ຄວກ ແລະ ມລ ຈຸລາລົງກອນ ຮ່ວມມືກັນສົ່ງເສີມພັດທະນາບຸກຄະລາກອນດ້ານກິລາ

ຄະນະວິທະຍາສາດການກິລາ-ກາຍະກຳ ຫຼືຄວກ ມະຫາວິທະຍາໄລແຫ່ງຊາດລາວ ແລະ ຄະນະວິທະຍາສາດການກິລາ ມະຫາວິທະຍາໄລ ຫຼື ມລ ຈຸລາລົງກອນ ປະເທດໄທ ຮ່ວມມືກັນສົ່ງເສີມການພັດທະນາບຸກຄະລາກອນຂອງສອງພາກສ່ວນດັ່ງກ່າວກໍຄືສອງຊາດ ລາວ-ໄທ ແລະ ໄທ-ລາວ ດ້ວຍການແລກປ່ຽນການຮ່ວມມືດ້ານວິທະຍາສາດການກິລາ, ການຄົ້ນຄວ້າວິໄຈດ້ານກິລາ, ຝຶກອົບຮົມໄລຍະສັ້ນ ແລະໄລຍະຍາວວິທະຍາສາດການກິລາ ແລະແລກປ່ຽນຄູອາຈານ ແລະນັກສຶກສາເຊິ່ງກັນ ແລະກັນ.

ພິທີເຊັນສັນຍາບົດບັນທຶກສັນຍາການຮ່ວມມື (MOA) ດັ່ງກ່າວໄດ້ມີຂຶ້ນວັນທີ 20 ມິຖຸນາ 2023 ທີ່ຫ້ອງການ ຄວກ ມະຫາວິທະຍາໄລແຫ່ງຊາດ, ລະຫວ່າງ ທ່ານ ປອ ອິນຕອງ ເລີດສິນໄຊ ຄະນະບໍດີ ຄະນະວິທະຍາສາດການກິລາ-ກາຍະກຳ ມະຫາວິທະຍາໄລແຫ່ງຊາດ ແລະທ່ານ ດຣ ໄຊພັດ ຣໍສິຣິຣັດ ຄະນະບໍດີ ຄະນະວິທະຍາສາດການກິລາ ມະຫາວິທະຍາໄລຈຸລາລົງ (ປະເທດໄທ), ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ຮສ.ປອ ອຸດົມ ພອນຄຳເພັງ ອະທິການບໍດີ ມະຫາວິທະຍາໄລແຫ່ງຊາດພ້ອມດ້ວຍບັນດາຮອງຄະນະບໍດີຂອງທັງສອງພາກສ່ວນ, ຄູອາຈານ ແລະພະນັກງານທີ່ດກ່ຽວຂ້ອງຢ່າງພ້ອມພຽງ.

ສຳລັບເນື້ອໃນບົດບັນທຶກສັນຍາການຮ່ວມມືຂອງທັງສອງພາກສ່ວນດັ່ງກ່າວໄດ້ພ້ອມກັນເພີ່ມທະວີການແລກປ່ຽນ ແລະຮ່ວມມືດ້ານການສຶກສາໂດຍສະເພາະໄດ້ຕົກລົງເຂົ້າຮ່ວມການສ້າງບົດບັນທຶກສັນຍາການຮ່ວມມື (MOA) ໂດຍທາງຄະນະວິທະຍາສາດການກິລາມະຫາວິທະຍາໄລຈຸລາລົງກອນ ແລະຄວກ ມີຄວາມສົນໃຈຮ່ວມກັນ ໃນການສ້າງຕັ້ງການຮ່ວມມືດ້ານກິດຈະກຳການສຶກສາ ແລະຄົ້ນຄວ້າວິໄຈທີ່ກ່ຽວຂ້ອງກັບການພັດທະນາແນໃສ່ສົ່ງເສີມຜົນປະໂຫຍດຮ່ວມກັນຂອງສອງສະຖາບັນໂດຍໄດ້ມີການກໍານົດໄວ້ຕ້ອງມີໂຄງການຝຶກອົບຮົມລວມທັງຫຼັກສູດທີ່ມີການຮັບຮອງວຸດທິການສຶກສາ ແລະບໍ່ມີວຸດທິ, ການຮ່ວມມືຄົ້ນຄວ້າວິໄຈໃນຂົງເຂດທີ່ສອງຝ່າຍມີຄວາມສົນໃຈຮ່ວມກັນ, ການແລກປ່ຽນເອກະສານທາງວິຊາການທີ່ສອງຝ່າຍມີ,ການແລກປ່ຽນນັກວິຊາການໃນການພັດທະນາວຽກງານວິຊາການເພື່ອຄວາມກ້າວໜ້າທາງວິຊາການ ແລະສະໜັບສະໜູນການຮ່ວມມືກັນຈັດສຳມະນາ,ກອງປະຊຸມປະຕິບັດການ ແລະກອງປະຊຸມວິຊາການອື່ນໆກ່ຽວກັບບັນຫາທີ່ມີຄວາມສົນໃຈຮ່ວມກັນ.

ໂດຍບົດສະເໜີວຽກງານຮ່ວມມືຕາມບົດບັນການຮ່ວມມືດ້ານວິຊາການສະບັບນີ້ຈະໄດ້ມີສະເໜີຜ່ານບັນດາຄະນະນຳຂອງແຕ່ລະສະຖາບັນ ແລະແຕ່ລະຝ່າຍຈະສະເໜີຊື່ສະມາຊິກຂອງຕົນເປັນຜູ້ຕ່າງໜ້າຮັບຜິດຊອບໂຄງການຮ່ວມມືແຜນງານຂອງບຸກຄົນພາຍໃຕ້ບົດບັນທຶກຄວາມເຂົ້າໃຈສະບັບນີ້ຈະຕ້ອງຮ່ວມກັນ ແລະຈັດຕັ້ງປະຕິບັດໂດຍຜູ້ໄດ້ຮັບມອບໝາຍຈາກທັງສອງຝ່າຍ ແລະຄວາມຄືບໜ້າຂອງໜ້າວຽກຂອງແຕ່ລະໂຄງການຕ້ອງໄດ້ຮັບການກວດສອບ ແລະຢັ້ງຢືນຈາກເຈົ້າໜ້າທີ່ໂຄງການທີ່ທີ່ໄດ້ຮັບມອບໝາຍຈາກສອງຝ່າຍ.

ຂ່າວໂດຍ: ສົງການ ພັນແພງດີ
 
 
 
 
 

 

แชร์