ມຊ ເປີດສະໝັກເຂົ້າສອບເສັງທີ 3 ກໍລະກົດ ຜ່ານອອນລາຍ

ເມື່ອບໍ່ດົນມານີ້ ທ່ານ ອຈ. ສອນສັກສິດ ບຸນມາ ຫົວໜ້າຫ້ອງການວິຊາການ ມະຫາວິທະຍາໄລແຫ່ງຊາດໄດ້ໃຫ້ຮູ້ວ່າ: ມະຫາວິທະຍາໄລແຫ່ງຊາດ (ມຊ) ຈະເປີດສະໝັກເຂົ້າສອບເສັງຮຽນໃນສົກປີ 2023-2024 ທາງອອນລາຍວັນທີ 3 ກໍລະກົດ-9 ສິງຫາ 2023, ຈາກນັ້ນວັນທີ 10 ກໍລະກົດ-ວັນທີ 9 ສິງຫາ ນັກສຶກສາສາມາດມາຮັບເອົາບັດສອບເສັງ. ສ່ວນມື້ສອບເສັງເຂົ້າ ມຊ ແມ່ນຈະຈັດຂຶ້ນໃນວັນທີ 12 ສິງຫາ 2023 ຢູ່ 3 ຈຸດຄື: ສູນໃຫຍ່ ມຊ, ໂຮງຮຽນວິສະວະກຳສາດໂສກປ່າຫຼວງ ແລະໂຮງຮຽນກົດຫມາຍດອນນົກຂຸ້ມ.

ທ່ານກ່າວຕື່ມວ່າ: ເມື່ອສະໝັກທາງອອນລາຍແລ້ວຜູ້ສະໝັກຈະຕ້ອງເອົາເອກະສານມາຢັ້ງຢືນເອົາບັດເຂົ້າຫ້ອງສອບເສັງ, ຖ້າເປັນນັກຮຽນຈົບສົກປີ 2022-2023 ໃຫ້ສໍາເນົາເອົາບັດເຂົ້າຫ້ອງສອບເສັງຈົບຊັ້ນມໍ 7,ສ່ວນນັກຮຽນທີ່ຈົບກ່ອນໜ້ານີ້ຕ້ອງໄດ້ສໍາເນົາໃບປະກາດສະນິຍະບັດ ແລະຖ້າເປັນພະນັກງານຕ້ອງສໍາເນົາໃບປະກາດຈົບຊັ້ນສູງ ແລະຊັ້ນກາງ.

ນອກຈາກການສະໝັກທາງອອນລາຍແລ້ວ, ມຊ ຍັງມີສູນບໍລິການສະໝັກເຂົ້າສອບເສັງຢູ່ສະໂມສອນໃຫຍ່ຂອງ ມຊ ເພື່ອເປັນບ່ອນບໍລິການແນະນໍາໃຫ້ນັກຮຽນລົງທະບຽນທາງອອຟລາຍ. ປະຈຸບັນ, ມຊ ປະກອບມີ 13 ຄະນະວິຊາ ແລະ 118 ຫຼັກສູດ ໃນນັ້ນ, ມີ 5 ຫຼັກສູດທີ່ຈະແຍກເສັງຕ່າງຫາກຄື: ຫຼັກສູດສາຂາຄູພາສາຈີນ, ຫຼັກສູດນາໆຊາດ, ມີສອງຫຼັກສູດຮຽນຢູ່ຄະນະເສດຖະສາດ ແລະຫຼັກສູດພາສາຝຣັ່ງສໍາລັບການທ່ອງທ່ຽວ.

ທີ່ມາ: CRI-FM93

แชร์