ສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະຫົວເຫວີຍ ຮ່ວມລົງນາມສະໜັບສະໜູນ ແລະພັດທະນາຊັບພະຍາກອນດີຈີຕອນຢູ່ ສປປ ລາວ

ສະຖາບັນເຕັກໂນໂລຢີການສື່ສານຂໍ້ມູນຂ່າວສານ (ສຕສ), ກະຊວງເຕັກໂນໂລຢີ ແລະການສື່ສານ (ກຕສ) ຮ່ວມກັບ ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ (Huawei Technologies (Lao) Sole Co., Ltd) ໄດ້ຮ່ວມລົງນາມບົດບັນທຶກຄວາມເຂົ້າໃຈ (MOU) ເພື່ອເປັນການສະໜັບສະໜູນ ແລະພັດທະນາຊັບພະຍາກອນດິຈິຕອນຮ່ວມກັນ.

ພິທີລົງນາມບົດບັນທຶກດັ່ງກ່າວໄດ້ຈັດຂຶ້ນໃນຕອນແລງຂອງວັນທີ 15 ມິຖຸນາ 2023, ທີ່ຫ້ອງປະຊຸມຂອງສະຖາບັນເຕັກໂນໂລຢີການສື່ສານຂໍ້ມູນຂ່າວສານ. ຈຸດປະສົງກໍເພື່ອສະແດງໃຫ້ເຫັນເຖິງບູລິມະສິດອັນຮີບດ່ວນຂອງລັດຖະບານໃນການຫັນເປັນທັນສະໄໝເປັນຕົ້ນແມ່ນ: ການຮ່ວມມືສົ່ງເສີມດ້ານການພັດທະນາຫຼັກສູດ Huawei ICT Academy, ຮ່ວມກັນໃນການສ້າງຫຼັກສູດການຮຽນທາງດ້ານໄອຊີທີ (ICT), ຝຶກອົບຮົມໃຫ້ແກ່ບັນດານັກຮຽນ, ຢັ້ງຢືນມາດຕະຖານຂອງຄູສອນ, ສະໜັບສະໜູນການຝຶກງານ, ການຈັດສຳມະນາ, ການນຳໃຊ້ platforms online, ເຂົ້າຮ່ວມການແຂ່ງຂັນທາງດ້ານໄອຊີທີ,ມອບທຶນການສຶກສາ, ຮ່ວມມືກັນຄົ້ນຄວ້າທາງດ້ານວິຊາການ, ຝຶກອົບຮົມໃຫ້ແກ່ພະນັກງານພາກລັດທີ່ຮັບຜິດຊອບທາງດ້ານວຽກງານບໍລິການການສຶກສາ ແລະ ສົ່ງເສີມພັດທະນາພະນັກງານທ້ອງຖິ່ນທີ່ມີພອນສະຫວັນທາງດ້ານໄອຊີທີ.

