ສຄຄຊ ເຜີຍແຜ່ວຽກງານຕະຫຼາດທຶນໃຫ້ນັກສຶກສາ

ໃນວັນທີ 21 ມິຖຸນາ 2023 ທີ່ວິທະຍາໄລແຫ່ງຊາດ ທາງຄະນະກຳມະການຄຸ້ມຄອງຫຼັກຊັບລາວ (ສຄຄຊ) ຈັດງານໂຄສະນາເຜີຍແຜ່ວຽກງານຕະຫຼາດທຶນ ໃນຫົວຂໍ້ “ສົ່ງເສີມຄວາມຮູ້ ກ່ຽວກັບວຽກງານຕະຫຼາດທຶນ” ຈຸດປະສົ່ງເພື່ອທິດສະດີ ແລະພິດຕິກຳຕົວຈິງ ຫຼືບົດຮຽນຂອງບັນດາປະເທດໃນໂລກຕະຫຼາດທຶນແມ່ນເປັນກົນໄກທີ່ສຳຄັນໃນການພັດທະນາເສດຖະກິດ-ສັງຄົມ ໂດຍໃຫ້ກຽດເຂົ້າຮ່ວມ ທ່ານ ເອກະລາດ ສີສານ ຮອງຫົວໜ້າ ສຄຄຊ ພ້ອມດ້ວຍພາກສ່ວນກ່ຽວຂ້ອງ ແລະ ນັກສຶກສາເຂົ້າຮ່ວມ.

ພັກ-ລັດຖະບານຂອງ ສປປ ລາວ ເຫັນໄດ້ເຖິງຄວາມສຳຄັນ ແລະເຫັນດີ ໃຫ້ກະກຽມ ແລະສ້າງຕັ້ງຕະຫຼາດທຶນລາວຂຶ້ນໃນປີ 2010 ຄະນະກຳມະການຄຸ້ມຄອງຫຼັກຊັບ ໄດຮັບການສ້າງຕັ້ງຂື້ນໃນປີ 2009 ໂດຍແມ່ນທ່ານ ຮອງນາຍົກລັດຖະມົນຕີ ຜູ້ຊີ້ນຳວຽກງານເສດຖະກິດ ເປັນປະທານ.ຕລຊລ (ຕະຫຼາດຮຸ້ນຮ່ວມກັບເກົາຫຼີ) ໄລຍະເວລາ 12 ກວ່າ ປີທີ່ຜ່ານມາມີ 11 ບໍລິສັດທີ່ສາມາດອອກຈຳໜ່າຍຮຸ້ນ ແລະຈົດທະບຽນໃນຕະຫຼາດຫຼັກຊັບສາມາດລະດົມທຶນໄດ້ໄລຍະຍາວຈາກພາຍໃນ ແລະ ຕ່າງປະເທດ ຈໍານວນ 33.721 ຕື້ກີບກວມເອົາ 18,23% ຂອງ GDP 2023 (ລະດົມທຶນດ້ວຍຮຸ້ນ ຈຳນວນ 6.818 ຕື້ກີບ, ລະດົມທືນຮຸ້ນກູ້ທັງພາຍໃນ ແລະ ຢູ່ຕ່າງປະເທດ 20.597 ຕື້ກີບ ແລະພັນທະບັດລັດຖະບານ 6.358 ຕື້ກີບ, ຂໍ້ມູນ ພືດສະພາ 2023). ທຶນທີ່ລະດົມໄດ້ດັ່ງກ່າວ ບໍລິສັດໄດ້ນໍາໃຊ້ສ້າງເຂື່ອນໄຟຟ້າ, ສ້າງນໍ້າມັນ, ສູນການຄ້າ, ຜະລິດຊີມັງ, ຜະລິດນໍ້າມັນປາມ,ໃຊ້ເປັນທຶນໜູນວຽນ ແລະອື່ນໆ.

ເຖິງວ່າຕະຫຼາດທຶນລາວຈະໄດ້ຮັບການສ້າງຕັ້ງ ແລະ ພັດທະນາມາໄດ້ໄລຍະໜຶ່ງແລ້ວວຽກງານຕະຫຼາດທຶນຖືວ່າຍັງເປັນອັນໄໝ່ຢູ່ສຳລັບສັງຄົມລາວສ່ວນໃຫຍ່ ແລະ ພາກສ່ວນຕ່າງໆ,ສະນັ້ນຄວາມຮັບຮູ້ ແລະຄວາມເຂົ້າໃຈກຽວກັບວຽກງານຕະຫຼາດທຶນໂດຍສະເພາະຕໍ່ກັບພາກສ່ວນທີ່ກ່ຽວຂ້ອງທັງພາກລັດ ແລະເອກະຊົນລວມທັງສະຖານບັນການສຶກສາຈຶ່ງເປັນປັດໃຈໜຶ່ງທີ່ສຳຄັນໃນພັດທະນາຕະຫຼາດທຶນລາວໃຫ້ມີຄວາມເຂັ້ມແຂງໃນອານາຄົດ.ດ້ວຍເຫດນັ້ນສຳນັກງານຄະນະກຳມະການຄຸ້ມຄອງຫຼັກຊັບ (ຄຄຊ) ຈຶ່ງໄດ້ເອົາໃຈໃສ່ ແລະຍົກສູງວຽກງານໂຄສະນາເຜີຍແຜ່ຜ່ານຫຼາກຫຼາຍຮູບແບບ ແລະຫຼາກຫຼາຍຊ່ອງທາງທັງພາຍໃນນະຄອນຫຼວງແລະ ຕ່າງແຂວງ ແລະຜ່ານສື່ສັງຄົມອອນລາຍຕ່າງໆ.

ງານຄັ້ງນີ້ຈັດຂຶ້ນພາຍໃຕ້ການສະໜັບສະໜູນຂອງຫ້ອງການຮ່ວມມືລາວ-ລຸກຊໍາບວກ.

ຂ່າວ, ບຸນນິກ ມະນີ

แชร์