ເທດສະບານ ເມືອງໄຊ, ແຂວງອຸດົມໄຊ ຊ່ວງສັນຍາທີ່ 2 ຄືບໜ້າແລ້ວ 30,85%. ທ່ານ ລີຢີງ ໄຊເຢຍຊ່າງ ຫົວໜ້າໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມ ເທດສະບານ ເມືອງໄຊ, ແຂວງອຸດົມໄຊ ໃຫ້ສຳພາດວ່າ: ໂຄງການຄຸ້ມຄອງຄວາມສ່ຽງໄພພິບັດນໍ້າຖ້ວມເທດສະບານ ເມືອງໄຊ ຊ່ວງທີ່ 2 ແມ່ນເລີ່ມແຕ່ ຂົວນໍ້າມາວ, ບ້ານນາສ້າວ ຫາ ຂົວນໍ້າກໍ 2, ບ້ານເຈງ ເຊື່ອມໃສ່ກັບ ຊ່ວງທີ່ 1 ເຂດສະໜາມກິລາແຂວງ ມີລວງຍາວ: 8.500 ແມັດ, ຮັບເໝົາການກໍ່ສ້າງໂດຍບໍລິສັດ ກວ້າງຕຸ້ງເລກ3 ຈາກ ສປ ຈີນ ລວມມູນຄ່າສັນຍາທັງໝົດ 8 ລ້ານ 8 ແສນກວ່າໂດລາສະຫະລັດ ໂດຍຈະໃຊ້ເວລາກໍ່ສ້າງ 24 ເດືອນ. ສຳລັບໜ້າວຽກປະກອບມີ: ການກໍ່ສ້າງປ້ອງກັນຕາຝັ່ງເຈື່ອນຕາມແຄມນໍ້າກໍ, ສ້າງສວນສາທາລະນະ 1 ຈຸດຢູ່ເຂດບ້ານນາຫວານນ້ອຍ, ກໍ່ສ້າງປະຕູລະບາຍນໍ້າ ຈຳນວນ 21 ຈຸດ ແລະອື່ນໆ ທີ່ຕິດພັນກັບໂຄງການ. ມາຮອດປະຈຸບັນ ການກໍ່ສ້າງແມ່ນໄດ້ສຳເລັດແລ້ວຫຼາຍໜ້າວຽກ ເຊັ່ນ: ວຽກອະນາໄມບຸກເບີກ, ວຽກດິນຂຸດ, ດິນຖົມ, ປ້ອງກັນສະຫລົບວາງຫິນຕິນໂທ ແລະ ວຽກລຽນຫິນສະຫຼົບອື່ນໆ.

ໂອກາດນີ້ ທ່ານ ພາກ ສາງຢຸນ ຫົວໜ້າທີມທີ່ປືກສາ ບໍລິສັດທີ່ປືກສາ ອີສານ ຈາກ ສ ເກົາຫຼີ ໃຫ້ສຳພາດວ່າ: ການກໍ່ສ້າງຕາຝັ່ງເຈື່ອນແມ່ນເພື່ອແນໃສ່ຫຼີກລຽງ ແລະ ລຸດຜ່ອນຄວາມອັນຕະລາຍໂດຍສະເພາະແມ່ນການເຊາະເຈື່ອນຂອງດິນຢູ່ສອງຟາກນໍ້າໃນຊ່ວງລະດູຝົນເຊິ່ງບາງຈຸດເຫັນວ່າມັນແຄບ ແລະໄດ້ຕັດແລວນໍ້າພ້ອມທັງໄດ້ຂະຫຍາຍໃຫ້ກວ້າງອອກ. ສຳລັບສວນສາທາລະນະແມ່ນໄດ້ສ້າງສຳເລັດແລ້ວ 1 ຈຸດ ຍັງຈຸດທີ່ 2 ແມ່ນພວມກໍ່ສ້າງເຊິ່ງຈະໃຫ້ສຳເລັດໃນປີ 2024. ພາຍຫຼັງສຳເລັດ ຈະເປັນບ່ອນພັກຜ່ອນຢ່ອນກາຍ ແລະ ເປັນການດຶງດູດເອົານັກທ່ອງທ່ຽວມາທ່ຽວແຂວງອຸດົມໄຊ ໃຫ້ຫຼາຍຂຶ້ນເຊິ່ງຈະສ້າງລາຍຮັບໃຫ້ແກ່ປະຊາຊົນພາຍໃນທ້ອງຖິ່ນເພີ່ມຂຶ້ນ. ສຳລັບວຽກທີ່ຈະສູມໃສ່ໃນຕໍ່ໜ້າໂດຍສະເພາະແມ່ນຊ່ວງລະດູຝົນນີ້ແມ່ນການວາງຫິນສະຫຼົບປ້ອງກັນຕາຝັ່ງເຈື່ອນເພື່ອປ້ອງກັນການເຊາະເຈື່ອນທີ່ອາດຈະເກີດຂຶ້ນໃນຊ່ວງລະດູຝົນ. ເພື່ອແນໃສ່ເຮັດໃຫ້ການດຳເນີນການກໍ່ສ້າງສຳເລັດໄປດ້ວຍດີ ທ່ານ ລີຢີງ ໄຊເຢຍຊ່າງ ຫົວໜ້າໂຄງການຮຽກຮ້ອງມາຍັງປະຊາຊົນບັນດາບ້ານຢູ່ລຽບແຄມແມ່ນໍ້າບໍ່ໃຫ້ລົງຫຼີ້ນນໍ້າ ຫຼືຫາປາເຂດທີ່ພວມກໍ່ສ້າງເພື່ອຮັບປະກັນຄວາມປອດໄພ ແລະບໍ່ໃຫ້ມີຜົນກະທົບຕໍ່ໂຄງການ.

ທີ່ມາ: Media Laos

แชร์