5 ເດືອນຕົ້ນປີ ກະຊວງການເງິນເກັບລາຍຮັບງົບປະມານໄດ້ 15.155 ຕື້ກີບ

ທ່ານ ສັນຕິພາບ ພົມວິຫານ ລັດຖະມົນຕີກະຊວງການເງິນລາຍງານຕໍ່ກອງປະຊຸມສະໄໝສາມັນເທື່ອທີ 5 ຂອງສະພາແຫ່ງຊາດ ຊຸດທີ IX ໃນວັນທີ 26 ມິຖຸນາ ນີ້ວ່າ: ໃນປີ 2023 ແຜນງົບປະມານແຫ່ງລັດ ກະຊວງການເງິນມີແຜນລາຍຮັບທັງໝົດ 38.448 ຕື້ກີບ, ເທົ່າກັບ 16,42% ຂອງ GDP ໃນນັ້ນ: ລາຍຮັບພາຍໃນ 34.898 ຕື້ກີບ ເທົ່າກັບ 14,90% ຂອງ GDP ແລະລາຍຮັບການຊ່ວຍເຫຼືອ 3.550 ຕື້ກີບ. ສຳລັບແຜນລາຍຈ່າຍທັງໝົດ 43.498 ຕື້ກີບ ເທົ່າກັບ 18,58% ຂອງ GDP, ແຜນຂາດດຸນ 5.050 ຕື້ກີບ ເທົ່າກັບ 2,16% ຂອງ GDP (ມູນຄ່າ GDP ເທົ່າກັບ 234.160 ຕື້ກີບ).

ຜ່ານການຈັດຕັ້ງປະຕິບັດແຜນງົບປະມານແຫ່ງລັດ 5 ເດືອນຕົ້ນປີໄດ້ດັ່ງນີ້: ດ້ານລາຍຮັບສາມາດປະຕິບັດໄດ້ 15.155 ຕື້ກີບ ເທົ່າກັບ 39% ຂອງແຜນການປີ (ເທົ່າກັບ 6,47% ຂອງ GDP) ຫຼື ເທົ່າກັບ 71% ຂອງແຜນ 6 ເດືອນຕົ້ນປີ (ຖ້າທຽບໃສ່ໄລຍະດຽວກັນຂອງປີຜ່ານມາເພີ່ມຂຶ້ນ 42% ເປັນເງິນ 4.495 ຕື້ກີບ) ໃນນັ້ນ: ລາຍຮັບພາຍໃນ 14.848 ຕື້ກີບ ເທົ່າກັບ 43% ຂອງແຜນການປີ ຫຼື ເທົ່າກັບ 6,34% ຂອງ GDP (ສູນກາງປະຕິບັດໄດ້ 10.303 ຕື້ກີບ ເທົ່າກັບ 39% ຂອງແຜນການປີ ແລະ ລາຍຮັບທ້ອງຖິ່ນປະຕິບັດໄດ້ 4.545 ຕື້ກີບ ເທົ່າກັບ 52% ຂອງແຜນການປີ) ແລະລາຍຮັບຈາກການຊ່ວຍເຫຼືອປະຕິບັດໄດ້ 307 ຕື້ກີບ, ເທົ່າກັບ 9% ຂອງແຜນການປີ. ຄາດຄະເນປະຕິບັດ 6 ເດືອນຕົ້ນປີ ລາຍຮັບທັງໝົດຄາດວ່າຈະສາມາດປະຕິບັດໄດ້ປະມານ 18.424 ຕື້ກີບ ຫຼື ເທົ່າກັບ 48% ຂອງແຜນການປີ ສະເພາະລາຍຮັບພາຍໃນຄາດວ່າຈະໄດ້ 17.963 ຕື້ກີບ ເທົ່າກັບ 50% ຂອງແຜນການປີ.

ດ້ານລາຍຈ່າຍ: ປະຕິບັດໄດ້ 10.905 ຕື້ກີບ, ເທົ່າກັບ 25% ຂອງແຜນການປີ, ໃນນັ້ນ: ຂັ້ນສູນກາງປະຕິບັດໄດ້ 7.721 ຕື້ກີບ,ເທົ່າກັບ 23% ຂອງແຜນການປີ ແລະ ຂັ້ນທ້ອງຖິ່ນປະຕິບັດໄດ້ 3.184 ຕື້ກີບ, ເທົ່າກັບ 39% ຂອງແຜນການປີ, ໂດຍໄດ້ສຸມໃສ່ການເບີກຈ່າຍເງິນເດືອນ ແລະເງິນນະໂຍບາຍເປັນບຸລິມະສິດຊຶ່ງສຳເລັດການເບີກຈ່າຍເດືອນມິຖຸນາຢູ່ຂັ້ນສູນກາງສ່ວນຂັ້ນທ້ອງຖິ່ນແມ່ນສຳເລັດເປັນສ່ວນໃຫຍ່ ແລະພວມສືບຕໍ່ເບີກຈ່າຍໃຫ້ສຳເລັດ, ພ້ອມນັ້ນກໍໄດ້ສຸມໃສ່ຊຳລະໜີ້ສິນພາຍໃນ ແລະ ຕ່າງປະເທດ ຕາມຂໍ້ຜູກພັນສັນຍາ ແລະຮັບປະກັນລາຍຈ່າຍບໍລິຫານຂອງພັກ-ລັດທີ່ຈຳເປັນ.

ສໍາລັບລາຍຈ່າຍເງິນໂຄງການລົງທຶນຂອງລັດເພື່ອບໍ່ໃຫ້ເປັນການຊັກຊ້າຄືປີຜ່ານມາ,ສະນັ້ນ,ກະຊວງການເງິນກໍໄດ້ມີກົນໄກໃຫ້ບັນດາກະຊວງ, ອົງການ ແລະທ້ອງຖິ່ນທີ່ໄດ້ຮັບແຜນລົງທຶນແລ້ວ ສາມາດເບີກຈ່າຍໄດ້ 45% ຂອງແຜນການປີ, ພ້ອມນັ້ນກໍໄດ້ມີກົນໄກການຈັດຕັ້ງປະຕິບັດເງິນເກີນແຜນປີ 2022 ໃຫ້ແຂວງສາມາດນຳໃຊ້ 80% ເພື່ອກະຕຸ້ນເສດຖະກິດແຕ່ຫົວທີ, ຊຶ່ງໄດ້ເລີ່ມຈັດຕັ້ງປະຕິບັດແຕ່ເດືອນພຶດສະພາ 2023 ເປັນຕົ້ນມາ.

ດ້ານດຸ່ນດ່ຽງ: ໃນ 5 ເດືອນ ສາມາດລະດົມແຫຼ່ງທຶນເພື່ອມາດຸ່ນດ່ຽງງົບປະມານພາຍໃນ ແລະຕ່າງປະເທດໄດ້ 6.170 ຕື້ກີບ, ເທົ່າກັບ 15% ຂອງແຜນການປີ, ໃນນີ້: ອອກພັນທະບັດພາຍໃນ 840 ຕື້ກີບ ເທົ່າກັບ 8% ຂອງແຜນການປີ ແລະ ກູ້ຢືມເປັນໂຄງການຈາກຕ່າງປະເທດ 5.330 ຕື້ກີບ ເທົ່າກັບ 18% ຂອງແຜນການປີ.

ທີ່ມາ: ຫນັງສືພິມປະຊາຊົນ

แชร์