ໄທ ສົນໃຈ ການຂົນສົ່ງສິນຄ້າຈາກທ່າເຮືອແຫຼມສະບັງ ມາຍັງທ່າບົກ-ທ່ານາແລ້ງ ແລ້ວສົ່ງຕໍ່ໄປຍັງ ສປ ຈີນ.

ຄະນະຜູ້ບໍລິຫານ ບໍລິສັດ ສິດທິ ໂລຈິສຕິກພາກ ຈໍາກັດ, ຊຶ່ງເປັນຜູ້ພັດທະນາ ທ່າບົກ-ທ່ານາແລ້ງ ຂອງ ສປປ ລາວ ໄດ້ຕ້ອນຮັບຄະນະຜູ້ບໍລິຫານຂອງບໍລິສັດ ແຫຼມສະບັງ ອິນເຕີເນຊັນແນລ ເທິມິນໍ ຈໍາກັດ. ໃນໂອກາດ, ທີ່ເດີນທາງມາຢ້ຽມຢາມ ແລະຕິດຕາມເບິ່ງການຂົນສົ່ງສິນຄ້າຈາກໄທມາລາວແລ້ວສົ່ງຕໍ່ໄປຍັງຕະຫຼາດ ສປ ຈີນ ລວມທັງບັນດາປະເທດເອີຣົບຕ່າງໆ ໂດຍໃຊ້ບໍລິການຂົນສົ່ງຜ່ານທາງລົດໄຟ ລາວ-ຈີນ.

ຊຶ່ງໄທເຫັນວ່າ: ການຂົນສົ່ງສິນຄ້າຜ່ານແດນຂອງ ສປປ ລາວ ໃນປັດຈຸບັນ ໄປຍັງ ສປ ຈີນ ຖືວ່າເປັນເສັ້ນທາງທີ່ໃຊ້ເວລາສັ້ນກວ່າການຂົນສົ່ງທາງລົດບັນທຸກຫຼາຍເທົ່າ ແລະປະເທດລາວກໍ່ເປັນໃຈກາງປະຕູການຄ້າທີ່ສໍາຄັນລະຫວ່າງອາຊຽນ ໄປຍັງ ສປ ຈີນ ທີ່ມີມູນຄ່າສູງຂຶ້ນໃນແຕ່ລະປີ.

ນອກນັ້ນ, ເຄືອຂ່າຍລົດໄຟຈາກ ສປ ຈີນ ໄປຍັງບັນດາປະເທດເອີຣົບກໍ່ມີຫຼາຍຂຶ້ນ, ຈຶ່ງເຮັດໃຫ້ສາມາດສົ່ງສິນຄ້າໄປເຖິງຕະຫຼາດເອີຣົບໄດ້ ພາຍໃນ 14 - 21 ວັນ. ຖືວ່າເປັນເວລາສັ້ນທີ່ສຸດເມື່ອທຽບກັບການຂົນສົ່ງທາງທະເລທີ່ໃຊ້ເວລາທັງໝົດ 45 ວັນ.

ທີ່ມາ: Targetmagazine

แชร์