ທຫລ ເຜີຍຄັງສໍາຮອງເງິນຕາຕ່າງປະເທດຂອງລາວເຮົາຢູ່ໃນລະດັບ 1.439 ລ້ານໂດລາ

ທ່ານ ບຸນເຫຼືອ ສິນໄຊວໍຣະວົງ ຜູ້ວ່າການທະນາຄານແຫ່ງ ສປປ ລາວ ໄດ້ລາຍງານກ່ຽວກັບການຈັດຕັ້ງປະຕິບັດແຜນເງິນຕາໃນ 6 ເດືອນຕົ້ນປີ ແລະທິດທາງແຜນການ 6 ເດືອນ ທ້າຍປີ 2023 ຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX, ເຊິ່ງທ່ານໄດ້ລາຍງານໃນຫຼາຍຫົວຂໍ້ເປັນຕົ້ນແມ່ນ: 1). ດ້ານການຈັດຕັ້ງປະຕິບັດແຜນເງິນຕາ; 2). ດ້ານການຈັດຕັ້ງປະຕິບັດວຽກງານຄຸ້ມຄອງເງິນຕາຕ່າງປະເທດ; 3). ດ້ານການຄຸ້ມຄອງສະຖຽນລະພາບທາງດ້ານການເງິນ; 4). ວຽກງານພັດທະນາ ແລະ ຄຸ້ມຄອງລະບົບການຊໍາລະ; 4). ວຽກງານສິນເຊື່ອ ແລະການແກ້ໄຂໜີ້ NPLs; 5). ວຽກງານຕະຫຼາດທຶນ ແລະ ວຽກງານອື່ນໆ.

ຜ່ານການຈັດຕັ້ງປະຕິບັດວຽກງານທີ່ກ່າວມານັ້ນ ທຫລ ສາມາດຕີລາຄາຜົນໄດ້ຮັບດັ່ງນີ້:

+ ອັດຕາເງິນເຟີ້: ໃນໄລຍະ 6 ເດືອນຕົ້ນປີ 2023 ສະເລ່ຍຢູ່ໃນລະດັບ 38,06% (ມະຕິສະພາ: ສະເລ່ຍໝົດປີ ບໍ່ເກີນ 9%). ຊຶ່ງໂດຍລວມມາຮອດປະຈຸບັນ ເຫັນວ່າສະພາບເງິນເຟີ້ມີແນວໂນ້ມຫຼຸດລົງຈາກລະດັບສູງສຸດ41,26% ໃນເດືອນ ກຸມພາ 2023 ມາເປັນ 28,64% ໃນເດືອນມິຖຸນາ.

+ ອັດຕາແລກປ່ຽນ: ສະເລ່ຍໃນເດືອນມິຖຸນາ ທຽບໃສ່ທ້າຍປີ 2022 ເຫັນວ່າ ເງິນກີບທຽບ ເງິນໂດລາ ອ່ອນຄ່າ 5,8% (ຈາກ 17.312 ກີບ ມາເປັນ 18.390 ກີບ/ໂດລາ); ເງິນກີບ ທຽບເງິນບາດ ອ່ອນຄ່າ 8,3% (ຈາກ 502 ກີບ ມາເປັນ 548 ກີບ/ບາດ). ສ່ວນຕ່າງອັດຕາແລກປ່ຽນລະຫວ່າງ ທະນາຄານທຸລະກິດ ແລະ ຕະຫຼາດ ໃນໄລຍະຕົ້ນປີ ຫາ ເດືອນເມສາ ໂດຍລວມແມ່ນບໍ່ແຕກຕ່າງກັນຫຼາຍສະເລ່ຍຕໍ່າກວ່າ 2%, ແຕ່ນັບແຕ່ເດືອນພຶດສະພາ ເປັນຕົ້ນມາເຫັນວ່າ ສ່ວນຕ່າງອັດຕາແລກປ່ຽນເພີ່ມຂຶ້ນສູງເກີນ 2%.

