2 ປີເຄິ່ງ ຄຳມ່ວນ ເກັບລາຍຮັບໄດ້ 2.563 ຕື້ກີບ

ຕາມການລາຍງານຂອງ ທ່ານ ປອ. ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ ຕໍ່ກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ໄລຍະ 5 ປີ ຄັ້ງທີ IX (2021-2025) ໃນກອງປະຊຸມເປີດກວ້າງຄົບຄະນະກາງສະໄໝຂອງຄະນະບໍລິຫານງານພັກ ແຂວງຄຳມ່ວນ ສະໄໝທີ X ໃນວັນທີ 20 ມິຖຸນາ 2023 ວ່າ: ແຜນພັດທະນາເສດຖະກິດ-ສັງຄົມກາງສະໄໝ ແມ່ນຍັງສືບຕໍ່ຈັດຕັ້ງປະຕິບັດຄາດໝາຍໃນແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງແຂວງ ດ້ວຍການສືບຕໍ່ຜັນຂະຫຍາຍວິໄສທັດພັດທະນາແຂວງຄໍາມ່ວນ ຮອດປີ 2030 ແລະ ຍຸດທະສາດການພັດທະນາ ຮອດປີ 2025 ໂດຍສືບຕໍ່ພັດທະນາແຂວງຄຳມ່ວນ ໃຫ້ “ເປັນແຫຼ່ງຜະລິດສະບຽງອາຫານ, ເປັນຖານພັດທະນາອຸດສາຫະກຳ, ການບໍລິການ ແລະ ການທ່ອງທ່ຽວ”.

ຜ່ານການປັບປຸງກົນໄກ, ວິທີການເຮັດວຽກແບບມີຈຸດສຸມພ້ອມທັງການຫັນການເກັບລາຍຮັບແບບທັນສະໄໝເທື່ອລະກ້າວເຮັດໃຫ້ການເກັບລາຍຮັບງົບປະມານຂອງແຂວງຄຳມ່ວນ ໃນໄລຍະ 2 ປີເຄິ່ງຜ່ານມາບັນລຸໄດ້ 2.563,36 ຕື້ກີບ ທຽບໃສ່ແຜນ 5 ປີ ປະຕິບັດໄດ້ 55,32% (ແຜນການ 5 ປີ 4.633,89 ຕື້ກີບ) ກວມເອົາ 6,73% ຂອງ GDP ໃນນີ້ ລາຍຮັບສູນກາງປະຕິບັດໄດ້ 1.256 ຕື້ກີບ ເທົ່າກັບ 45,01% (ແຜນການ 5 ປີ 2.791,95 ຕື້ກີບ) ກວມເອົາ 3,30% ຂອງ GDP, ທີ່ພົ້ນເດັ່ນແມ່ນການເກັບລາຍຮັບທ້ອງຖິ່ນ ລື່ນແຜນການ 3 ປີຊ້ອນ, ການເກັບລາຍຮັບຂອງແຂວງ ໄລຍະກາງສະໄໝບັນລຸໄດ້ເຖິງ 1.306,80 ຕື້ກີບ ເທົ່າກັບ 70,95% (ແຜນການ 5 ປີ 1.841,94 ຕື້ກີບ) ກວມເອົາ 3,43% ຂອງ GDP. ດ້ານລາຍຈ່າຍ ປະຕິບັດໄດ້ 1.394,43 ຕື້ກີບ ເທົ່າກັບ 43,28% (ແຜນການ 5 ປີ 3.222,2 ຕື້ກີບ) ກວມເອົາ 3,36% ຂອງ GDP.

ສຳລັບທິດທາງແຜນພັດທະນາເສດຖະກິດ-ສັງຄົມທ້າຍສະໄໝ (2023-2025) ສູ້ຊົນໃຫ້ເສດຖະກິດຂະຫຍາຍຕົວຢູ່ໃນລະດັບ 6% ຂຶ້ນໄປ,ອັດຕາການຂະຫຍາຍຕົວເສດຖະກິດຂອງແຂວງ ສືບຕໍ່ຂະຫຍາຍຕົວ ແລະມີທ່າອ່ຽງເພີ່ມຂຶ້ນເທື່ອລະກ້າວ ຄື: ປີ 2024 ໃຫ້ຂະຫຍາຍຕົວ 5,95% ເທົ່າກັບ 15.721 ຕື້ກີບ ແລະໃນປີ 2025 ຄາດວ່າໃຫ້ຂະຫຍາຍຕົວຢູ່ໃນລະດັບ 6% ເທົ່າກັບ 17.162 ຕື້ກີບ. ຮອດປີ 2025 ລາຍຮັບສະເລ່ຍ 2.399 ໂດລາສະຫະລັດຕໍ່ຄົນຕໍ່ປີ, ລວມຍອດຜະລິດຕະພັນພາຍໃນສະສົມໃຫ້ບັນລຸ 67.621 ຕື້ກີບ ແລະລະດົມທຶນໃຫ້ໄດ້ 20-24% ຂອງ GDP ຫຼື ເທົ່າກັບ 17.204,46 ຕື້ກີບ.

แชร์