ສສຊ ສະເໝີໃຫ້ລັດຖະບານ ຫາທຸກວິທາງເພື່ອໃຫ້ເງິນກີບແຂງຄ່າ

ໃນວາລະກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 27 ມິຖຸນາ 2023 ໂດຍການເປັນປະທານຂອງ ທ່ານ ໄຊສົມພອນ ພົມ ວິຫານ ປະທານສະພາແຫ່ງຊາດ, ທ່ານນາງ ຫົງຄຳ ໄຊຍະຄົມ ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ປະກອບຄຳຫັນຕໍ່ບົດລາຍງານຂອງລັດຖະບານໂດຍສະເໜີໃຫ້ລັດຖະບານຄົ້ນຄວ້າຊອກຫາທຸກວິທາງເພື່ອເຮັດໃຫ້ເງິນກີບແຂງຄ່າຂຶ້ນ. ພ້ອມນັ້ນກໍຄວນລະດົມບັນດາບໍລິສັດ, ນັກທຸລະກິດ, ບຸກຄົນ, ນິຕິບຸກຄົນທີ່ມີເງິນຕາໄວ້ຄອບຄອງໃຫ້ເຂົ້າສູ່ລະບົບທະນາຄານເພື່ອໃຫ້ຖືກຕ້ອງຕາມລະບຽບ ແລະກົດໝາຍທີ່ກຳນົດໄວ້ເນື່ອງຈາກວ່າຈຳນວນເງິນຕາທີ່ມີຢູ່ພາຍໃນປະເທດແມ່ນມີຈຳນວນຫລາຍສົມຄວນ, ທຸກໆການດຳເນີນທຸລະກິດນຳເຂົ້າ ແລະສົ່ງອອກທີ່ຕ້ອງຊຳລະເປັນເງິນຕາຕ່າງປະເທດຕ້ອງຊຳລະຜ່ານລະບົບທະນາຄານຖ້າການຊຳລະໃດບໍ່ຜ່ານລະບົບທະນາຄານແມ່ນຜິດກົດໝາຍ.

ທ່ານ ນາງ ຫົງຄຳ ໄຊຍະຄົມ ຍັງໄດ້ສະເໜີໃຫ້ລັດຖະບານສຶບຕໍ່ປິດບັນດາຮ້ານແລກປ່ຽນເງິນຕາໃຫ້ໄດ້ຮ້ອຍສ່ວນຮ້ອຍຖ້າຫາກຍັງພົບເຫັນວ່າມີການລະເມີດໃຫ້ລົງ ໂທດຕາມກົດໝາຍຢ່າງເຂັ້ມງວດ. ນອກຈາກນີ້, ກໍຍັງຮຽກຮ້ອງມາຍັງລັດຖະບານຈົ່ງສືບຕໍ່ເອົາໃຈໃສ່ໃນການລະດົມນໍ້າໃຈຮັກຊາດເພື່ອປົກປັກຮັກສາປະເທດຊາດ ພ້ອມກັນເປັນຈິດໜຶ່ງໃຈດຽວແກ້ໄຂບັນຫາທີ່ກຳລັງປະເຊີນເຮັດໃຫ້ບຸກຄົນທີ່ຖືເງິນຕາຕ່າງປະເທດໄດ້ເຂົ້າສູ່ລະບົບທະນາຄານ ແລະເຮັດໃຫ້ຜູ້ທີ່ໄດ້ກຳໄລຈາກການແລກປ່ຽນເງິນຕາຫັນເຂົ້າສູ່ລະບຽບກົດໝາຍໂດຍໄວ, ທັງນີ້ກໍເພື່ອແກ້ໄຂບັນຫາປາກທ້ອງຂອງປະຊາຊົນລາວທົ່ວປະທດ.

ທ່ານ ນາງ ສິໄຊ ສະຣິດທິຣາດ ສສຊ ປະຈຳເຂດເລືອກຕັ້ງທີ່ 1 ນະຄອນຫລວງກໍໄດ້ມີຄຳເຫັນຕໍ່ບົດລາຍງານຂອງລັດຖະບານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ແລະແຜນເງິນຕາພ້ອມທັງແລກປ່ຽນໃນບາງບັນຫາໂດຍສະເພາະກ່ຽວກັບການສະໜອງແນວພັນຕ່າງໆ ເຊິ່ງປັດຈຸ ບັນເຫັນວ່າການສະໜອງແນວພັນເຂົ້າປູກຢູ່ພາຍໃນແມ່ນມີຄວາມພຽງພໍແຕ່ຂະນະດຽວກັນການສະໜອງແນວພັນພືດຜັກຍັງຕອບສະໜອງບໍ່ພຽງພໍກັບຄວາມຕ້ອງການເພາະເຫັນວ່າຍັງມີການນໍາເຂົ້າບັນດາແນວພັນພືດຜັກຈາກຕ່າງປະເທດນັບຕັ້ງແຕ່ຫອມລາບ, ຫອມປ້ອມ, ສາລີ, ໝາກແຕງ ແລະອື່ນສົ່ງຜົນໃຫ້ການຜະລິດບັນດາຜັກຕ່າງໆ ມີລາຄາສູງຂຶ້ນ. ສະນັ້ນລັດຖະບານຄວນລົງທຶນໃສ່ການຜະລິດແນວພັນພືດເພື່ອສະໜອງໃຫ້ຊາວກະສິກອນພາຍໃນປະເທດໃຫ້ພຽງພໍ ແຕ່ນີ້ຮອດ 2-3 ປີຂາງໜ້າ ໃຫ້ສາມາດຜະລິດໄດ້ທັງນີ້ກໍເພື່ອຫລຸດຕົ້ນທຶນໃນການຜະລິດ ແລະຫລຸດຜ່ອນການນໍ້າໃຊ້ເງິນຕາຕ່າງປະທດ.

ທີ່ມາ: ຂ່າວສານປະເທດລາວ

แชร์