+ ລາຍຮັບຈາກການສົ່ງອອກ: ໃນໄລຍະ 5 ເດືອນຕົ້ນປີ ມູນຄ່າການສົ່ງອອກຜ່ານລະບົບແຈ້ງພາສີທັງໝົດ ມີຈຳນວນ 3.447 ລ້ານໂດລາ ສະຫະລັດ, ແຕ່ການໂອນລາຍຮັບກັບປະເທດຜ່ານລະບົບທະນາຄານ ມີພຽງ 1.228 ລ້ານໂດລາ ຫຼື ປະມານ 35% ຂອງມູນຄ່າການສົ່ງອອກທັງໝົດ ແລະ ຄາດວ່າ 6 ເດືອນຕົ້ນປີ ຈະປະຕິບັດໄດ້ປະມານ 36% ຂອງມູນຄ່າການສົ່ງອອກທັງໝົດ (ມະຕິສະພາ: ບໍ່ຫຼຸດ 50% ຂອງມູນຄ່າການສົ່ງອອກ).

+ ຄັງສໍາຮອງເງິນຕາຕ່າງປະເທດ: ຮອດທ້າຍເດືອນພຶດສະພາ ແມ່ນຢູ່ໃນລະດັບ 1.439 ລ້ານໂດລາສະຫະລັດ, ກຸ້ມການນໍາເຂົ້າໄດ້ 4,03 ເດືອນ ແລະ ຄາດວ່າ ຮອດທ້າຍເດືອນມິຖຸນາ ຈະສາມາດກຸ້ມການນໍາເຂົ້າໄດ້ບໍ່ຫຼຸດ 4 ເດືອນ (ມະຕິສະພາ: ບໍ່ຫຼຸດ 3 ເດືອນ).

+ ຍອດເຫຼືອເງິນຝາກຂອງທະນາຄານທຸລະກິດ: ຮອດທ້າຍ ເດືອນພຶດສະພາ ກວມເອົາປະມານ 84% ຂອງ GDP ແລະ ຄາດວ່າ ຮອດທ້າຍ ເດືອນມິຖຸນາ ຈະຢູ່ໃນລະດັບປະມານ 85% ຂອງ GDP (ມະຕິສະພາ: ບັນລຸໄດ້ 85% ຂອງ GDP)

+ ຍອດເຫຼືອສິນເຊື່ອຂອງຂະແໜງການທະນາຄານ: ຮອດທ້າຍ ເດືອນພຶດສະພາ ກວມເອົາປະມານ 57% ຂອງ GDP ແລະ ຄາດວ່າ ຮອດທ້າຍເດືອນ ມິຖຸນາ ຈະຢູ່ໃນລະດັບປະມານ 58% ຂອງ GDP (ມະຕິສະພາ: ບັນລຸໄດ້ 65% ຂອງ GDP)

+ ອັດຕາສ່ວນໜີ້ NPLs: ຮອດທ້າຍ ເດືອນພຶດສະພາ ແມ່ນຢູ່ໃນລະດັບ 2,12% ແລະ ຄາດວ່າ ຮອດທ້າຍ ເດືອນມິຖຸນາ ຈະຢູ່ໃນລະດັບດຽວກັນກັບ ເດືອນພຶດສະພາ (ມະຕິສະພາ: ບໍ່ເກີນ 3%).