ໂອກາດດັ່ງກ່າວນີ້, ທ່ານ ປອ. ປະດັບໄຊ ໄຊຍະໂຄດ ຮອງຫົວໜ້າສະຖາບັນເຕັກໂນໂລຢີການສື່ສານຂໍ້ມູນຂ່າວສານ ໄດ້ໃຫ້ຮູ້ວ່າ: ວຽກງານການຫັນເປັນທັນສະໄໝແມ່ນວຽກງານໜຶ່ງທີ່ພັກ ແລະລັດຖະບານໄດ້ໃຫ້ຄວາມສຳຄັນ ແລະໄດ້ກາຍເປັນຂະແໜງການປາຍແຫຼມທີ່ປີ່ນອ້ອມໃຫ້ແກ່ວຽກງານໃນທຸກຂະແໜງການ, ຊຶ່ງສະແດງອອກໃນມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມຂອງສະພາແຫ່ງຊາດ ແລະລັດຖະບານທີ່ໄດ້ຮັບຮອງ ແລະປະກາດໃຊ້ວິໄສທັດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 20 ປີ (2021-2040), ຍຸດທະສາດການພັດທະນາເສດຖະກິດດິຈິຕອນ ແຫ່ງຊາດ ໄລຍະ 10 ປີ (2021-2030) ແລະແຜນພັດທະນາເສດຖະກິດດິຈິຕອນ ແຫ່ງຊາດ ໄລຍະ 5  ປີ (2021-2025).  ຊຶ່ງວຽກງານການພັດທະນາບຸກຄະລາກອນດິຈິຕອນ ກໍເປັນວຽກໜຶ່ງທີ່ນອນໃນ 8 ຍຸດທະສາດ ແລະ 14 ແຜນງານ ຂອງແຜນການພັດທະນາເສດຖະກິດດິຈິຕອນ ແຫ່ງຊາດ. ໄລຍະຜ່ານມາ, ກະຊວງເຕັກໂນໂລຢີ ແລະການສື່ສານກໍໄດ້ມີການຮ່ວມມືກັບຫຼາຍພາກສ່ວນທັງພາຍໃນ ແລະ ຕ່າງປະເທດ ເພື່ອຊຸກຍູ້ສົ່ງເສີມການພັດທະນາວຽກງານດັ່ງກ່າວ ລວມທັງການຮ່ວມມືກັບ ບໍລິສັດ ຫົວເຫວີຍ ເທັກໂນໂລຢີ (ລາວ) ຈໍາກັດຜູ້ດຽວ ໃນການຫັນເປັນລັດຖະບານດິຈິຕອນ ແລະພັດທະນາຊັບພະຍາກອນມະນຸດ ທາງດ້ານດິຈິຕອນ ຊຶ່ງຖືໄດ້ວ່າເປັນວຽກບູລິມະສິດໜຶ່ງຂອງການຫັນເປັນທັນສະໄໝຂອງລັດຖະບານ ແລະການບໍລິການຂອງຄວາມຮູ້ທາງດ້ານວິຊາການແກ່ສັງຄົມ.

ທ່ານ ຮົວ ຈື່ເໝິງ, ຜູ້ບໍລິຫານສູງສຸດ ບໍລິສັດ ຫົວເຫວີຍ ເທັກໂນໂລຢີ (ລາວ) ຈໍາກັດຜູ້ດຽວ ໄດ້ກ່າວເພີ່ມວ່າ: ຫົວເຫວີຍ ໄດ້ດຳເນີນທຸລະກິດຢູ່ປະເທດລາວເປັນເວລາ 25 ປີແລ້ວ ວິໄສທັດຂອງພວກເຮົາແມ່ນ "ຢູ່ລາວເພື່ອປະເທດລາວ,ນໍາເອົາເທັກໂນໂລຊີທີ່ທັນສະໄໝມາສູ່ທຸກຄົນ, ທຸກຄອບຄົວ, ທຸກອົງກອນ, ເປັນຄູ່ຮ່ວມງານທີ່ໄວ້ວາງໃຈທີ່ສຸດ, ເພື່ອຊີວິດ ແລະກ້າວໄປສູ່ອານາຄົດດິຈິຕອລສີຂຽວ". ໃນຖານະທີ່ເປັນບໍລິສັດຊັ້ນນຳທາງດ້ານໄອຊີທີ (ICT), ຫົວເຫວີຍ ໄດ້ນໍາໃຊ້ຍຸດທະສາດການພັດທະນາ ແລະໃຫ້ຄວາມສໍາຄັນກັບການປັບໃຫ້ເຂົ້າກັບບັນດາທ້ອງຖິ່ນໃນປະເທດ ແລະພາກພື້ນທີ່ພວກເຮົາດຳເນີນທຸລະກິດຢູ່. ເພື່ອໃຫ້ເກີດການຂະຫຍາຍຕົວແບບຍືນຍົງພວກເຮົາຈຶ່ງໃຫ້ຄວາມສຳຄັນເປັນຢ່າງຍິ່ງຕໍ່ກັບການພັດທະນາຄວາມສາມາດທາງດ້ານໄອຊີທີ (ICT). ສະນັ້ນ, ການລົງນາມ MOU ໃນຄັ້ງນີ້ ຈຶ່ງໄດ້ສະແດງໃຫ້ເຫັນເຖິງບາດກ້າວອັນສຳຄັນຫຼາຍຂອງ ຫົວເຫວີຍ ລາວ ເນື່ອງຈາກພວກເຮົາກຳລັງສ້າງ “Huawei ICT Academy”  ແຫ່ງທຳອິດໃນ ສປປ ລາວ ເຊິ່ງເປັນໂຄງການຝຶກອົບຮົມດ້ານໄອຊີທີ (ICT) ລະຫວ່າງນັກສຶກສາວິທະຍາໄລ ແລະມະຫາວິທະຍາໄລໃນທົ່ວໂລກ, ເພື່ອອຳນວຍຄວາມສະດວກໃຫ້ແກ່ການພັດທະນາ ແລະ ການແລກປ່ຽນຄວາມຮູ້ຄວາມສາມາດລະຫວ່າງປະເທດອີກດ້ວຍ. ການສ້າງຕັ້ງ  ICT Academy ຄັ້ງນີ້ ຫົວເຫວີຍ ຈະສາມາດແບ່ງປັນຄວາມຮູ້ໃນດ້ານອຸດສາຫະກໍາຂອງຕົນ ລວມທັງທັກສະທີ່ມີຄວາມຕ້ອງການສູງໃຫ້ກັບບັນດານັກຮຽນ ແລະຄູອາຈານ ໃນສະຖາບັນເຕັກໂນໂລຊີການສື່ສານຂໍ້ມູນຂ່າວສານ ແລະຊ່ວຍຝຶກອົບຮົມບຸກຄະລາກອນທີ່ຈໍາເປັນເພື່ອສະຫນັບສະຫນູນການພັດທະນາດ້ານດິຈິຕອນຂອງປະເທດ.

