6 ເດືອນທ້າຍປີ ລັດຖະບານຈະສຸມແກ້ໄຂດ້ານເສດຖະກິດ ເພື່ອບໍ່ໃຫ້ຕົກເຂົ້າສູ່ວິກິດ

ລັດຖະບານຈະໄດ້ ສືບຕໍ່ຄົ້ນຄວ້າບັນດາມາດຕະການເພື່ອເຮັດໃຫ້ເສດຖະກິດມະຫາພາກມີຄວາມສະຖຽນລະພາບ ແລະບໍ່ໃຫ້ຕົກເຂົ້າສູ່ວິກິດໃນນັ້ນຈະໄດ້ສຸມໃສ່ແກ້ໄຂຈຸດທີ່ມີຄວາມບອບບາງອ່ອນໄຫວ ແລະເໜັງຕີງແຮງ ເຊັ່ນ: ບັນຫາອັດຕາແລກປ່ຽນບັນຫາເງິນເຟີ້ລາຄາສິນຄ້າໃຫ້ເໜັງຕີງຊ້າລົງກ້າວໄປເຖິງຈຸດທີ່ມີຄວາມສະຖຽນກວ່າເກົ່າ ເຊິ່ງແມ່ນ 1 ໃນ 8 ຂອງວຽກງານຈຸດສຸມຂອງລັດຖະບານທີ່ຈະສຸມໃສ່ຈັດຕັ້ງປະຕິບັດໃນໄລຍະ 6 ເດືອນທ້າຍປີ 2023.

ທ່ານ ສອນໄຊ ສີພັນດອນ ນາຍົກລັດຖະມົນຕີ ໄດ້ລາຍງານໃນກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 26 ມິຖຸນາ 2023 ກ່ຽວກັບວຽກງານຈຸດສຸມທີ່ລັດຖະບານຈະໄດ້ສືບຕໍ່ຈັດຕັ້ງປະຕິບັດໃນ 6 ເດືອນທ້າຍປີ 2023 ເຊິ່ງໃນນັ້ນວຽກງານຈຸດ ສຸມທີ 1 ແມ່ນລັດຖະບານຈະໄດ້ສືບຕໍ່ຄົ້ນຄວ້າບັນດາມາດຕະການເພື່ອເຮັດໃຫ້ເສດຖະກິດມະຫາພາກມີຄວາມສະຖຽນລະພາບ ແລະບໍ່ໃຫ້ຕົກເຂົ້າ ສູ່ວິກິດ ໃນນັ້ນຈະໄດ້ສຸມໃສ່ແກ້ໄຂຈຸດທີ່ມີຄວາມບອບບາງອ່ອນໄຫວ ແລະເໜັງຕີງແຮງ ເຊັ່ນ: ບັນຫາອັດຕາແລກປ່ຽນບັນຫາເງິນເຟີ້ລາຄາສິນຄ້າໃຫ້ເໜັງຕີງຊ້າລົງກ້າວໄປເຖິງຈຸດທີ່ມີຄວາມສະຖຽນກວ່າເກົ່າ.

ໃນວຽກຈຸດສຸມທີ 1 ທີ່ລັດຖະບານຈະໄດ້ສຸມໃສ່ເປັນພິເສດແມ່ນ:

  • - ສຸມໃສ່ການເກັບລາຍຮັບໃຫ້ໄດ້ຕາມແຜນການ ຫຼືໃຫ້ເກີນແຜນເປັນ ປີທີ 3 ຕິດຕໍ່ກັນ ເພື່ອມີເງິນມາແກ້ໄຂໜີ້ສິນໃນນັ້ນຈະໄດ້ສຸມໃສ່ຄົ້ນຄວ້າຖານລາຍຮັບໃໝ່ ແລະຍູ້ແຮງການຫັນການເກັບລາຍຮັບເປັນທັນສະໄໝ ໃຫ້ແຂງແຮງ ແລະປະກົດຜົນເປັນຈິງຫຼາຍກວ່າເກົ່າສືບຕໍ່ຄົ້ນຄວ້າໂອນຫົວໜ່ວຍລາຍຮັບທີ່ສູນກາງຄຸ້ມຄອງໃຫ້ແຂວງເປັນຜູ້ຮັບຜິດຊອບເກັບໃຫ້ຫຼາຍຫົວໜ່ວຍຂຶ້ນຕື່ມ.
  • - ສືບຕໍ່ປະຕິບັດບັນດານິຕິກໍາທີ່ລັດຖະບານວາງອອກທີ່ກ່ຽວກັບການເພີ່ມທະວີການຄຸ້ມຄອງ ແລະຕ້ານການຮົ່ວໄຫຼຂອງລາຍຮັບງົບປະມານລັດການປະຢັດ ແລະ ຕ້ານການຟຸມເຟືອຍ ການນໍາໃຊ້ລົດຂອງລັດ ແລະອື່ນໆ ໃຫ້ເຂັ້ມງວດ ແລະເປັນຮູບປະທໍາຫຼາຍຂຶ້ນ.
  • - ສືບຕໍ່ແກ້ໄຂໜີ້ສິນສາທາລະນະໂດຍສະເພາະໜີ້ສິນຕໍ່ຕ່າງປະເທດບໍ່ໃຫ້ຕົກເຂົ້າສູ່ສະພາບທີ່ບໍ່ສາມາດຊໍາລະໜີ້ໄດ້ພ້ອມກັນນັ້ນສຸມໃສ່ຈັດຕັ້ງປະຕິບັດການແກ້ໄຂໜີ້ 3 ແຈ ບ້ວງ 8.000 ຕື້ກີບ ໃຫ້ສໍາເລັດ 100% ພ້ອມກັນນັ້ນກໍຄົ້ນຄວ້າ ແລະຈັດສັນແຫຼ່ງທຶນບ້ວງໃໝ່ຕື່ມເພື່ອມາແກ້ໄຂໜີ້ສິນການລົງທຶນຂອງລັດເພື່ອຊ່ວຍຜູ້ຮັບເໝົາໂຄງການສາມາດຢູ່ໄດ້ສືບຕໍ່ດໍາເນີນທຸລະກິດໄດ້ນອກນັ້ນກໍຈະໄດ້ສືບຕໍ່ສົມທົບກັບສະພາແຫ່ງຊາດເພື່ອປັບປຸງນິຕິກໍາຈໍານວນ ໜຶ່ງທີ່ກ່ຽວຂ້ອງກັບຂັ້ນຂອດການສ້າງ ແລະ ຮັບຮອງແຜນການລົງທຶນຂອງລັດໃຫ້ໄວຂຶ້ນຕື່ມທັງສຸມໃສ່ປັບປຸງປະສິດທິຜົນຂອງການລົງທຶນຂອງລັດໃຫ້ດີຂຶ້ນ ຢຸດການຈັດສັນທຶນໃສ່ໂຄງການໃໝ່ທີ່ບໍ່ມີປະສິດທິຜົນ ແລະສຸມໃສ່ໂຄງການລົງທຶນເພື່ອພັດທະນາຊົນນະບົດ ແລະແກ້ໄຂຄວາມທຸກຍາກເປັນບຸລິມະສິດ ເປັນຕົ້ນແມ່ນທຶນສິນເຊື່ອຈາກລະບົບທະນາຄານ (ສິນເຊື່ອກະຈາຍ, ກອງທຶນ MSME ແລະ ອື່ນໆ).
  • - ສືບຕໍ່ເອົາໃຈໃສ່ເປັນພິເສດຕໍ່ການຄຸ້ມຄອງອັດຕາແລກປ່ຽນເງິນຕາລາຄາສິນຄ້າປະລິມານເງິນ M2 ແລະອັດຕາເງິນເຟີ້ໃຫ້ຢູ່ໃນລະດັບທີ່ສາມາດຄວບຄຸມໄດ້ພ້ອມກັນນັ້ນຈະສືບຕໍ່ສຸມໃສ່ແກ້ໄຂບັນຫາການສະໜອງເງິນຕາໃຫ້ບັນດາບໍລິສັດທີ່ນໍາເຂົ້ານໍາມັນເຊື້ອໄຟໃຫ້ຫຼາຍຂຶ້ນກວ່າເກົ່າຕິດພັນກັບການສືບຕໍ່ການບໍລິການແລກປ່ຽນເງິນຕາດ້ວຍລະບົບທັນສະໄໝຂອງທະນາຄານທຸລະກິດການຄຸ້ມຄອງການສໍາລະສະສາງຂອງສິນຄ້າສົ່ງ ອອກ-ນໍາເຂົ້າ ການຂະຫຍາຍຕາໜ່າງ ແລະ ໜ່ວຍບໍລິການແລກປ່ຽນເງິນຕາຂອງບັນດາທະນາຄານທຸລະກິດ ແລະ ການກວດກາຕິດຕາມແກ້ໄຂເປົ້າໝາຍເຄື່ອນໄຫວປັ່ນປ່ວນອັດຕາແລກປ່ຽນເງິນຕານອກລະບົບ ແລະເກັງກໍາໄລຈາກການແລກປ່ຽນເອົາໃຈໃສ່ຄຸ້ມຄອງຮ້ານຂາຍເຄື່ອງວັດຖຸມີຄ່າໂຮງຊວດຈໍາການເຊົ່າສິນເຊື່ອ ແລະການຊື້-ຂາຍຊັບສິນດີຈີຕອນ (ບິດ ຄອຍ) ກິດຈະການຄາຊີໂນ ແລະອື່ນໆ ໃຫ້ເຂົ້າສູ່ລະບົບລະບຽບທີ່ລັດຄຸ້ມຄອງໄດ້.

แชร์