ຄຳມ່ວນ ພົບຜູ້ຕິດເຊື້ອໄຂ້ຍຸງລາຍເກືອບ 1 ພັນກໍລະນີ

ທ່ານ ດຣ. ນາງ ຄຳຫຼ້າ ລາດຊະວົງ ຮອງຜູ້ອຳນວຍການໂຮງໝໍແຂວງຄຳມ່ວນ ໃຫ້ສຳພາດຕໍ່ສື່ມວນຊົນທ້ອງຖິ່ນ ໃນວັນທີ 27 ມິຖຸນານີ້ວ່າ: ການຕິດເຊື້ອພະຍາດໄຂ້ຍຸງລາຍແມ່ນການເຈັບເປັນ, ການສູນເສຍ ແລະກ້າວໄປເຖິງການເສຍຊີວິດໄດ້ຖ້າບໍ່ໄດ້ຮັບການປິ່ນປົວທີ່ຖືກຕ້ອງ ແລະທັນເວລາ, ຍຸງທີ່ມີເຊື້ອພະຍາດຈະໄປເພາະພັນຕາມວົງຈອນການແຜ່ຂະຫຍາຍ ແລະ ຈະເລີນເຕີບໂຕຂອງມັນ ໂດຍ ຈະໄປໄຂ່ຕາມພາຊະນະຕ່າງໆທີ່ມີນໍ້າຂັງ ແລ້ວກາຍມາເປັນໜອນນໍ້າຜ່ານວິວັດທະນາການປະມານ 3-4 ວັນ ກໍຈະເຜາະຕົວອອກມາເປັນຕົວອ່ອນ ແລະສາມາດໄປກັດຄົນໄດ້ພາຍໃນ 1 ວັນພາຍຫຼັງເພາະຕົວອອກມາຊຶ່ງທຸກໆຄົນບໍ່ວ່າຈະເປັນເດັກນ້ອຍ ຫຼື ຜູ້ໃຫຍ່ກໍສາມາດຕິດເຊື້ອພະຍາດໄຂ້ຍຸງໄດ້ເມື່ອຖືກຍຸງທີ່ມີເຊື້ອກັດ.

ສຳລັບອາການຜູ້ທີ່ຕິດເຊື້ອໄຂ້ຍຸງລາຍຈະມີລັກສະນະໂຕຮ້ອນ (ອຸນຫະພູມໃນຕົນໂຕສູງ), ເມື່ອຍ, ອ່ອນເພຍ, ປວດຕາມຕົນໂຕ, ເຈັບຫົວ, ເຈັບເບົ້າຕາ ແລະບາງກໍລະນີຈະມີອາການຖອກທ້ອງ. ເມື່ອທ່ານມີອາການໃນລັກສະນະນີ້ແມ່ນໃຫ້ໄປພົບແພດຕາມໂຮງໝໍ ຫຼືສຸກສາລາທີ່ຢູ່ໃກ້ບ້ານເພື່ອກວດຫາເຊື້ອພະຍາດໄຂ້ຍຸງລາຍ ແລະ ປິ່ນປົວຢ່າງຖືກວິທີ ແລະທັນເວລາ. ຫ້າມບໍ່ໃຫ້ຊື້ຢາມາກິນເອງເພາະຖ້າຫາກກິນຢາບໍ່ຖືກປະເພດ ຫຼືກິນເກີນຂະໜາດອາດຈະສົ່ງຜົນອັນຕະລາຍຕໍ່ຕົວຂອງທ່ານໄດ້.

ວິທີປ້ອງກັນພະຍາດໄຂ້ຍຸງລາຍທີ່ດີກໍຄືການກຳຈັດແຫຼ່ງເພາະພັນຂອງຍຸງລາຍຊຶ່ງຕາມຫຼັກການຂອງ ແພດ-ໝໍ ແມ່ນໃຫ້ປະຕິບັດຕາມຫຼັກການ 5 ປ ຄື: 1. ປິດຝາພາຊະນະທີ່ເກັບນໍ້າໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງມາໄຂ່ໃສ່, 2. ປ່ຽນນໍ້າ ແລະ ຜັດຖູພາຊະນະ ເຊັ່ນ: ເຕົ້າດອກໄມ້, ນໍ້າຮອງຕີນຕູ້, ຖານຮອງຈອກນໍ້າ ແລະ ອື່ນໆ, 3. ປ່ອຍປາຫາງນົກຍຸງເພື່ອກິນໜອນນໍ້າ, 4. ປັບປຸງບໍ່ໃຫ້ມີນໍ້າຄ້າງຂັງໃນກະໂປະ, ກະປ໋ອງ, ຮາງລິນ, ຢາງຕີນລົດເກົ່າ ແລະ ອື່ນໆ, 5. ປະຕິບັດເປັນປະຈຳທຸກໆອາທິດ.

ສະນັ້ນ ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມກໍຄືພໍ່ແມ່ປະຊາຊົນໃຫ້ເອົາໃຈໃສ່ປະຕິບັດຕາມຫຼັກການ 5 ປ ເພື່ອຢັບຢັ້ງໄຂ້ຍຸງລາຍບໍ່ໃຫ້ມີການແຜ່ລະບາດອອກໄປເປັນວົງກວ້າງ.

ແຂວງຄຳມ່ວນ ແມ່ນເລີ່ມພົບຜູ້ທີ່ຕິດເຊື້ອພະຍາດໄຂ້ຍຸງລາຍມາແຕ່ເດືອນມີນາ 2023 ແລະໄດ້ມີຈຳນວນເພີ່ມຂຶ້ນຫຼາຍ ໃນເດືອນພຶດສະພາ, ມິຖຸນາຊຶ່ງມາຮອດວັນທີ 26 ມິຖຸນາ 2023 ໃນທົ່ວແຂວງແມ່ນມີຜູ້ຕິດເຊື້ອພະຍາດໄຂ້ຍຸງລາຍທັງໝົດ 980 ກໍລະນີ. ໃນນີ້ຜູ້ທີ່ມີອາການຮ້າຍແຮງ 9 ກໍລະນີ ແລະ ຍັງບໍ່ມີກໍລະນີທີ່ເສຍຊີວິດ. ສ່ວນເມືອງທີ່ມີຈຳນວນການຕິດເຊື້ອຫຼາຍທີ່ສຸດຢູ່ພາຍໃນແຂວງ ປະກອບມີ: ເມືອງທ່າແຂກ 319 ກໍລະນີ, ຍົມມະລາດ 196 ກໍລະນີ, ຫີນບູນ 143 ກໍລະນີ, ບົວລະພາ 139 ກໍລະນີ, ໜອງບົກ 58 ກໍລະນີ, ຄູນຄໍາ 45 ກໍລະນີ, ເຊບັ້ງໄຟ 33 ກໍລະນີ, ມະຫາໄຊ 31 ກໍລະນີ ແລະນາກາຍ 16 ກໍລະນີ.

ຂ່າວ-ພາບ: ກອງຄຳ

แชร์