ສປປ ລາວ ຂາດດຸນການຄ້າ 47 ລ້ານໂດລາ ໃນເດືອນພຶດສະພາ

ອີງຕາມຂໍ້ມູນຈາກ ສູນຂໍ້ມູນຂ່າວສານການຄ້າຂອງ ສປປ ລາວ ໃຫ້ຮູ້ວ່າ: ມູນຄ່າການນໍາເຂົ້າ ແລະສົ່ງອອກສິນຄ້າ ຂອງ ສປປ ລາວ ປະຈໍາເດືອນພຶດສະພາ 2023 ບັນລຸປະມານ 1.086 ລ້ານໂດລາ, ໃນນີ້ມູນຄ່າການສົ່ງອອກ ມີປະມານ 520 ລ້ານໂດລາ, ມູນຄ່າການນໍາເຂົ້າ ປະມານ 567 ລ້ານໂດລາ, ເຮັດໃຫ້ ສປປ ລາວ ຂາດດຸນການຄ້າ ປະມານ 47 ລ້ານໂດລາ, (ໃນນີ້ຍັງບໍ່ລວມເອົາການສົ່ງອອກ ແລະນຳເຂົ້າໄຟຟ້າ).

ສິນຄ້າສົ່ງອອກຫຼາຍກວ່າໝູ່ໄດ້ແກ່: ຄຳປະສົມ ແລະຄຳແທ່ງ 70 ລ້ານໂດລາ, ເກືອກາລີ 46 ລ້ານໂດລາ, ເຈ້ຍ ແລະເຄື່ອງທີ່ເຮັດດ້ວຍເຈ້ຍ 43 ລ້ານໂດລາ, ແຮ່ເຫຼັກ 39 ລ້ານໂດລາ, ແຮ່ທອງ 38 ລ້ານໂດລາ, ເຍື່ອໄມ້ ແລະເສດເຈ້ຍ 26 ລ້ານໂດລາ, ເຄື່ອງດື່ມ 21 ລ້ານໂດລາ, ເຄື່ອງນຸ່ງຫົ່ມ 20 ລ້ານໂດລາ, ນໍ້າຕານ 18 ລ້ານໂດລາ ແລະໝາກກ້ວຍ 16 ລ້ານໂດລາ.

ສ່ວນສິນຄ້ານຳເຂົ້າຫຼາຍກວ່າໝູ່ໄດ້ແກ່: ນໍ້າມັນກາຊວນ 79 ລ້ານໂດລາ, ພາຫະນະທາງບົກ 47 ລ້ານໂດລາ, ອຸປະກອນກົນຈັກ 40 ລ້ານໂດລາ,ເຫຼັກ ແລະເຄື່ອງທີ່ເຮັດດ້ວຍເຫຼັກ 30 ລ້ານໂດລາ, ເຄື່ອງດື່ມ 29 ລ້ານໂດລາ, ຊິ້ນສ່ວນອາໄຫຼ່ລົດ 23 ລ້ານໂດລາ, ເຍື່ອໄມ້ ແລະເສດເຈ້ຍ 22 ລ້ານໂດລາ, ນໍ້າມັນແອັດຊັງ 21 ລ້ານໂດລາ, ສາຍໄຟຟ້າ ແລະເຄເບີ້ລ 19 ລ້ານໂດລາ ແລະເຄື່ອງໃຊ້ທີ່ເຮັດດ້ວຍພລາສຕິກ 18 ລ້ານໂດລາ.

ສຳລັບປະເທດທີ່ ສປປ ລາວ ສົ່ງອອກຫຼາຍ 5 ອັນດັບທຳອິດ ໄດ້ແກ່: ຈີນ 203 ລ້ານໂດລາ, ຫວຽດນາມ 108 ລ້ານໂດລາ, ໄທ 59 ລ້ານໂດລາ, ອົສຕຣາລີ 30 ລ້ານໂດລາ ແລະອິນເດຍ 17 ລ້ານໂດລາ. ໃນຂະນະທີ່ປະເທດທີ່ ສປປ ລາວ ນໍາເຂົ້າຫຼາຍ 5 ອັນດັບທຳອິດ ໄດ້ແກ່: ໄທ 285 ລ້ານໂດລາ, ຈີນ 164 ລ້ານໂດລາ, ຫວຽດນາມ 31 ລ້ານໂດລາ, ສະຫະລັດອາເມຣິກາ 17 ລ້ານໂດລາ ແລະຍີ່ປຸ່ນ 13 ລ້ານໂດລາ.

ຂ່າວ-ພາບ: ຄ. ຄຳປະສິດ

แชร์