ແຜນເງິນຕາ 6 ເດືອນທ້າຍປີ 2023 ສະພາບເສດຖະກິດພາຍໃນ-ສາກົນ: ໃນ 6 ເດືອນທ້າຍປີ 2023 ຄາດວ່າສະພາບເສດຖະກິດ-ການເງິນໃນສາກົນຈະຍັງສືບຕໍ່ຜັນແປຢ່າງສັບສົນ, ອັດຕາເງິນເຟີ້ຍັງຈະຢູ່ໃນລະດັບສູງ ແລະຜົນກະທົບຈາກບັນຫາຄວາມຂັດແຍ່ງລະຫວ່າງ ຣັດເຊຍ ແລະອູເກຼອີນ ແລະການສືບຕໍ່ຟື້ນຕົວຈາກຜົນກະທົບຂອງການແຜ່ລະບາດພະຍາດໂຄວິດ-19 ເຮັດໃຫ້ການບັນລຸໄດ້ບາງຄາດໝາຍແຜນເງິນຕາທີ່ໄດ້ກຳນົດໄວ້ໃນມະຕິສະພາແຫ່ງຊາດນັ້ນມີຄວາມທ້າທາຍສູງ. ແຕ່ເຖິງຢ່າງໃດກໍ່ຕາມ, ເຫັນວ່າສະພາບການພາຍໃນ ຍັງມີປັດໄຈທີ່ເປັນທ່າແຮງທີ່ຊ່ວຍຍູ້ແຮງໃຫ້ເສດຖະກິດ ຄາດວ່າຈະເຕີບໂຕເກີນ 4,5% ເປັນຕົ້ນການເປີດປະເທດ ຈະຊ່ວຍດຶງດູດນັກທ່ອງທ່ຽວເຂົ້າມາເພີ່ມຂຶ້ນ, ການຜະລິດກະສິກຳສົ່ງອອກມີລັກສະນະຟົດຟື້ນ, ການສົ່ງອອກແຮ່ທາດບາງຊະນິດເພີ່ມຂຶ້ນ ເປັນຕົ້ນ ແຮ່ເກືອໂປຕັສ, ການປັບປຸງລະບົບຂົນສົ່ງຜ່ານທາງລົດໄຟ ລາວ-ຈີນ, ລະບົບຂົນສົ່ງຜ່ານແດນ ແລະ ລະບົບໂລຈີສະຕິກຊຶ່ງປັດໄຈເຫຼົ່ານີ້ຈະຊ່ວຍດູດເງິນຕາໄຫຼເຂົ້າສູ່ລະບົບເສດຖະກິດ ໃຫ້ຫຼາຍຂຶ້ນກວ່າປີຜ່ານມາ.

ທະນາຄານແຫ່ງ ສປປ ລາວ ຈະສືບຕໍ່ການຮັກສາສະຖຽນລະພາບທາງດ້ານເງິນຕາດ້ວຍການດຳເນີນນະໂຍບາຍເງິນຕາໃນທິດທາງທີ່ຮັດກຸມຫຼາຍຂຶ້ນ ຄື: (1) ສຸມໃສ່ປັບປຸງ ແລະຈັດຕັ້ງປະຕິບັດກົນໄກການຄຸ້ມຄອງເງິນຕາຕ່າງປະເທດຂອງ ສປປ ລາວ ໃຫ້ມີປະສິດທິຜົນດ້ວຍການສ້າງເງື່ອນໄຂ ແລະສະພາບແວດລ້ອມໃຫ້ມີການສະໜອງເງິນຕາຕ່າງປະເທດເຂົ້າມາໃນລະບົບເສດຖະກິດຫຼາຍຂຶ້ນ ແລະຈໍາກັດການແລກປ່ຽນເງິນຕາແບບຊະຊາຍ; (2) ສືບຕໍ່ຄວບຄຸມປະລິມານເງິນໃຫ້ຂະຫຍາຍຕົວໃນຈັງຫວະທີ່ເໝາະສົມເພື່ອຄວບຄຸມເງິນເຟີ້; (3) ປະຕິບັດນະໂຍບາຍອັດຕາແລກປ່ຽນຕາມກົນໄກຕະຫຼາດທີ່ມີການຄຸ້ມຄອງຂອງລັດໃຫ້ຮັດກຸມຍິ່ງຂຶ້ນ; (4) ພັດທະນາເຄື່ອງມືຊຳລະພາຍໃນ ແລະລະຫວ່າງປະເທດໃຫ້ທັນສະໄໝ ແລະຮັບປະກັນຄວາມປອດໄພ; (5) ເພີ່ມທະວີການສົມທົບກັບຂະແໜງການກ່ຽວຂ້ອງໃຫ້ຫຼາຍຂຶ້ນເປັນຕົ້ນພັດທະນາລະບົບແລກປ່ຽນຂໍ້ມູນຂ່າວສານກັບສື່ມວນຊົນ ແລະບູລະນະກົນໄກການປະສານງານກໍ່ຄືການເຊື່ອມໂຍງຖານຂໍ້ມູນກັບຂະແໜງການທີ່ກ່ຽວຂ້ອງໃຫ້ເປັນລະບົບປົກກະຕິ, ສອດຄ່ອງ ແລະມີປະສິດທິຜົນຫຼາຍຂຶ້ນ.

ທີ່ມາ: ທຫລ

แชร์