ຖວທ ມອບໂທລະໂຄ່ງໃໝ່ 50 ຊຸດ ໃຫ້ແຂວງອັດຕະປື

ກະຊວງຖະແຫລງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ມອບໂທລະໂຄ່ງຈໍານວນ 50 ຊຸດ ໃນໂຄງການປັບປຸງຂະຫຍາຍຕາໜ່າງໂທລະໂຄ່ງທົ່ວປະເທດ (ໄລຍະ 2) ໃຫ້ແກ່ແຂວງອັດຕະປື ໃນວັນທີ 21 ມິຖຸນາ 2023 ເພື່ອນໍາໄປແຈກຢາຍໃຫ້ບັນດາບ້ານໃນທົ່ວແຂວງ. ຕາງໜ້າມອບໂດຍ ທ່ານ ສົມສະຫວາດ ພົງສາ ຫົວໜ້າກົມສື່ມວນຊົນ ກະຊວງ ຖວທ ແລະຕາງໜ້າຮັບໂດຍທ່ານ ກົງຈັກ ສີສະຫວາດ ຫົວໜ້າພະແນກ ຖວທ ແຂວງອັດຕະປື, ມີທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງ ຖວທ, ທ່ານຮອງເຈົ້າແຂວງ ອັດຕະປື ແລະພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ອຸປະກອນຊຸດໂທລະໂຄ່ງມອບ-ຮັບໃນຄັ້ງນີ້, ປະກອບມີເຄື່ອງຂະຫຍາຍສຽງ,ຊຸດປາກໂທລະໂຄ່ງ,ສາຍໂທລະໂຄ່ງ, ເຄື່ອງຮັບສັນຍານວິທະຍຸ, ຈານຮັບດາວທຽມສຳລັບຮັບສັນຍານວິທະຍຸ ແລະອຸປະກອນເສີມອື່ນໆອີກຈະນວນໜຶ່ງເຊິ່ງຈະໄປກອບຕິດຕັ້ງຢູ່ຂັ້ນບ້ານໃນທົ່ວແຂວງເພື່ອໃຫ້ອົງການປົກຄອງບ້ານນຳໃຊ້ເຂົ້າໃນການໂຄສະນາ ປະຊາສຳພັນວຽກງານຂ່າວສານຕ່າງໆ ພາຍໃນບ້ານ ແລະທັງເປັນການເພີ່ມທະວີເປັນກະບອກສຽງໃນການໂຄສະນາ ເຜີຍແຜ່ແນວທາງນະໂຍບາຍຂອງພັກ-ລັດ ເປັນຕົ້ນແມ່ນ ການກະຈາຍຂໍ້ມູນຂ່າວສານ, ສາລະໜ້າຮູ້ໃຫ້ປະຊາຊົນພາຍໃນບ້ານໄດ້ຮັບຟັງ ແລະຮັບຮູ້ວຽກງານໃຫ້ທັນກັບສະພາບການ ເຊັ່ນ: ການເຝົ້າລະວັງການແຜ່ລະບາດຂອງພະຍາດ, ສະພາບໄພພິບັດຕ່າງໆ ແລະເນື້ອໃນແຜນນະໂຍບາຍ, ແຈ້ງການແຕ່ລະໄລຍະທີ່ຂັ້ນເທິງໄດ້ກຳນົດໄວ້ໃຫ້ທົ່ວເຖິງ.

ໂອກາດດຽວກັນ, ຍັງໄດ້ມີການຝຶກອົບຮົມຍົກລະດັບກ່ຽວກັບວຽກເຕັກນິກການນຳໃຊ້ໂດຍພື້ນຖານ, ການຕິດຕັ້ງໂທລະໂຄ່ງ, ຕິດຕັ້ງຈານດາວທຽມ, ການນຳໃຊ້ອຸປະກອນ, ການບໍາລຸງຮັກສາອຸປະກອນ ຢ່າງຖືກຕ້ອງຕາມຫລັກການ ໃຫ້ພະນັກງານວິຊາການເຕັກນິກ ທີ່ກ່ຽວຂ້ອງຂອງແຂວງ ແລະ ພະນັກງານຈາກ 5 ເມືອງເປົ້າໝາຍເພື່ອໃຫ້ໄປນຳໃຊ້ຢ່າງຖືກວິທີໃຫ້ມີຄວາມຍືນຍົງ. ມາຮອດປັດຈຸບັນ ແຂວງອັດຕະປື ມີພາຫານະສື່ມວນຊົນທີ່ເປັນລະບົບໂທລະໂຄ່ງ ກວມ 70% ຂອງພື້ນທີ່ທົ່ວແຂວງ.

ຂ່າວ: ໄພບູນ

• 21/06/2023