ຮອງນາຍົກ ລົງຕິດຕາມຄວາມຄືບໜ້າການກໍ່ສ້າງໂຮງແຮມລະດັບ 5 ດາວ

ວັນທີ 20 ມິຖຸນາ 2023, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ ລັດຖະມົນຕີກະຊວງການຕ່າງປະເທດ ພ້ອມດ້ວຍຄະນະໄດ້ຕິດຕາມຄວາມຄືບໜ້າໂຄງການກໍ່ສ້າງໂຮງແຮມອຳມະລີວຽງຈັນ ຕັ້ງຢູ່ບ້ານວັດຈັນ ແລະໂຮງແຮມໂຄຊີ ຕັ້ງຢູ່ບ້ານຊຽງຍືນ ເມືອງຈັນທະບູລີ ນະຄອນຫຼວງວຽງຈັນ ສອງໂຄງການດັ່ງກ່າວ ເປັນໂຄງການຮ່ວມມືກໍ່ສ້າງລະຫວ່າງບໍລິສັດເອເຊຍລົງທຶນພັດທະນາ ແລະກໍ່ສ້າງຈຳກັດຜູ້ດຽວ ແລະບໍລິສັດຕັງຈະເລີນກຣຸບ ເຊິ່ງໂຄງການກໍ່ສ້າງໂຮງແຮມອຳມະລີວຽງຈັນໄດ້ອອກແບບໃຫ້ເປັນໂຮງແຮມທີ່ທັນສະໄໝມີລະບົບການບໍລິການຄົບຮູບແບບ ແລະເປັນໂຮງແຮມ 5 ດາວ ຕັ້ງຕິດກັບແມ່ນໍ້າຂອງໂດຍການອອກແບບອາຄານໃຫ້ມີຄວາມໂຄ້ງຄ້າຍຄືກັບແມ່ນໍ້າຂອງ ແລະວັດສະດຸທີ່ນຳມາກໍ່ສ້າງແມ່ນມີຄຸນນະພາບສູງເຊິ່ງໂຄງການດັ່ງກ່າວມີຄວາມສູງ 56 ແມັດ ມີພື້ນທີ່ກໍ່ສ້າງທັງໝົດ 29.000 ຕາແມັດ ປະກອບມີ 14 ຊັ້ນ, 248 ຫ້ອງ ໃນນີ້ມີຫ້ອງປະຊຸມຂະໜາດໃຫຍ່ລະດັບສາກົນພ້ອມທັງຍັງມີຫ້ອງຈັດງານລ້ຽງ, ຮ້ານອາຫານ, ສະຖານທີ່ອອກກຳລັງກາຍ, ສະລອຍນໍ້າ ແລະມີຊັ້ນດາດຟ້າທີ່ສາມາດເບີ່ງເຫັນວິວນໍ້າຂອງ ແລະຕົວເມືອງວຽງຈັນໄດ້ແບບ 360 ອົງສາ ເໝາະເປັນສະຖານທີ່ສະຫຼອງໃນເທສະການຕ່າງໆ ປະຈຸບັນການກໍ່ສ້າງຄືບໜ້າ 45% ແລະຄາດວ່າຈະເປີດຢ່າງເປັນທາງການໃນເດືອນພຶດສະພາ 2024.

ສ່ວນໂຮງແຮມໂຄຊີ ເປັນໂຮງແຮມ 4 ດາວ ມີທີ່ຕັ້ງຕິດກັບສວນນໍ້າພຸຊຽງຍືນເຊິ່ງເປັນສະຖານທີ່ທາງປະຫວັດສາດອັນຍາວນານຕິດພັນກັບປະຊາຊົນລາວພາຍໃນໂຮງແຮມມີທັງໝົດ 98 ຫ້ອງ ມີສະລອຍນໍ້າຊັ້ນ rooftop ດາດຟ້າສາມາດເບິ່ງວິວຕົວເມືອງນະຄອນຫຼວງວຽງຈັນ ແລະວິວນໍ້າຂອງປະຈຸບັນການກໍ່ສ້າງມີຄວາມຄືບໜ້າ 40% ແລະຄາດວ່າຈະໃຫ້ສຳເລັດ ແລະເປີດຢ່າງເປັນທາງການໃນເດືອນພະຈິກ 2023 ເພື່ອກຽມພ້ອມຮັບໃຊ້ກອງປະຊຸມສຸດຍອດອາຊຽນທີ່ລາວໄດ້ເປັນເຈົ້າພາບ.

ທີ່ມາ: ໜັງສືພິມວຽງຈັນໃໝ່

แชร์