ລົງນາມໃນບົດບັນທຶກຄວາມເຂົ້າໃຈໃນຄັ້ງນີ້ໂດຍທ່ານ ປອ. ປະດັບໄຊ ໄຊຍະໂຄດ ຮອງຫົວໜ້າສະຖາບັນເຕັກໂນໂລຊີການສື່ສານຂໍ້ມູນຂ່າວສານ, ກະຊວງເຕັກໂນໂລຊີ ແລະ ການສື່ສານ ແລະທ່ານ ຮົວ ຈືເໝິງ ຜູ້ບໍລິຫານສູງສຸດ ບໍລິສັດ ຫົວເຫວີຍ ເທັກໂນໂລຢີ (ລາວ) ຈໍາກັດຜູ້ດຽວ, ໂດຍໃຫ້ກຽດເຂົ້າຮ່ວມເປັນສັກຄີພະຍານຂອງ ທ່ານ ບັນດິດ ສຈ. ບໍ່ວຽງຄໍາ ວົງດາລາ ກຳມະການສູນກາງພັກ, ເລຂາຄະນະພັກ, ລັດຖະມົນຕີ ກະຊວງເຕັກໂນໂລຊີ ແລະ ການສື່ສານ, ມີບັນດາຮອງລັດຖະມົນຕີ, ຫົວໜ້າຫ້ອງການ, ກົມ, ສູນ, ສະຖາບັນພາຍໃນກະຊວງເຕັກໂນໂລຊີ ແລະການສື່ສານ, ພ້ອມນັ້ນຍັງມີປຶກສາເອກອັກຄະລັດຖະທູດ ສປ ຈີນ, ມີຮອງປະທານ ບໍລິສັດ ຮົວເວ້ ອາຊີ-ປາຊີຟິກ, ຜູ້ບໍລິຫານສູງສຸດ ບໍລິສັດ ຫົວເຫວີຍ ເທັກໂນໂລຢີ (ລາວ) ຈຳກັດຜູ້ດຽວ ພ້ອມດ້ວຍພະນັກງານວິຊາການທີ່ກ່ຽວຂ້ອງທັງສອງຝ່າຍເຂົ້າຮ່ວມ.

แชร์